Ku wa Gatandatu kuri Century Park Hotel and Residence nibwo habaye ibirori byo guhemba abamurika imideli bakizamuka. Bitegurwa na SupraFamily Ltd isanzwe itegura amarushanwa atandukanye ateza imbere impano nka Supra Voice, Rwanda Influencers Award, Miss ‘Supranational n’andi.

Igihembo nyamukuru cyegukanywe na Umutesi Li Hua Brenda wahize abandi 20 bari bahatanye. Uyu mukobwa yahawe igihembo cya miliyoni 1Frw, kurara ijoro muri Century Park Hotel, gukorerwa imisatsi na Dave Salon & Spa, gutemberezwa mu Rwanda na Missionaries Travel Rwanda ndetse no kuzahagarira u Rwanda muri Miss Africa Sub-Sahara.

Muri iri rushanwa kandi hatanzwe ibindi bihembo birimo uwakunzwe n’abantu cyane (People’s choice) cyegukanywe na Umumararungu Kelly Divine. Umurika imideli mwiza mu bijyanye no kwamamaza (commercial model) yabaye Gihozo Sincere.

Hatanzwe kandi n’igihembo cy’umunyamideli wahize abandi mu gutambuka neza (Best runway), cyegukanwa na Uwiduhaye Divine. Abagukanye ibi bihembo bahawe 300 000Frw kuri buri umwe.

Umutesi wegukanye iri rushanwa yavuze ko ari amahirwe akomeye, agiye kumufasha kwagura impano ye no guhesha ishema u Rwanda ku ruhando mpuzamahanga.

SupraModel Competition ni irushanwa ngarukamwaka ritoranya abafite impano mu kumurika imideli, rikabafasha kumenyekanisha ibikorwa byabo ku ruhando mpuzamahanga.

Umutesi yegukanye irushanwa rya SupraModel ahize abandi 20

Umumararungu Kelly Divine niwe wakunzwe cyane muri iri rushanwa

Uwiduhaye Nadine yahize abandi mu bijyanye no gutambuka

Abahatana babanje kunyura kuri 'red carpet'

Aba banyamideli bazafashwa kumenyekanisha no kwagura impano zabo

Muri ibi birori herekanywe imyambaro ya 'Made in Rwanda'

Abahatanaga mu irushanwa rya SupraModel babanje kwerekana imideli

Imyambaro ya Brand8 yerekanywe muri ibi birori

Buri wese yakoze iyo bwabaga ngo aze yarimbye