MINIRENA, REMA na RNRA mwageze kuki?

Muri uyu mwaka wa 2012, habayeho gusinya amasezerano y’Ubufatanye hagati y’u Rwanda n’u Bushinwa mu bikorwa byo kubungabunga urusobe rw’ibinyabuzima (Rwanda-China national ecosystem management partnership).

Guverinoma y’u Rwanda ibinyujije mu kigo cy’igihugu cyo kubungabunga ibidukikije (REMA) hamwe n’ikigo UNEP-IEMP gikorera mu bushinwa bashyize umukono ku masezerano y’ubufatanye ku mpande zombi.

Aya masezerano ashingiye ku bikorwa by’ubushakashatsi, guhererekanya ubumenyi ku mibungabungire y’urusobe rw’ibinyabuzima no gusana ahantu h’amanegeka.

Uyu mwaka wa 2012 kandi waranzwe n’ubucuruzi budasanzwe bw’igiti cy’umushikiri, aho abatari bake bagiye bafatirwa muri ubwo bucuruzi, kuko wasangaga ahanini bugamije konona ibidukikije.

Iki giti cyakomeje kuvugwaho menshi ngo cyajyanwaga mu gihugu cya Uganda aho ba nyir’ukukigura bagikoragamo imibavu.

N’ubwo ariko kandi ingamba z’imibungabungire y’ibidukikije zigenda ziyongera, muri uyu mwaka wa 2012, byagaragaye ko Ibidukikije na byo ngo bikwiye gukorerwa igenamigambi n’ubukangurambaga bunonosoye, mu rwego rwo kurushaho kubyitaho no kubibungabunga.

Ibi ni ibyatangajwe n’Umuyobozi mukuru w’Ikigo cy’Igihugu Gishinzwe Umutungo Kamere (RNRA), Dr Nkurunziza Emmanuel mu nama yareberaga hamwe ibyo bakoze mu gice cy’ibidukikije n’umutungo kamere.

Muri rusange Nkurunziza akaba avuga ko intego bihaye mu kubungabunga ibidukikije bazigezeho 100% ndetse ngo hari n’aho barengeje ku byo bari biyemeje.

Ntawabura kuvuga kandi ko ibyo byakwemezwa n’uko muri uyu mwaka, u Rwanda rwahawe igihembo cyo kubungabunga akayunguruzo k’imirasire y’izuba mu nama isanzwe ya 14 y’Abaministiri ba Afurika bashinzwe ibidukikije yabereye Arusha muri Tanzaniya.

Tariki ya 16 Nzeri kandi u Rwanda rukaba rwarifatanyije n’Isi kwizihiza Umunsi Mpuzamahanga wo Kubungabunga akayunguruzo k’imirasire y’izuba usanzwe uba buri mwaka.

Bamwe mu bakoraga imirimo ibangamira ibidukikije bubikiwe imbehe

Minisitiri w’intebe Dr Pierre Damien Habumuremyi yasuye igishanga cyo mu murenge wa Nduba ho mu karere ka Gasabo, aho abaturage bacukura umucanga mu buryo bw’akajagari bikangiza ibidukikije, asaba ko imirimo yo gucukura umucanga muri iki gishanga yaba ihagaze, hakabanza gukorwa inyigo y’uko igishanga kigomba gutunganywa.

Minisitiri w’intebe yavuze ko Leta itakwihanganira ako kajagari muri icyo gishanga, bitwaje kubonamo amafaranga.

Amashyamba ageze kuri 24, 5% by’ubuso bw’u Rwanda

Minisitiri w’umutungo kamere Stanislas Kamanzi avuga ko umwaka wa 2012, usize u Rwanda rugeze ku gipimo cya 24,5% by’ubuso buteweho amashyamba, ngo intego nyamukuru ikaba ari uko nibura mu mwaka wa 2020, u Rwanda rwaba rufite 30% by’ubuso biteweho ibiti n’amashyamba.

U Rwanda rwakiriye inama mpuzamanga ku micungire y’Amashyamba

Guhera ku wa 13 kugeza ku itariki ya 16 Ugushyingo 2012, i Kigali hateraniye inama mpuzamahanga y’iminsi itatu yiga ku micungire y’umutungo kamere w’amashyamba muri Afurika yo hagati.

Iyo nama y’ihuriro CEFDHAC (Conférence sur les Ecosystèmes de Forêts Denses et Humides d’Afrique Centrale) yari ibaye ku nshuro ya karindwi, yari ifite insanganyamatsiko igira iti ”uruhare rw’abafatanya bikorwa batandukanye mu micungire y’umutungo kamere.”

Amasambu yabaruwe mu Rwanda ageze kuri Miliyoni 10

Uyu mwaka wa 2012, usize igikorwa cyo kubarura ubutaka n’amasambu kimaze gupima amasambu agera kuri miliyoni 10,038,209; ibyangombwa by’ubukode bw’ubutaka bikaba byatanzwe bigera kuri miliyoni ebyiri mu gihe ibimaze gukorwa ari 4,200,000.