00:00:00 IGIHE NETWORK KN KINYARWANDA EN ENGLISH FR FRANCAIS

Hagaragajwe ingaruka z’ifumbire mvaruganda ku mihindagurikire y’ikirere

Yanditswe na Ntabareshya Jean de Dieu
Kuya 23 Mata 2021 saa 08:07
Yasuwe :
0 0

Ubwo hamurikwaga raporo yakozwe n’Impuzamiryango Nyarwanda iharanira kurengera Ibidukikije, guhangana n’imihindagurke y’ikirere n’iterambere, Rwanda Climate Change and Development Network (RCCDN) hagamijwe kugaragaza ibibazo biri muri politiki y’ubuhinzi, ibidukikije n’imihindagurikire y’ikirere zagiye zisa n’izivuguruzanya, bagaragaje ko n’ubwo ifumbire mvaruganda yongera umusaruro ariko igira ingaruka ku kugundura[gushimura] ubutaka, kwanduza amazi n’imihindagurikire y’ikirere.

Politiki y’ubuhinzi yo muri 2018 ivuga ko “Igihugu cyifuza kwihaza mu biribwa, imirire myiza n’iterambere rirambye, biyoboye ubuhinzi muri 2030” naho politiki y’ibidukikije n’imihindagurikire y’ikirere yo muri 2019 igira iti “ u Rwanda rukwiye kugira ibidukikije bisukuye, bishobora guhangana n’imihindagurikire y’ikirere bitanga ubuzima bwiza kuri sosiyete.”

Ubushakashatsi bwakozwe na Dr John Musemakweli buvuga ko nubwo izi politiki zombi zisa n’aho zuzuzanya ariko harimo byinshi bikenewe kunozwa kugira ngo hakomeze kwimakazwa kubungabunga ibidukikije no guhangana n’imihindagurikire y’ikirere.

Muri ibyo harimo ko gukoresha inyongeramusaruro mvaruganda ndetse n’imikoreshereze y’ibishanga bikigarara nk’ikibazo gikomeye ku kubungabunga ibidukikije.

Raporo ivuga ko guhinga mu bishanga ahanini bitera ibyago birimo kugabanuka kw’amazi no kuyanduza, bagasaba ko habaho gukoreshwa ibishanga mu buryo bunoze hatitawe gusa ku musaruro w’ibihingwa ahubwo hagamijwe no kubungabunga ibidukikije.

Ku kijyanye no gukoresha imvaruganda n’imiti imwe yica udukoko, raporo ivuga nubwo bigira umumaro ariko kubikoresha, cyane bituma ubutaka bwangirika, amazi akandura n’ibiribwa ndetse bikaba n’uburozi ku rusobe rw’ibinyabuzima.

N’ubwo iyo raporo ivuga ibitagenda ariko inagaragaza ko hari inzira zishobora kwifashishwa hashakirwa umuti urambye bimwe mu bibazo bikigaragara.

Raporo isaba inzego bireba kurushaho gukora mu buryo bwo kugabanya imvaruganda hakongerwa ikoreshwa ry’ifumbire y’imborera, kugabanya no guhitamo neza imiti yica udukoko ikoreshwa mu rwego rwo kurinda abantu n’urusobe rw’ibinyabuzima.

Umukozi muri Minisiteri y’Ubuhinzi n’Ubworozi ushinzwe ibijyanye n’ihindagurika ry’ikirere André Gatete, yavuze ko ibyo abakoze ubushakashatsi basabye biri mu byo MINAGRI yiyemeje ariko agaragaza ko hari aho ubushakashatsi butagaragaza neza imikorere myiza y’ibishanga birimo kuba hakoreshwa na gahunda yo kuhira.

Yagize ati “ Ni raporo nziza kandi twishimiye ko n’ibyo musaba biri muri gahunda za Minisiteri, muri gahunda yo gukora ubuhinzi ariko bugendanye n’ihindagurika ry’ikirere […] icyo nashakaga kuvuga ni uko bitoroshye kugabanya ikoreshwa ry’imvaruganda. Turi gukora ubushakashatsi tureba ko hakoreshwa ifumbire n’imiti icyarimwe ariko tugamije kugabanya ibikorerwa mu nganda. Biragoye kandi gukoresha imborera yonyine ni ibintu bizadusaba igihe kitari gito, ndatekereza ko dukwiye kwibanda ku nyungu zo kubikoresha byombi ducunganan’ihindagurika ry’ikirere.”

Nsengimana Aimable wari witabiriye iki kiganiro yavuze ko hari n’igihe usanga inzego z’ibanze nazo zibigiramo intege nke mu ishyirwa mu bikorwa ku ngamba zinyuranye zigamije kubungabunga ibidukikije ndetse no kurinda ibyagezweho.

Umukozi ushinzwe porogaramu muri AFSA, Umuryango ushinzwe ubuziranenge bw’ibiribwa muri Afurika, Bridget Mugambe, usanzwe utera inkunga RCCDN yashimangiye ko bazakomeza gutera inkunga ku kijyanye no kwita ku ihindagurika ry’ikirere, mu bihugu bigera kuri 12 uyu muryango ukoreramo muri Afurika.

Umunyamabanga wa Leta muri Minisiteri y’ibidukikije Patrick Karera yavuze ko gushyira mu bikorwa ingamba zijyanye n’ihindagurika ry’ikirere Leta ikorana n’ibigo by’abikorera umunsi ku wundi ndetse anashimira abakoze iyo raporo no kugaragaza ingamba zagenderwaho kugeza kuri 2030.

RCCDN ivuga hakwiye gushakishwa uburyo politiki y’ubuhinzi yavugururwa kugira ngo ingingo ziburamo zihuzwe neza na Politiki y’ibidukikije n’imihindagurikire y’ikirere, gushyiraho uburyo buhoraho bw’ibiganiro byatuma izi politiki zirushaho kuzuzanya aho kuvuguruzanya no guhanira gushyira mu bikorwa ibivugwa muri izo politiki zombi aho guhera mu nyandiko.

Inzobere zasabye ko hashakishwa igisubizo ku ngaruka ziterwa n'ifumbire y'imvaruganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .