00:00:00 IGIHE NETWORK KN KINYARWANDA EN ENGLISH FR FRANCAIS

Hatangiye gupima ibinyabiziga bifite imyuka ihumanya ikirere

Yanditswe na Mugisha Christian
Kuya 26 March 2022 saa 09:22
Yasuwe :

Raporo y’Ikigo cy’Igihugu gishinzwe kurengera Ibidukikije (REMA) yo mu 2021, igaragaza ko imyuka ihumanya ikirere igira ingaruka mbi ku buzima bw’abantu ndetse 40% by’iyo myuka ikomoka mu binyabiziga.

Leta y’u Rwanda yakomeje guhashya imyuka ihumanya ikirere binyuze mu gushyira mu bikorwa amabwiriza agenga ikirere yo mu 2016 agena uko hakirindwa iyangirika ry’ikirere, yashyizweho n’Ikigo gishinzwe kurengera Ibidukikije cyo muri Leta Zunze Ubumwe za Amerika, EPA.

Mu rwego rwo gukomeza kurengera imibereho myiza y’Abanyarwanda ndetse n’abatuye Isi, REMA yateguye ubukangurambaga buzamara ukwezi, bukazajya bubera mu mpande zitandukanye z’igihugu.

Ubu bukangurambaga buzajya bukorerwa mu mihanda itandukanye aho hazajya hafatwa ibipimo by’umwuka usohorwa n’ibinyabiziga ndetse ababitwara bagakangurirwa guhora babyitaho mu rwego rwo kwirinda kuba imbarutso y’iyangirika ry’ikirere.

Intego ni ukugabanya imyuka yoherezwa mu kirere ivuye mu binyabiziga, ku bufatanye n’ingeri zose z’Abanyarwanda.

Kuri uyu wa Gatanu ku ya 25 Werurwe 2022, wari umunsi wa kabiri w’ubukangurambaga, aho REMA ku bufatanye na polisi y’Iguhugu y’u Rwanda ndetse n’Ikigo cy’Igihugu gitsura Ubuziranenge RSB, babukoreye mu karere ka Nyarugenge, Umurenge wa Kanyinya, akagari ka Nyamweru mu muhanda ugana Shyorongi ndetse no mu muhanda uva Nyabugogo werekeza mu Majyepfo.

Insanganyamatsiko y’ubu bukangurambaga iragura iti “Ikinyabiziga kizima umwuka mwiza.”

Ibi bikorwa byo gupima umwuka uva mu modoka, bizajya bikorwa hakurikijwe amabwiriza y’ubuziranenge agenwa na RSB, aranga ibipimo by’umwotsi ntarengwa ushobora kutangiza ibidukikije uva mu kinyabiziga.

Aya mabwiriza ari mu byiciro bitatu bishingiye ku gihe ibinyabiziga bitandukanye byakorewe, nk’uko bitangazwa n’Umukozi wa RSB, mu ishami ripima ubuziranenge bw’ibikoresho harimo n’ibikoresho bisohora umwuka, Kabera Bernard.

Icyiciro cya mbere kirebana n’ibinyabiziga bishaje bikabije. Ibinyabiziga byose byasohotse mu ruganda mbere y’umwaka w’i 1992 bibarizwa muri iki cyiciro. Muri iki cyiciro igipimo ntarengwa cy’umwotsi wanduza usohoka mu kinyabiziga ntikigomba kurenga uduce tw’umwuka 2000 kuri miliyoni y’uduce tw’umwuka ikinyabiziga cyohereje mu kirere.

Icyiciro cya kabiri kibarizwamo ibinyabiziga byakozwe hagati y’umwaka wa 1992 na 2004. Aha igipimo cy’umwuka wanduza ikinyabiziga cyohereza mu kirere ntikigomba kurenga uduce igihumbi kuri miliyoni y’uduce tw’umwuka woherezwa mu kirere.

Icyiciro cya gatatu ari cyo kigaragaramo ibinyabiziga byakoze ariko bidashaje ndetse n’ibinyabiziga bishya, ni ibyakozwe guhera mu mwaka wa 2005 kugeza ubu. Muri iki cyiciro, igipimo cy’umwuka wanduza ikinyabiziga cyohereza mu kirere ntikigomba kurenga uduce 600 kuri miliyoni y’uduce tw’umwuka woherezwa mu kirere.

Icyakora ibi bipimo bifatirwaho, bishobora kongerwa cyangwa kugabanywa bitewe n’intambwe iterwa mu kurwanya icyahumanya ikirere.

Mu binyabiziga bitandukanye byafatiwe ibipimo, hagaragaye ibirenza ibipimo bisabwa, ba nyirabyo bagaragaza ibibazo bahura nabyo ndetse n’ibindi bihagaze neza.

Umushoferi w’imwe mu modoka zagaragayeho ikibazo cy’umwotsi ufite uduce twinshi duhumanya ikirere, Ntawumenya Emmanuel, yavuze ko we akora ibyangombwa mu kwita ku kinyabiziga cye, harimo no kugisuzumisha, ahubwo hari igihe n’amavuta bakoresha aba atujuje ubuziranenge bityo bikaviramo imodoka zabo gusohora imyuka mibi no kwangirika.

Umuyobozi Mukuru wungirije wa REMA, Munyazikwiye Faustin, yavuze ko ubu bukangurambaga buzasiga Abanyarwanda benshi basobanukiwe akamaro ko kwita ku mwuka woherezwa mu kirere ndetse bakamenya uruhare rwabo.

Yagize ati “Imwe mu myuka irimo n’imyuka iva mu binyabiziga ituma habaho imihindagurikire y’ibihe bigatera ubushyuhe bukabije, imvura nyinshi, n’ibiza, niyo mpamvu hateguwe iyi gahunda y’ubukangurambaga bwihariye.”

Yakomeje avuga ko umushoferi agomba kwita ku kinyabiziga cye akurikije imiterere yacyo, harimo guhindura amavuta ya moteri mu gihe cyabugenewe, gukora isuku muri moteri, bityo bakirinda bakanarinda abandi ingaruka mbi harimo n’indwara.

Munyazikwiye yavuze ko abashoferi bakwiriye kuba maso no gushishoza mu gihe bari kugura amavuta mu rwego rwo kwirinda atujuje ubuziranenge.

Ati “Umushoferi agomba kubanza akareba niba igicuruzwa agiye kugura cyujuje ubuziranenge bwemezwa n’Ikigo cy’Igihugu gishinzwe gutsura Ubuziranenge, RSB, ndetse n’ibicuruzwa byavuye hanze nabyo akareba ko byujuje ubuziranenge.”

Ubu bukangurambaga buzamara ukwezi bwateguwe n’Ikigo cy’Igihugu gishinzwe kurengera Ibidukikije REMA, ku bufatanye na polisi y’Igihugu cy’u Rwanda ndetse na RSB.

Abafatiwe ibipimo by'ibinyabiziga byabo bahabwaga ikibigaragaza
Abashoferi basobanuriwe ubu bukangurambaga biyemeza kugira uruhare mu guhagarika iyangirika ry'ikirere
Bimwe mu binyabiziga byasanzwe nta kibazo bifite
Polisi y'u Rwanda yafashe iya mbere mu gushyigikira ubu bukangurambaga
Umuyobozi wungirije wa REMA, Munyazikwiye Faustin yavuze ko imyuka ituruka mu binyabiziga ihumanya ikirere ku rugero rwa 40%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .