00:00:00 IGIHE NETWORK KN KINYARWANDA EN ENGLISH FR FRANCAIS

Inkwi n’amakara byabaye umugani mu nkambi ya Mahama

Yanditswe na Ferdinand Maniraguha
Kuya 23 March 2022 saa 09:35
Yasuwe :

Mbere ya 2015, Mahama wari umurenge usanzwe utuje ku nkiko z’u Rwanda mu Karere ka Kirehe, aho uba witegeye umugezi w’Akagera munsi yawe, hakurya usuhuzwa n’imisozi myiza ya Tanzania.

Izina ry’uwo murenge ryatangiye kuba ikimenyabose guhera muri Gicurasi uwo mwaka, ubwo impunzi z’Abarundi zahungiraga mu Rwanda ku bwinshi nyuma y’imvururu zakurikiye amatora iwabo.

Umuntu uheruka i Mahama icyo gihe, nta gushidikanya ko ahageze uyu munsi yatungurwa. Mahama ya 2015 ahubatse inkambi, yari agasi kuzuyeho utuzu tw’amahema, nta biti bihabarizwa dore ko n’ibyari bihari byari byakuweho hubakwa inkambi, ibyasigaye bimarwa n’impunzi zishaka ibyo gucana.

Impunzi z’Abarundi zaje zisanga izindi zitandukanye ziri mu nkambi hirya no hino mu Rwanda. Imibereho yazo ishingiye ahanini ku bufasha bahabwa n’imiryango mpuzamahanga, ku isonga hakaba HCR ishinzwe impunzi byihariye.

Iposho rya HCR, nyuma yo kurihabwa ihurizo ryabaga ari ukuriteka kuko inkwi zabonaga umugabo zigasiba undi, bikaba akarusho muri Mahama ibarizwa mu Burasirazuba aho amashyamba ari ingume.

Kuri uyu wa Kabiri ubwo umunyamakuru wa IGIHE yageraga mu nkambi ya Mahama, yasanze ibintu byarahindutse. Mahama yari agasi ubu yabaye nka pariki, ibiti bitoshye n’ibyo bisanganira uhasuye. Ikimenyimenyi ubwo nageragezaga kujya ahirengeye ngo mfate ifoto rusange y’inkambi, byaranze kubera uburebure bw’ibiti birimo bisumba inzu, ngirwa inama yo kurira ikigega kirekire gihari nubwo kuzamuka ibiti atari impano yanjye.

Ibiti bigaragara aho unyuze hose i Mahama mu nkambi

I Mahama nta nzu z’amashitingi zigihari, zose zubakishijwe amabati ndetse hari abishoboye batangiye gushyiramo sima n’amakaro. Ni inkuru mpamo si impuha.

Inkuru ishimishije iri i Mahama, ni uko ntawe ugitekesha inkwi, imyaka itatu irashize bazisezereye, ubu nta rugo ruhabarizwa rutabamo gaz.

Ni agahigo katari muri Mahama gusa icumbikiye abasaga ibihumbi 55, kuko n’inkambi ya Mugombwa iherereye mu Karere ka Gisagara, impunzi zose ziyibarizwamo ziteka kuri Gaz.

Uyu ni umwanzuro wo guhagarika ikoreshwa ry’inkwi mu gutekera impunzi wafashwe na Guverinoma y’u Rwanda guhera mu 2017, kugira ngo habungabungwe ibidukikije bikomeje gukendera kubera muntu.

Ikoreshwa rya gaz i Mahama na Mugombwa, ryatumye 67 % by’impunzi u Rwanda rucumbikiye kuri ubu zikoresha gaz mu guteka. Mu zindi nkambi zisigaye naho ntihakoreshwa inkwi, ahubwo hatangijwe ubundi buryo butangiza ibidukikije burimo na za Briquettes.

Mumararungu Concessa amaze imyaka irindwi ahungiye mu Rwanda i Mahama, nyuma y’ibibazo by’umutekano byadutse mu gihugu cye cy’u Burundi.

Abana be batanu bose biga mu mashuri akikije inkambi ya Mahama, mbere yo kujyayo n’igihe bavuyeyo bakenera kurya ibyatetswe.

Mbere yo gutangira gukoresha gaz, avuga ko abana be batariraga ku masaha, rimwe bagakererwa ishuri kuko yabuze inkwi zo gutekesha cyangwa se izo HCR yabahaye zatinze.

Ati “Gaz iramfasha kuko mpisha ku masaha. Bwa mbere umwana yavaga ku ishuri agahita aryama atariye kuko bitarashya wenda imvura yaguye inkwi zo gucana zikaba ikibazo, twajya no kuzifata ugasanga tuzibonye amasaha yagiye, umwana akarya bwije.”

Mugenzi we Kamahoro Leatitia uretse kuba gaz ituma guteka byihuta, ngo byanabarinze amakimbirane n’abaturage bo hanze y’inkambi, kuko bajyaga bashwana bapfa kubangiriza ibiti n’amashyamba.

Ati “Mbere byari bigoye kubera ko twajyaga gushaka inkwi ugasanga biratugoye cyane. Kuri ubu umwanya wose ushatse uracana. Nk’ubu imvura yaguye ariko ntetse mu nzu nta kibazo na kimwe. Mbere watekeraga hanze imvura yagwa ugahita uterura.”

Kamahoro Leatitia yishimira ko nta makimbirane akiba hagati y'impunzi n'abatuye hanze y'inkambi bapfa inkwi

Kuba inkambi igaragaramo ibiti byinshi, impunzi z’i Mahama zivuga ko bitikoze, ahubwo ari umusanzu wo kuba bamaze imyaka itatu batekesha gaz.

Niragira Pierre, umwe mu mpunzi yagize ati “Inkambi yacu irasa neza ariko tutarabona gaz uku muyibona siko yari iri, ibi biti ntabyo wari kuhasanga. Uyu munsi ibi biti biri mu bidukikije bituma akayaga kamera neza.”

Gaz impunzi zihabwa ni iy’ibilo bitandatu.Nta n’umwe uyishyuzwa buri rugo ruyihabwa ku buntu. Sosiyete zirimo SP nizo zizana Gaz mu nkambi ku minsi runaka, bakaza kuyishyiriramo abo yashizemo.

Icyakora, ntabwo bivuze ko kuba itangirwa ubuntu wemerewe kuyikoresha uko wishakiye. Bitewe n’umubare w’abantu utunze mu rugo, uhabwa umunsi ugomba kugarukiraho. Urugero, niba urugo rwawe rurimo abantu icumi, ushobora guhabwa gaz inshuro eshatu mu kwezi, rwaba rurimo babiri ukaza rimwe cyangwa kabiri.

Umuyobozi w’inkambi ya Mahama, Vuganeza André yabwiye IGIHE ko akamaro ko gukoresha gaz mu nkambi kigaragaza, ahereye ku bidukikije byangizwaga kugira ngo haboneke inkwi zo gucana.

Yavuze ko nibura ku kwezi bakoreshaga amasiteri ibihumbi 20 y’inkwi ariko ubu ibyo biti byabungabunzwe kuko hakoreshwa gaz.

Ati “Iyo tuba tugikoresha inkwi, amashyamba yo mu Burasirazuba yari kuba yarashizeho.”

Vuganeza yavuze ko kugeza ubu nta rugo na rumwe i Mahama rukoresha ubundi buryo bwo gucana butari gaz, kandi ko abagenerwabikorwa babyishimiye.

Mu Rwanda habarizwa impunzi zisaga ibihumbi 120 kandi zose zifite uburyo bwo guteka butangiza ibidukikije.

Minisiteri y’Ibikorwa remezo igaragaza ko buri cyumweru mu Rwanda hatemwa amashyamba ya hegitari 380 yo gutwikamo amakara n’inkwi. Ni mu gihe 79 % by’abanyarwanda bagikoresha inkwi n’amakara mu guteka. Guverinoma ifite umuhigo wo kugabanya uwo mubare ukagera kuri 42 % bitarenze mu 2024.

Iyo igihe cyo kongeramo gaz cyageze, abafite iyashizemo bihutira kongereshamo indi
Uyu mukecuru twahuye avuye gufata indi gaz yo gutekesha
Buri wese yongererwamo gaz bitewe n'itariki aherukira gufata indi
Mbere yo guhabwa gaz, ubanza kugaragaza igihe uherukira gufata indi
Buri wese azana icupa rya Gaz yashizemo bakamwongereramo indi
Nubwo imvura yari yakamejeje hanze, abo muri uru rugo nta kibazo cyo guteka bari bafite kubera gaz
Uyu ibiryo byari bihiye, ategereje ko abana bava ku ishuri
Ukihera i Mahama wakirwa n'ishusho y'icyatsi kubera ibiti bihaherereye
Nubwo Mahama ituwe n'impunzi zisaga ibihumbi 55, inzu babamo zimaze kurengerwa n'ibiti
Kubera ibiti bimaze guterwa i Mahama, imisozi yaho isa nk'iriya yo hakurya muri Tanzania

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .