Norvège: Hejuru ya 50% by’imodoka zagurishijwe umwaka ushize ni izikoresha amashanyarazi

Yanditswe na Muhonzire Sylvine
Kuya 7 Mutarama 2021 saa 08:07
Yasuwe :
0 0

Kugeza ubu, Norvège ni cyo gihugu cya mbere ku isi cyagurishije imodoka nyinshi nshya zikoresha amashanyarazi, aho izirenga 50% z’imodoka zagurishijwe umwaka ushize ari iz’amashanyarazi, ugendeye ku mibare yatanzwe n’inganda zikora imodoka muri icyo gihugu.

Mu modoka zagurishijwe mu mwaka ushize nubwo zabaye nke kubera Coronavirus, izigera kuri 54.3% zari izikoresha amashanyarazi, ndetse umubare ukaba wariyongereye ugereranyije n’umwaka wabanje wa 2019, aho bagurishije izigera kuri 42.4% zikoresha amashanyarazi ugereranyije n’umubare w’izagurishijwe zose.

Christina Bu, Umunyabanga Mukuru w’Ihuriro ry’abakora imodoka zikoresha Amashanyarazi muri Norvège, yavuze ko abantu bagura izi modoka biyongereye cyane.

Bu, yabwiye Ibiro Ntaramakuru by’Abafaransa AFP, ko Norvège ari icyo gihugu cya mbere ku isi kibashije kugurisha imodoka zikoresha amashanyarazi nyinshi kikarenza 50%, ndetse yongeraho ko bari mu nzira nziza yo kugera ku byo biyemeje mu cyerekezo cya 2025.

Iki gihugu gifite intego y’uko mu mwaka umwe gusa, kizaba gifite imodoka nshya zikoresha amashanyarazi gusa, ni ukuvuga ko nta modoka nshya izaba inywa ibikomoka kuri peteroli.

Kubera ko izi modoka z’amashanyarazi zidatanga imisoro muri iki gihugu, nibyo bituma zigurwa cyane ndetse n’izindi nyungu zirimo kuba zitishyura umuhanda zinyuramo, no kuba zemerewe guca mu mihanda yagenewe imodoka rusange.

Imodoka z’ubwoko bune, zagurishiijwe cyane muri iki gihugu ni iza Audi e-tron, Tesla Model 3, Volkswagen ID.3 ndetse n’iza Nissan Leaf zose zikoresha amashanyarazi.

Norvège iyoboye ibihugu ku isoko ry'imodoka zikoresha amashanyarazi ku isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .