00:00:00 IGIHE NETWORK KN KINYARWANDA EN ENGLISH FR FRANCAIS

RAB igeze kure umushinga uzagoboka abaturage bo ku Mayaga bajyaga bahura n’ikibazo cy’ubwatsi bw’amatungo

Yanditswe na Prudence Kwizera
Kuya 4 Gicurasi 2021 saa 03:06
Yasuwe :
0 0

Mu mpera z’umwaka ushize humvikanye ikibazo cy’Abanyarwanda batuye mu turere twa Nyanza na Gisagara hafi y’umupaka uhuza u Rwanda n’u Burundi, bajya kwahira ubwatsi hakurya bitewe n’uko babubuze aho batuye.

Mu ukwakira 2020 Ikigo cy’Igihugu gishinzwe Iterambere ry’Ubuhinzi n’Ubworozi, RAB, cyatangiye gushaka igisubizo kirambye ku kibazo cy’ibura ry’ubwatsi gikunze kugaragara mu gice cy’Amayaga mu Rwanda kigatuma hari bamwe mu borozi bambuka bakajya kubushakira mu Burundi, bagahohoterwa cyangwa bagafatwa bagafungirwayo.

RAB ibinyujije mu mushinga wayo ugamije guteza imbere ubworozi bw’inka zitanga umukamo witwa Rwanda Dairy Development Project (RDDP) yatangiye gutoza abaturage bo mu Karere ka Nyanza gutera ubwatsi ku bwinshi kugira ngo batazongera guhura n’ikibazo cy’ibura ryabwo.

Icyo gihe hahise haterwa ubwatsi ku buso bwa hegitari zigera kuri ebyiri mu Murenge wa Kibirizi kugira ngo abaturage bazabone imbuto yabwo ihagije.

Umukozi w’Umushinga RDDP, Nshokeyinka Joseph, yabwiye IGIHE ko kugeza ubu imbuto z’ubwatsi batubuye zamaze kuboneka ku buryo zigiye guhabwa abaturage bagatera mu mirima yabo.

Ati “Muri gihembwe cy’ihinga cya 2021 A twari turi ku Mayaga muri Kibirizi aho twari twagiye gutangiza igihembwe cy’ihinga ry’ubwatsi ku rwego rw’igihugu. Ni gahunda yakomereje no mu tundi turere.”

“Ubu imbuto irahari imeze neza, twiteguye ko mu gihembwe cy’ihinga cya 2022 A izaba igeze ku gipimo cyo gutanga izindi mbuto zigahabwa bariya baturanyi bose bari hariya. Tukaba tudashidikanya ko mu minsi iza abantu bose bambukaga bajya kwahira hakurya bitazongera kubaho.”

Nshokeyinka akomeza avuga ko kugeza ubu imbuto yabonetse ari ibinyampeke birimo urubingo ruzwi nka Kakamega na Chloris Gayana ndetse na Panicum maximum na Panikum Chloratum.

Hari kandi ubwatsi bw’ibinyamisogwe aribwo Desmodium distrortum; Desmodium incinatum; Mucuna na Rabrab.

Ati “Ibyo byose ni ibinyamisogwe usanga bijya kunganira bya binyampeke kuko iyo bigaburiwe inka iba ihawe ifunguro ryuzuye.”

Bamwe mu bahinzi bo mu Karere ka Nyanza mu Murenge wa Kibirizi babwiye IGIHE ko biteguye kwakira imbuto y’ubwatsi kugira ngo babuhinge kuko babukeneye.

Mukakarera Immaculée ati “Izi mbuto batuzaniye bigaragara ko ari nziza kandi zikura vuba. Ubu rero dutegereje ko baziduha kugira ngo dutangire kuzihinga mu mirima yacu, turiteguye.”

Undi mworozi witwa Nsigaye Paul na we yavuze ko nibamara kubaha imbuto, ikibazo cy’ibira ry’ubwatsi kizaba gikemutse.

Ati “Hano ku Mayaga icyo kibazo cy’ibura ry’ubwatsi kimaze igihe kinini, ariko ziriya mbuto batuburiye inaha nibamara kuziduha tukazitera, kizaba gikemutse kandi nta muntu uzasubira kwahira mu Burundi.”

Mu turere 14 umushinga RDDP ukoreramo mu gihembwe cy’ihinga cya 2021 A hatewe ubwatsi ku buso bushya bungana na hegitari 2000.

Hatubuwe imbuto y'ubwatsi butandukanye kugira ngo aborozi babone imbuto yabwo ihagije
Hatubuwe n'imbuto y'urubingo rwitwa Kakamega
Imbuto z'ubwatsi zamaze gutuburwa zigiye guhabwa aborozi
Mu Murenge wa Kibirizi mu Karere ka Nyanza hatuburiwe imbuto y'ubwatsi ku buso bwa hegitari ebyiri
Mu bwatsi bwatubuwe harimo n'ibinyamisogwe
Umukozi w’Umushinga RDDP, Nshokeyinka Joseph, yabwiye IGIHE ko kugeza ubu imbuto z’ubwatsi batubuye zamaze kuboneka ku buryo zigiye guhabwa abaturage bagatera mu mirima yabo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .