REMA yahagaritse ibikorwa bitemewe byubatswe ku kiyaga cya Kivu birimo iby’ubukerarugendo

Yanditswe na Ferdinand Maniraguha
Kuya 3 Kanama 2020 saa 01:24
Yasuwe :
0 0

Ikigo gishinzwe ibidukikije, REMA cyatangaje ko cyahagaritse bimwe mu bikorwa bitemewe byakorerwaga mu nkengero z’ikiyaga cya Kivu birimo n’iby’ubukerarugendo.

Byaturutse mu igenzura ryakozwe ku nkengero z’ikiyaga cya Kivu mu turere twa Rubavu, Rusizi, Nyamasheke, Karongi na Rutsiro.

Mu butumwa REMA yanyujije kuri Twitter, yatangaje ko habonetse ibikorwa bitemewe birimo ibikorwa bine by’inyubako z’ ubukerarugendo, ubuhinzi n’ibindi. Ibyo bikorwa byose byahise bihagarikwa.

Itegeko N°48/2018 ryo ku wa 13/08/2018 rigenga ibidukikije rivuga ko mu bikorwa bibujijwe harimo kumena imyanda yaba yumye, itemba cyangwa gazi ihumanya mu mugezi, mu ruzi, mu gishanga, mu kidendezi, mu kiyaga no mu nkengero zabyo; kwangiza ubwiza bw’amazi yaba ay’imusozi cyangwa ay’ikuzimu.

Birabujijwe kandi kumena, gutembesha cyangwa guhunika ibintu byose ahantu bishobora guteza cyangwa kongera ubuhumane bw’amazi; kogereza amabuye y’agaciro mu migezi cyangwa mu biyaga; gushyira igikorwa cy’ubuhinzi n’ubworozi mu ntera ya metero icumi (10 m) uvuye ku nkombe z’imigezi n’inzuzi no mu ntera ya metero mirongo itanu (50 m) uvuye ku nkombe z’ibiyaga.

Hari kandi kubaka ikiraro cy’amatungo, ibagiro, isoko ry’amatungo mu ntera ya metero mirongo itandatu (60 m) uvuye ku nkombe z’imigezi n’inzuzi no muri metero magana abiri (200 m) uvuye ku nkombe z’ibiyaga; kubaka mu masoko y’amazi, imigezi, inzuzi n’ibiyaga no mu nkengero zabyo mu ntera ya metero icumi (10 m) uvuye ku migezi na metero mirongo itanu (50 m) uvuye ku biyaga.

Itegeko rigenga ibidukikije mu Rwanda risaba ko haba intera ihagije hagati y'amazi y'ikiyaga n'ibindi bikorwa
Hari ahagaragaye bimwe mu bikorwa byangiza ikiyaga cya Kivu
Bimwe mu bikorwa by'ubukerarugendo bitubahiriza amabwiriza agenga ibidukikije ku kiyaga cya Kivu byarahagaritswe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .