00:00:00 IGIHE NETWORK KN KINYARWANDA EN ENGLISH FR FRANCAIS

Uko imbaraga zatumye amashyamba yangijwe imyaka amagana asubiranywa mu myaka 10

Yanditswe na Ferdinand Maniraguha
Kuya 19 May 2022 saa 01:01
Yasuwe :

Mu mwaka wa 2015 ubwo Niyonzima Euphrasie yinjiraga mu Nkambi ya Mahama mu Karere ka Kirehe nk’impunzi yari iturutse mu Burundi, ako gace kari kameze nk’ubutayu, izuba ryirirwa ribica, buri munsi ibisenge by’inzu biguruka.

Ka gace kahoze ari ubutayu ubu kabaye nka pariki. Iyo ugeze mu Nkambi ya Mahama, ibiti ni byo bigaragara cyane kurusha inzu.

Iyo utembera iyo nkambi icumbikiye abasaga ibihumbi 50, ugenda uhura n’abato n’abakuru bugamye akazuba munsi y’ibiti imbere y’inzu zabo, bimwe birimo imbuto ziribwa nka avoka.

Uyu ni umusaruro w’imbaraga Leta y’u Rwanda yashyize mu gutera amashyamba no gusubiranya aho yahoze, gahunda yatangiwe mu mwaka wa 2009.

Kugeza ubu 30.4 % by’ubutaka bw’igihugu buteweho amashyamba, ni ukuvuga hegitari 724.695, nkuko bigaragazwa na Forest Cover Mapping Report yo mu 2019.

Ibi byagezweho cyane cyane mu gihe cy’imyaka icumi [2009-2019], aho ubuso buteweho amashyamba mu Rwanda bwiyongereyeho 20.7 %, hatabariwemo ayasazuwe.

Kongera ubuso buteweho amashyamba ni imwe mu ngamba u Rwanda rufite mu kwiyongerera ubudahangarwa ku ngaruka z’imihindagurikire y’ikirere, kongera ubukerarugendo, umusaruro n’imibereho myiza y’Abanyarwanda.

Buri mwaka Abanyarwanda batera miliyoni umunani z’ibiti mu rwego rwo kubungabunga ibidukikije.

Ni umushinga watangijwe mu 2011 ugamije gufasha u Rwanda kuba igihugu gifite ubukungu bwihagazweho ariko butangiza ibidukikije mu 2050.

U Rwanda ni kimwe mu bihugu bya mbere byashyize mu bikorwa Bonn Challenge, gahunda yari igamije gusubiranya hegitari miliyoni 150 zahozeho amashyamba akaza kwangizwa ku Isi, zigasubiranywa bitarenze 2020.

Iyo gahunda kandi itanga umukoro wo gusubiranya hegitari miliyoni 350 z’amashyamba aho yahoze bitarenze 2030.

Mu mwaka wa 2011 ni bwo u Rwanda rwiyemeje kuba rwasubiranyije hegitari miliyoni ebyiri zahozeho amashyamba kandi 2020 byari byaragezweho.

Ibi bice biteweho amashyamba mu Rwanda bigira uruhare rukomeye mu gufasha igihugu guhangana n’imihindagurikire y’ikirere, kurwanya imirire mibi n’ibindi.

Niyonzima Euphrasie utuye mu Nkambi ya Mahama, ni umwe mu itsinda ry’abakorerabushake ba World Vision bashinzwe gutubura ingemwe z’ibiti biterwa muri iyo nkambi no mu nkengero zayo, kuko yamaze kubona akamaro k’ibiti mu buzima bwabo.

Ati “Ubu ibiti byabaye byinshi bitwikiriye inkambi, nta muyaga ugitwara amabati, abantu babona akayaga. Mu nkambi hari amavoka ariko ni make gusa aho byageze mbere ubu bamwe batangiye kuzirya. Twiteze ko imirire mibi izagabanuka, nta bana bazongera kurwara bwaki kuko ibiti ni byinshi.”

Igihugu gikize ariko kitangiza ibidukikije

U Rwanda rwatangiye icyerecyezo cy’imyaka 30 kizageza mu 2050. Muri iki gihe u Rwanda rushaka kuzaba ruri mu bihugu bikize ku Isi ariko kikagumana umwimerere wacyo wo kubungabunga ibidukikije, mu kwirinda ingaruka z’imihindagurikire y’ibihe.

Kimwe mu bizafasha muri iyo gahunda, harimo gukomeza gutera amashyamba no gusazura ashaje, ari nako kurengera ibidukikije bishyira mu igenamigambi ry’imijyi n’ahandi hantu hahurira abantu benshi mu Rwanda.

Mu gishushanyombonera gishya cy’imikoreshereze y’ubutaka, gitegeka imijyi yose y’u Rwanda n’udusantere guteganya ahantu hahariwe guterwa ibiti n’ibikorwa bitangiza ibidukikije.

Mu kwirinda ko haterwa ibiti bibonetse byose, hashyizweho ibigo bibiri bituburirwamo imbuto z’ibiti (Tree Seed Centres) muri Gatsibo na Huye.

Ibi bigo bifasha mu kubungabunga amashyamba, gushyiraho uburyo bwo guteka butangiza ibidukikije no kongera ingemwe zifite umwimerere.

Ibi bigo byitezweho gufasha u Rwanda kongera ubuso buteweho amashyamba, gusazura ashaje n’ibindi.

Gusazura amashyamba ashaje, ni kimwe mu byafashije u Rwanda gukomeza kuba ku isonga mu kurengera ibidukikije

Guverinoma kandi yashyizeho uburyo bwihariye bw’imicungire y’amashyamba, hifashishijwe abikorera.

Mu mwaka wa 2019, Minisiteri y’Ibidukikije yatangije uburyo bwiswe (Private Forest Management Units). Kuri ubu hegitari 23.456,15 zingana na 38.4 % by’amashyamba ya Leta acungwa n’abikorera.

Kongera ubuso bwa pariki mu guteza imbere ubukerarugendo

Nubwo intego yo gutera amashyamba n’ibiti byinshi ari ukubungabunga ibidukikije, Leta y’u Rwanda ishaka ko binabyazwa umusaruro, bikungukira ababikora.

Ubukerarugendo gakondo bw’u Rwanda ni za pariki kandi umutungo wazo wa mbere ni inyamaswa n’amashyamba. Ibyo byatumye higwa uburyo bwihariye bwo gukomeza kubungabunga izo pariki igihugu gifite ari nako aho bishoboka zongerwa.

Pariki Gishwati-Mukura ni imwe muri pariki ziherutse guhangwa igamije kurengera ishyamba kimeza n’inguge ziribamo mu Bungerazuba bw’igihugu. Ni ishyamba rigizwe n’ibice bibiri, harimo irinini ariyo rya Mukura na Gishwati.

Iri shyamba riri ku misozi igabanya amazi ajya mu ruzi rwa Congo n’agana mu Mugezi wa Nil.

Pariki ya Mukura-Gishwati ni yo nshya iheruka gutahwa mu Rwanda. Icumbikiye urusobe rwinshi rw'ibinyabuzima n'ibimera biboneka hake

Urwego rw’Igihugu rw’Iterambere (RDB) ruri gushyiraho gahunda igamije kurengera urusobe rw’ibinyabuzima no guteza imbere ubukerarugendo muri iyo pariki.

Muri uwo mujyo wo kwita kuri za Pariki kandi u Rwanda rwatangiye gahunda yo kwagura Pariki y’Ibirunga mu rwego rwo kubungabunga urusobe rw’ibinyabuzima rubamo nk’ingagi zo mu misozi.

Iyi pariki biteganyijwe ko izongerwaho kilometero kare 37.4, ni ukuvuga ko iziyongera ku kigero cya 23 %. Bizafasha gukomeza kubungabunga iyi pariki yasi isanzwe ifite ubuso bwa kilometero kare 160.

Byitezwe ko bizongera umubare w’ingagi zibamo ku kigero kiri hagati ya 15 na 20 %, kandi bikagabanya umubare w’abana b’ingagi bapfa bakiri bato ho 50 %.

Bizafasha kandi guteza imbere ubuzima bw’abaturiye Pariki no gufasha abayisura kurushaho kuryoherwa n’ibyiza biyitatse.

RDB iherutse gutangaza ko uyu mushinga wo kwagura Pariki y’Ibirunga, witezweho gutwara miliyoni 255$, ni ukuvuga miliyari zigera kuri 260 Frw.

Uru rwego ruvuga ko iki gikorwa kizatuma abasura pariki barushaho kuryoherwa n’ibyiza biyirimo.

Pariki y’Ibirunga izaba ifite akarere k’ubuhumekero kangana na hegitari 6620 kazajya gatandukanya aho abaturage batuye na pariki. Ibi bizagabanya 80% by’ibibazo abaturage bagiranaga n’inyamaswa zo muri pariki nko kubonera n’ibindi.

RDB itangaza ko uyu mushinga uzongera 20% ku mafaranga yinjizwa n’ubukerarugendo bwo gusura ingagi zo mu Birunga.

Guverinoma y’u Rwanda ikomeje gahunda yo gutera amashyamba hifashishijwe uburyo butandukanye nk’Umuganda n’ibindi.

Biteganyijwe ko uyu mwaka hazaterwa ibiti bishya miliyoni 43 harimo iby’imbuto ziribwa.

Abayobozi mu nzego zitandukanye bakunze kwifatanya n'abaturage batera ibiti mu gihe cy'Umuganda Rusange
Ibiti by'imbuto biri mu byo u Rwanda rushyiramo imbaraga
Pariki y'Ibirunga nk'imwe mu zicumbikiye urusobe rw'ibinyabuzima igiye kwagurwa
Hafi y'Umugezi w'Akagera mu nkengero z'Inkambi ya Mahama hatewe ibiti bituma hahora hatoshye
Ishyamba rya Arboretum muri Kaminuza y'u Rwanda Ishami rya Huye, rifatwa nk'ibihaha bigaburira umwuka Umujyi wa Huye wose
Ishyamba rya Muyira-Kibilizi muri Nyanza rituma ako gace gahorana amafu ibihe byose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .