Uku gukumira amacupa ya palasitiki kwatangijwe na Minisiteri y’Ibidukikije mu gihe hitegurwa kwizihiza umunsi mpuzamahanga w’ibidukikije, ku wa 5 Kamena ariko nta tegeko rihari, ni ubukanguramabaga.

Mu gihe yaba mu biro no mu nama wasanganga amacupa y’amazi ateretse imbere y’abayitabiriye, bigiye guhinduka hajye hagaragara ibirahuri nubwo nta tegeko rica ayari asanzwe rirasohoka.

Minisitiri w’Ibidukikije, Dr. Biruta Vincent, uri ku isonga ry’iyi gahunda nshya, kuri Twitter yatambukije ubutumwa bugira buti “Ndashishikariza buri wese kwifatanya natwe mu gukumira ihumanya ry’ibidukikije riterwa na za palasitiki. Gukoresha ibikoresho bya palasitiki nk’amacupa, ibikombe, imiheha, amasahani ... byangiza ibidukikije. Uburyo bwabisimbura burahari.”

Iyi Minisiteri yavuze ko bashishikariza ibigo byose gushyira mu biro za ‘water dispensers’, bakajya banywesha amazi ibirahuri cyangwa udukombe dukoreshwa rimwe.

Nubwo nta tegeko rica amacupa ya palasitiki, REMA nayo kuri Twitter yagize iti “Nta cupa na rimwe ry’amazi rizongera kugaragara mu nama cyangwa mu biro. Turashishikariza inzego zose n’imiryango kureka gukoresha ibikoresho bya palasitiki. Dufatanye turwanye ihumanya riterwa na palasitiki.”

Minisitiri w’Ubutabera, Johnston Busingye, nawe yashimiye Minisitiri Biruta ku guca amacupa ya palasitiki, nawe ahita agaragaza ko muri minisiteri ayobora agiye kubigenza atyo.

Yagize ati “Igitekerezo cyiza Bwana Biruta. Minisiteri y’Ubutabera n’inzego ziyishamikiyeho bigiye gukurikiza urugero rwawe.”

Nubwo inzego zatangiye guha akato ibikoresho bya palasiti, hari amakuru ko haba hari no gutegurwa itegeko ribica.

Mu nama no mu biro nta cupa rya palasitike ryifuzwamo, ni ukunywera mu birahuri

REMA irifuza ko mu biro hashyirwamo za ‘water dispensers’