00:00:00 IGIHE NETWORK KN KINYARWANDA EN ENGLISH FR FRANCAIS

Hegitari 400 z’amashyamba zimaze gusazurwa mu mushinga Green Gicumbi

Yanditswe na Claude Bazatsinda
Kuya 10 Kamena 2021 saa 07:11
Yasuwe :
0 0

Ikigega cy’Igihugu cy’Ibidukikije, Fonerwa, ku bufatanye n’Akarere ka Gicumbi n’abandi bafatanyabikorwa babo, bavuga ko mu mezi 18 ashize bakora umushinga wiswe Green Gicumbi, bamaze gusazura amashyamba ari ku buso bwa hegitari 400 yari atagitanga umusaruro ukwiye.

Nyuma yo kubona ko Akarere ka Gicumbi kari mu tw’imbere mu Gihugu twibasirwa n’ibiza bikomoka ku mihindagurikire y’ibihe n’imiterere y’imisozi, Leta y’u Rwanda ibinyujije muri Fonerwa ku bufatanye na Green Climate Fund, batangije umushinga Green Gicumbi ufite intego yo kurengera ibidukikije.

Bamwe mu baturage bafashijwe mu kuvugurura amashyamba yabo, bavuga ko mbere uyu mushinga ukiza babanje kutawumva neza nyamara batarabonaga umusaruro mu mashyamba bari bafite.

Mbarushimana Aloys wo mu Murenge wa Byumba mu Kagari ka Gacurabwenge wavugururiwe ishyamba ku musozi wa Bishyita yagize ati" Aya mashyamba ubundi abenshi twayarazwe na ba sogokuru kuko ibishyitsi wabonaga byanamye ryari ryarashaje. Twakuragamo ibiti bito cyane by’imishingirizo.

“Mbere baza kutubwira ngo tuvugurure twabanje kumva ko bagiye kudutwarira ishyamba, nyuma baradusobanuriye turabyumva kugeza ubwo banaduhayemo akazi ari naho nakuye amafaranga nishyuye mituweli nkaguramo n’ihene. Ubu nibwo tumaze kubona akamaro karyo kuko ibiti bateye bikura nk’imibyare urabona bishimishije kandi n’ishyamba riracyari iryacu”.

Mukamana Vestine na we yagize ati " Mbere hazaga amazi y’imvura ava mu Mujyi agakushumukana byose akabiroha ipfo, agasenyera abantu agataba n’ibihingwa byo mu gishanga. Ibiti wasangaga bicucitse hakeraho duto cyane. Batwigishije gukora amaterasi ku buryo iyo imvura iguye amazi agumamo akagirira ibiti akamaro. Ubu tuzi kurengera iri shyamba kuko turarikorera neza kandi igihe nikigera tuzasarura ibiti byiza.”

Umuyobozi w’umushinga Green Gicumbi muri Fonerwa, Kagenza Jean Marie Vianney, avuga ko abaturage b’i Gicumbi mbere batari bazi akamaro ko gusazura amashyamba, ku buryo no ku yitaho byari ikibazo.

Ati “Wasangaga abaturage akenshi babyinubira, turabasobanurira, turabigisha none ubu barimo baravuga ibyiza bayabonyemo mu gihe gitoya. Twabahaye ibiti bikura vuba ku buryo igiti kikamara amezi atandatu gifite metero ebyiri. Ubu iyo bagiye gusazura barabirwanira, duteganya gusazura amashyamba kuri hegitari zirenga 350 muri iyi mpeshyi"

Umuyobozi w’Akarere ka Gicumbi, Ndayambaje Felix, yavuze ko hegitari zigera kuri 400 y’amashyamba yari yarangiritse zimaze gusazurwa kandi ko bazakomeza gufasha abo baturage gukurikirana ayo mashyamba kugira ngo atange umusaruro wifuzwa.

Yagize ati “Tuzakomeza kuba abaturage hafi tunabafasha kuyitaho ku buryo yazatanga umusaruro uteganyijwe. Gahunda yo gukomeza kuvugurura ayo mashyamba ashaje izakomeza kugeza havuguruwe ari kuri hegitari zigera kuri 23 000”.

Akarere ka Gicumbi gafite amashyamba ku buso bwa hegitari 23 000. Mu myaka ibiri iri imbere barateganya byibura gusazura hegitari zigera ku 1500.

Umushinga wa Green Gicumbi watewe inkunga ya miliyoni 32 z’amadolari ya Amerika yatanzwe n’Ikigega gitera inkunga imishinga yo guhangana n’Imihindagurikire y’Ibihe (GCF). Ni inkunga yo gushyira mu bikorwa umushinga wo kubakira ubudahangarwa abaturage bo muri ako karere ku guhangana n’ingaruka zikomoka ku mihindagurikire y’ibihe, guteza imbere ubuhinzi bwihanganira imihindagurikire y’ibihe, imiturire itangiza ibidukikije n’ibindi bikorwa byita ku kurengera ibidukikije.

Abaturage batangiye guhabwa ibiti bishya kandi biri gutanga umusaruro
Nubwo byatangiye batabyumva, kuri ubu abaturage bari mu ba mbere bishimira umushinga Green Gicumbi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .