00:00:00 IGIHE NETWORK KN KINYARWANDA EN ENGLISH FR FRANCAIS

Ikimoteri cya Nduba kimaze gushorwamo hafi miliyari 6 Frw, cyateje impagarara muri PAC

Yanditswe na Kanamugire Emmanuel
Kuya 17 Nzeri 2021 saa 11:00
Yasuwe :
0 0

Igenzura ryakozwe muri Werurwe 2021, ryagaragaje ko ikimoteri cya Nduba kitaratanga umusaruro cyari cyitezweho kuko kigiteza ibibazo abagituriye ndetse imyanda igikusanyirizwamo itarabasha gutunganywa ngo ibyazwe ifumbire n’ingufu nk’uko byari biteganyijwe.

Mu rwego rwo kunoza imicungire y’imyanda mu Mujyi wa Kigali mu buryo butabangamiye ibidukikije n’ubuzima bw’abaturage, ikimoteri cy’imyanda cyimuwe i Nyanza muri Kicukiro kijyanwa i Nduba muri Gasabo mu 2012.

Ikimoteri cya Nduba gifite hegitari 52,6 harimo 28,6 ziri gukoreshwa na 24 zo kucyaguriraho. Cyakira toni zirenga 500 z’imyanda ikomeye na metero kibe 150 kugeza kuri 200 z’imyanda yoroshye yo mu bwiherero.

Kuva 2016 kugeza muri Werurwe 2021, imicungire y’ikimoteri cya Nduba imaze gutwara 5.690.402.136 Frw, harimo 3.521.923.535 Frw yatanzwe n’Umujyi wa Kigali na 2.168.478.601 Frw yatanzwe na WASAC.

Imicungire y’ikimoteri cya Nduba iri mu maboko y’Umujyi wa Kigali nubwo WASAC itanga ubufasha mu bya tekiniki n’ubw’amafaranga igihe bibaye ngombwa.

Nubwo bimeze bityo, haracyagaragara ibibazo birimo kudashyira mu bikorwa umushinga ujyanye no kubyaza umusaruro imyanda igakurwamo ingufu n’ifumbire, kutubaka ikimoteri kigezweho n’ahatunganyirizwa imyanda nk’uko byari byemejwe mu 2016.

Kugeza ubwo igenzura ryakorwaga muri Werurwe 2021 iki kibazo cyari kitarakemuka.

Ibindi ni ibijyanye no kutagira igenamigambi ry’imicungire y’imyanda ikomeye n’imyanda yoroshye ndetse n’iteganyabikorwa ry’imicungire y’ikimoteri ritanoze, ikibazo kiva mu 2016 nk’uko igenzura ryakozwe uwo mwaka ryerekanye ko ritari ryakozwe mbere yo gutangira site ya Nduba.

Hari kandi kutagira uburyo bwo gucunga amazi aza mu kimoteri aho hari umwanda wamanukaga umusozi ukagera mu kabande abaturage bakavoma. Mu byagombaga gukorwa harimo no kugeza amazi meza ku baturage baturiye ikimoteri mu rwego rwo kwirinda ko bakoresha amazi yanduye.

Kudataba imyanda ikomeye no kudapfundikira imyanda yoroshye

Mu gihe imyanda ikomeye iba igomba gushyiraho igitaka kuri santimetero 10 uko igenda igezwa ku kimoteri, na ho imyanda yoroshye igashyirwa mu byobo, igenzura ryagaragaje ko imyanda ikomeye yagiye itabwa rimwe mu kwezi kandi bikwiye gukorwa buri munsi.

Imyanda yoroshye iracyashyirwa mu byobo, kompanyi yitwa PIVOT yari ifite umushinga wo gukoramo “briquettes” yananiwe gushyira mu bikorwa uyu mushinga.

Kutagira ahantu hagenzurirwa imyanda igeze ku kimoteri cya Nduba

Mu gihe imyanda iba igomba gupimwa no kugenzurwa, igenzura ryagaragaje ko bidakorwa. Mu igenzura ryo muri Werurwe 2021, byagaragaye ko bandika gusa imodoka zizanye imyanda ntibandike ingano n’ubwoko bw’imyanda bityo mu gihe haba hari imyanda ishobora kuba yateza impanuka ntibimenyekane ikihagera.

Amabwiriza ya RURA avuga ko ikimoteri kigomba kuba kizitiye ariko ikimoteri cya Nduba kizitiye imbere gusa. Nubwo Umujyi wa Kigali wagaragaje ko washyizeho abashinzwe umutekano bakirinda, ngo hakwiye kuba hari uruzitiro ku buryo nta muntu winjiramo atabiherewe uburenganzira.

Abahagarariye Umujyi wa Kigali batanze ibisobanuro kuri PAC batari kumwe na yo imbonankubone

Ku rundi ruhande uruhare rwa REMA mu micungire y’ibimoteri ntirugaragara mu gihe REMA ari rwo rwego rufite mu nshingano ibijyanye no kugenzura iyubahirizwa ry’amabwiriza ajyanye no kubungabunga ibidukikije.

Amabwiriza ya REMA kandi avuga ko ikimoteri gikwiye kugira amatiyo akusanya imyuka ya methane na dioxide de carbone ariko kuri ubu hari imyuka ituruka mu kimoteri ikangiza ibidukikije.

Imyanda yoroshye ishyirwa mu byobo yanduza amazi yo mu butaka kandi bishobora no gutera impanuka, ndetse hagaragaye uburyo butanoze ku bijyanye no guca imiyoboro ishobora kunyuramo amazi mabi ava mu myanda.

Inyigo yo gukemura ibibazo byose….

Umuyobozi w’Umujyi wa Kigali, Rubingisa Pudence, yemeye ko batashoboye gushyira mu bikorwa inama zavuye ku bugenzuzi bwakozwe ku kimoteri cya Nduba mu 2016, harimo no gukora inyigo y’imicungire y’imyanda asaba imbabazi ko bitakozwe nk’uko byari byifujwe.

Yavuze ko hari aho bagiye bagira intege nke cyangwa ubushobozi ndetse n’ubumenyi buke.

Ku bufatanye na WASAC ndetse na Minisiteri y’Ibikorwaremezo, Umujyi wa Kigali wakoze inyigo izakemura ikibazo cy’imicungire y’ikimoteri cya Nduba. Kuri ubu bageze ku rwego rwo gushaka umushoramari uzayishyira mu bikorwa.

Depite Bakundufite Christine (hagati) yibajije uwaguze imashini yo gutwika imyanda azi ko idakenewe

Umujyi wa Kigali uvuga ko watangiye kwigisha abaturage ibijyanye no kuvangura imyanda kugira ngo ikiguzi byasabaga umuturage utwarirwa imyanda kigabanuke.

Mugabo John ushinzwe imicungire y’imyanda mu Mujyi wa Kigali, ati “Navuga ko iyi nyigo ifite ibice bibiri, ibibazo bigaragazwa n’imicungire mibi y’imyanda no kutagira ikimoteri nyirizina bigiye gukemuka, Ikimoteri kizaba gifite ibikorwa byose bijyanye no gucunga imyanda, ibibazo by’amazi, ibya gaz, no kwangiza byose bituruka ku myanda n’amasazi byose bizaba bikemutse kuko tuzaba dufite ikimoteri cyujuje ibisabwa byose.”

Icyo kimoteri gishya kizatangira gukora ku mugaragaro mu 2023.
Ubu ikiri gukorwa ni uguhindura imikoreshereze y’igisanzwe hagabanywa ubwandu n’ibikorwa bibi bishobora kuba bituruka ku micungire mibi yacyo, hashingiwe kuri raporo yakozwe na REMA.

Mu 2006 icyiciro cya kabiri kizatangira kizaba gishingiye ku kubyaza umusaruro imyanda ari na bwo hazaba hari imashini ziyivangura ibora ikavanwamo ifumbire, indi ikavanwamo ibindi bikoresho.

Iyi nyigo biteganyijwe ko ishyirwa mu bikorwa ryayo riva ubu rikazageza mu 2050. Kuri ubu ibyatangiye gukorwa ni ugutwikira imyanda hakoreshejwe igitaka birinda ko amazi atemba mu baturage no kurwanya amasazi, gutera ibiti iruhande rw’ikimoteri, gusiba ibyobo byarekagamo amazi n’ibindi.

Nyamara haracyari ikibazo cy’abakozi bakora mu kimoteri badafite ubwirinzi bwa ngombwa no kuba inzego zigomba gukora igenzura ry’imyanda yinjira zirimo RURA nta bugenzuzi zikora usibye kwandika ibiranga imodoka yinjiye nk’uko Depite Mukabalisa Germaine yabivuze.

Ati "None se icy’abakozi bo mu kimoteri batagira ibikoresho by’ubwirinzi kuva cyajyaho na byo bizategereza 2023, ko bidasaba ingengo y’imari nyinshi kubera iki bitakorwa vuba?"

Ikiguzi cyo gutwara ibishingwe ntikizaremerera abaturage?

Rubingisa yavuze ko igiciro gisabwa umuturage ngo atwarirwe ibishingwe gishingira ku byiciro by’ubudehe ku buryo utishoboye ashobora kwishyurirwa na leta ariko RURA ijya kubyemeza habanje gusuzumwa niba bijyanye n’amikoro y’abaturage.

Kubera ko imyanda izajya ivangurirwa mu ngo, icyitezwe ni uko umuturage azaba asabwa imifuka myinshi kugira ngo buri bwoko bw’imyanda bubone aho bushyirwa.

Umuyobozi w’agateganyo wa WASAC, Umumararungu Gisèle, yavuze ko ibiciro byateganyijwe ku buryo bitazajya birenga hagati ya 1,7% na 2% by’amafaranga umuturage yinjiza.

Kuri ubu hari umushinga wo kugeza amazi ku baturiye ikimoteri ku buryo mu mpera z’uku kwezi bazabona amazi hategerejwe ko ibigega byayo byuzura.

Umuyobozi wa WASAC, Umumararungu Gisele yavuze ko gahunda nshya yo gukusanya ibishingwe mu ngo izaba ijyanye n'amikoro y'abaturage

Hagati aho hari amateka ya Minisitiri atarajyaho yagombaga kugendera ku itegeko ryo kubungabunga ibidukikije biteza icyuho mu mategeko.

Ayo mateka ni ajyanye n’imicungire y’imyanda ishobora guteza ibibazo n’ikomoka ku bikoresho by’ikoranabuhanga, inyandiko z’agateganyo zoherejwe muri Komisiyo ishinzwe kuvugurura amategeko ngo izitangeho ibitekerezo zibone kujya mu zindi nzego nk’Uko Umumararungu yakomeje abisobanura.

Abadepite bananiwe kumvikana n’Umujyi wa Kigali ku mashini itwika imyanda yatwaye miliyoni 180 Frw ikaba imaze imyaka irindwi idakoreshwa

Iyi mashini (incinerator) yatwaye 180.748.126 Frw harimo 151.911.358 Frw yo kuyigura no gukora installation na 28.836.768 Frw yo kuyubakira, ubwo hakorwaga igenzura, Umugenzuzi Mukuru w’Imari ya leta, yasanze kuva yagurwa mu 2014 itarabyazwa umusaruro.

Umuyobozi w’Umujyi wa Kigali, Rubingisa yavuze ko iyo mashini koko itabyazwa umusaruro, mu mbogamizi zagaragaye hakaba harimo ko imyanda igomba gutwikirwamo abantu batarabasha kuyisobanukirwa ndetse n’ababikora batarabyigishwa, ibyo avuga ko ari intege nke zabayeho.

Yavuze ko bafashe icyemezo cyo kuyigurisha cyangwa kuyikodesha.

Ati "Ubu twatangiye ibiganiro n’abantu bashobora kuyifata tukaba dufite amahitamo abairi arimo kuyikodesha buri kwezi cyangwa tukayigurisha n’abantu bashobora kuyikoresha."

Depite Uwineza ati " Imyaka irindwi irashize ’incinerator’ ntibyazwa umusaruro, ubwo ntureba amafaranga yaguzwe [miliyoni 180 Frw], turibaza ngo ubungubu twarajugunye, ubwo mwebwe nk’abantu bareberera leta mu Mujyi murumva turi bubyemere? Niba hari ikintu tugiye gupfa kuri iyi raporo turongera dupfe ’incinerator’. Hari ukuntu uvuga ibintu nkumva ni ibisanzwe, nabuze igishya, ntabwo ibi bintu turi bubyumvikaneho."

Depite Bakundufite ati " Ndabona babyoroheje cyane ahari agaciro k’iyi incinerator ntabwo bakazi. Miliyoni 180 ni amafaranga menshi. Mu bisobanuro batanze bavuze ko basanze icyo bari bayiguriye kitagikenewe, ubu yaguriwe iki? Umuntu wari wayiguze yagirango ayikorshe iki niba itari ikenewe?"

"Ubu twicare aha ngo barimo gushakisha uwo bazayiha; iyo mubaha amafaranga mbere aho kubagurira incinerator mwarangiza ngo murashaka abo muri buyihe, nta nubwo nabura kuvuga ko murimo mushaka abo muyihambiraho."

Depite Mukabalisa yavuze ko iyo Umujyi wa Kigali ugira ubushake iyi mashini iba yarahawe abayikoresha kuko hari ibigo nderabuzima n’ibitaro byinshi byagaragaje ikibazo cy’uko bizikeneye.

Perezida na Visi Perezida ba PAC, Muhakwa Valens na Uwineza Beline
Visi Perezida wa PAC, Depite Uwineza Beline yavuze ko atiyumvisha uko imashini yatwaye akayabo imara imyaka irindwi idakoreshwa
Abahagarariye inzego zitandukanye bitabira ibikorwa bya Komisiyo ya PAC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .