00:00:00 IGIHE NETWORK KN KINYARWANDA EN ENGLISH FR FRANCAIS

Pariki y’Ibirunga igiye kwagurwa mu mushinga uzatwara miliyari 260Frw

Yanditswe na Umwali Zhuri
Kuya 11 April 2022 saa 09:18
Yasuwe :

Ikigo cy’Igihugu cy’Iterambere (RDB) cyatangaje ko u Rwanda rwatangiye umushinga wo kwagura Pariki y’Ibirunga, witezweho gutwara miliyoni 255$ ni ukuvuga miliyari zigera kuri 260Frw, kugira ngo ingagi zibarizwamo zibeho zisanzuye.

RDB ivuga ko iki gikorwa kizagirira akamaro urusobe rw’ibinyabuzima byo muri pariki kikanazamura imibereho y’abaturage bakikije pariki. Kizatuma kandi abasura pariki barushaho kuryoherwa n’ibyiza biyirimo.

Nibura pariki iziyongeraho 23 ku ijana, bivuze ko ubuso bwayo buziyongeraho kilometero kare 37,4 (hegitari 3 740). Pariki y’Ibirunga izaba ifite akarere k’ubuhumekero kangana na hegitari 6 620 kazajya gatandukanya aho abaturage batuye na pariki. Ibi bizagabanya 80% by’ibibazo abaturage bagiranaga n’inyamaswa zo muri pariki nko kubonera n’ibindi.

RDB itangaza ko uyu mushinga uzongera 20% ku mafaranga yinjizwa n’ubukerarugendo bwo gusura ingagi zo mu Birunga.

U Rwanda rwihaye intego yo kumenyekanisha ubukerarugendo bwarwo, aho rushishikariza abantu kurusura ngo barebe ibyiza rufite birimo n’ingagi zo mu misozi ziboneka hake cyane ku Isi.

The New Times yanditse ko umushinga wo kwagura Pariki y’Ibirunga uzakorwa mu byiciro bibiri, aho icya mbere cyibanze ku nyigo zatangiye mu 2018, icya kabiri kikaba kizakorwa mu mwaka w’ingengo y’imari 2022/2023, kikazatwara imyaka itanu.

RDB isobanura ko Pariki y’Ibirunga ubu yari ifite kilometero kare 160, ikaba yari ntoya ugereranyije n’urusobe rw’ibinyabuzima ruyirimo. Iyi ni yo mpamvu hafashwe icyemezo cyo kuyongeraho izindi kilometero kare zirenga 37.

Iki kigo gitangaza ko ingagi zo mu Birunga ziyongereyeho 26 ku ijana, ziva kuri 480 mu 2010 zigera kuri 604. Kuba pariki ari nto, bituma ingagi zitisanzura dore ko zibanamo n’ibindi binyabuzima. Kuyagura bizongera hagati ya 15 na 20 ku ijana by’ingagi zibamo, bigabanye 50 ku ijana by’impfu z’abana b’ingagi.

Kwagura Pariki y’Ibirunga bizatuma ingo 3400 zimurwa zituzwe ahandi. RDB ivuga ko aba baturage bazabona impozamarira y’imitungo yabo n’inzu mu mudugudu w’icyitegererezo. Bazabona kandi ubutaka bwo guhinga.

Pariki y'Ibirunga ibamo ingagi igiye kwagurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .