Umuyobozi w’Ikigo cya Leta gishinzwe kubungabunga ibidukikije, Dr.Rose Mukankomeje, aherutse kubitangaza ubwo u Rwanda rwifatanyaga n’Isi yose mu kwizihiza umunsi mpuzamahanga w’ibidukikije.
Dr. Mukankomeje yavuze ko abangiza ibidukikije bahanwa hatitawe ku kigero barimo cyangwa imyanya bafite mu buyobozi, ndetse ko hari bamwe bahanwe yirinze kuvuga amazina yabo.
Yagize ati: “Mu bidukikije turabahana. Bose barahanwa tukabigeza aho bigomba kugera, ntabwo uyu munsi ndi buvuge abahanwe ariko barahari banakomeye bagiye bava no mu myanya bari barimo kubera ibyaha byo kwangiza ibidukikije.”
Dr. Mukankomeje yavuze ko abanyamategeko basobanurirwa ko umuntu wangije ibidukikije akwiye guhanwa kuko bigira ingaruka ku bandi.
Yagize ati “ Ntabwo twaba hose niyo mpamvu twigisha […] iyo icyaha kibaye ni ngombwa ko abashinjacyaha n’abagenzacyaha basobanukirwa ko iyo wangije hano bigira ingaruka n’ahandi.”
Bimwe mu bikorwa byangiza ibidukikije birimo gutema amashyamba, gushimuta inyamaswa, gukoresha amashashi n’ibindi.
Polisi y’u Rwanda ifatanyije na REMA na Minisiteri y’umutungo kamere n’Ishami ry’Umuryango w’Abibumbye rishinzwe iterambere (UNDP) baherutse gushyiraho agashami gashinzwe kurwanya no gukumira ibyaha bijyanye no kwangiza ibidukikije (Environmental Protection Unit-EPU), kakazaba kabarizwa mu Ishami rya Polisi y’u Rwanda ry’Ubugenzacyaha (CID).
TANGA IGITEKEREZO