Ihuriro ry’ibihugu byasinye amasezerano ya Washington ku kurwanya icuruzwa ry’ibinyabuzima (The Convention on International Trade in Endangered Species of Wild Fauna and Flora - CITES), ryashyize bimwe mu bihugu byo mu muryango w’Afurika y’Iburasirazuba - EAC ku rutonde rw’ibihugu biza imbere ku Isi mu kwica inzovu bikanagurisha amahembe yazo mu buryo butemewe.

Ibyo bihugu ni Kenya, Tanzania na Uganda byaje byiyongera ku bindi nka Malaysia, Vietnam, Philippines n’ibindi bijyanwamo ayo mahembe nka Thailand n’Ubushinwa.
The East African yanditse ko ibi bihugu bya EAC biri ku rutonde kuko bigaragaramo cyane ubushimusi bw’inzovu z’Afurika no kuzica hagamijwe kugurisha amahembe yazo.

Igihugu kiza ku mwanya wa mbere muri byo ni Tanzania yahereye muri 2006 ifite inzovu zisaga ibihumbi 70 none zikaba zibarirwa mu bihumbi 40 gusa.
Tanzania ikurukirwa na Kenya yatakaje inzovu zisaga igihumbi mu myaka itatu ishize, inyuma haza Uganda isigaranye inzovu 5000 kandi zarigeze kugera ku bihumbi 20 mu myaka y’1960.

Ibi bihugu bya EAC cyane cyane birasabwa gushyiraho gahunda y’uko bigiye kurida ubwicanyi bukorerwa inzovu z’ibihugu bitarenze muri Werurwe 2014 kuko hazakurikira ibihano bijyanye no kurimbura urusobe rw’ibinyabuzima.

Abahagarariye amashyamba y’ibi bihugu basobanura ko iyi sura mbi itashyirwa ku bihugu bya EAC kuko bikorwa rwihishwa na bake bafite amasoko muri Aziya.

Raporo yakozwe na CITES igaragaza ko 68 by’abacuruza amahembe muri Aziya biyemerera ko umubare munini w’amahembe aboneka bitemewe ku isoko, akurwa muri Afurika.