Abafite imbuga za Internet basabwe guhitamo iziherwa na .RW mu guha ishema u Rwanda

Yanditswe na Ndayikunda Josué
Kuya 11 Ukwakira 2019 saa 11:46
Yasuwe :
0 0

Abakoresha imbuga za internet ziherwa n’indangarubuga zirimo .COM, .ORG, .NET n’izindi bashishikarijwe gukoresha .RW mu rwego rwo gukomeza guteza imbere umwimerere w’ibyo mu Rwanda.

Ibi byagarutsweho kuwa Kabiri tariki 8 Ukwakira 2019 mu nama yateguwe n’Ikigo gihagarariye abakoresha ikoranabuhanga no guteza imbere indangarubuga y’u Rwanda .RW (RICTA) ku bufatanye na Minisiteri y’ikoranabuhanga na Inovasiyo.

Iyi nama yari yitabiriwe n’ibigo bisaga 100 bisanzwe bifite imbuga ziherwa na .COM, .ORG, .NET n’izindi zitandukanye.

Intego nyamukuru muri iyi nama yari ugushishikariza abasanzwe bakoresha izindi ndangambuga gukoresha indangarubuga y’u Rwanda ya .RW.

Umunyamabanga uhoraho muri Minisiteri y’ikoranabuhanga mu itumanaho no guhanga udushya, Claudette Irere yasabye abitabiriye iyi nama gukoresha ibikorerwa mu Rwanda kuko nta wundi uzava hirya ngo abiteze imbere.

Ati “Nimwe mugomba guteza imbere serivisi n’ibikorerwa mu Rwanda kuko nta wundi uzava hirya ngo abikore. Uko iby’iwacu bikoreshwa ni nako ubukungu bw’igihugu bwiyongera.”

Umuyobozi wa RICTA, Grace Ingabire, yabwiye abitabiriye iyi nama ko ikigamijwe atari ukubangisha izindi ndangambuga bakoreshaga ahubwo ari ukubereka uburyo gukoresha indangarubuga y’u Rwanda .RW bifasha mu kurinda ubusugire bw’ibirango n’isura by’imbuga zabo no kwirinda ubujura n’igihombo cya hato na hato gishobora guterwa no gukoresha indangambuga mvamahanga.

Abitabiriye iyi nama babajije ibibazo bitandukanye ku gukoresha .RW nk’indangarubuga, aho bagiye bibaza ku bijyanye n’imikorere yayo, umutekano, kubika amabanga n’igiciro cyo kuyikoresha.

Umuyobozi wa RICTA, Ingabire Grace yabamaze impungenge abizeza ko umutekano w’imbuga ziherwa na .RW wizewe.

Indangarubuga ya .RW ubu ihagaze 12,000 Frw ku mwaka, naho izindi nto ziyishamikiyeho nka .ac.rw, .co.rw, .org.rw, .net.rw n’izindi ziri kuri 3000 Frw ku mwaka.

Mbere ya 2012, indangarubuga ya .RW yacungwaga n’umunyamahanga. Ibyasabwaga ngo uyishaka ayihabwe byari bigoranye ku buryo hari abakora ubushabitsi butandukanye n’ibigo byahitagamo gufata indangarubuga zo mu mahanga.

Nyuma hasabwe ko iyo ndangarubuga yajya itangirwa mu Rwanda, ishyirwa mu maboko ya RICTA guhera mu 2012 kugira ngo abayishaka bayibone mu buryo bworoshye.

Uburyo bwo kubona indangarubuga ya .RW bwarorohejwe ku buryo uyishaka ashobora kuyibona akoresheje ikoranabuhanga, akishyura yifashishije uburyo bwo kwishyura nka Mobile Money, Visa Card n’ibindi.

Imibare y’Ikigo gihagarariye abakoresha ikoranabuhanga no guteza imbere indangarubuga y’u Rwanda .RW (RICTA) igaragaza ko mu mazina y’imbuga za internet y’ibigo bisanga 20,000 bikorera mu Rwanda, 4529 ariyo aherwa na .rw.

Mu bigo bigera kuri 4200 bikoresha amazina atari akadomo RW, usanga byose hamwe bitanga nibura amadolari 63000$ buri mwaka, akabakaba miliyoni 59 Frw. Ni igihombo ku gihugu kuko ayo yakabaye yinjira mu Rwanda.

Umunyamabanga uhoraho muri Minisiteri y’ikoranabuhanga mu itumanaho no guhanga udushya, Claudette Irere yasabye abitabiriye iyi nama gukoresha ibikorerwa mu Rwanda kuko nta wundi uzava hirya ngo abiteze imbere
Umuyobozi wa RICTA, Grace Ingabire, yabwiye abitabiriye iyi nama ko ikigamijwe atari ukubangisha izindi ndangambuga bakoreshaga ahubwo ari ukubereka uburyo gukoresha indangarubuga y’u Rwanda .RW bifasha mu kurinda ubusugire bw’ibirango n’isura by’imbuga zabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza