Ishuri rya Life International Christian Academy [LICA] ryigisha abana bari mu myaka itandukanye, bagendeye kuri porogaramu mpuzamahanga yitwa Accelerated Christian Education (ACE).

Bitandukanye n’andi mashuri, abanyeshuri ntibigira ku kibaho, ahubwo buri mwana aba afite umwarimu umwitaho akumusobanurira bijyanye n’ikigero cy’ubumenyi bwe.

Ishuri rya LICA ni rimwe mu yagiranye ubufatanye n’ikigo cyigisha amasomo y’ikoranabuhanga, International Computer Driving Licence (ICDL) mu rwego rwo kwigisha abana bagahabwa amasomo ya mudasobwa bakiri bato.

Ku nshuro ya mbere iri shuri ryateguye irushanwa ryari rigamije gusuzuma ubumenyi abanyeshuri bafite kuri mudasobwa. Iri rushanwa ryibandaga ku gusuzuma umuvuduko bafite mu kwandikisha mudasobwa, gukoresha mudasobwa badakoresheje imbeba (mouse), kuvuga amazina y’ibikoresho bigize mudasobwa no kuyiteranya.

Muri buri cyiciro hagenda harushanwa abana babiri, abatsinze bagenerwa ibihembo birimo amakayi, amakaramu, imipira n’ibindi.

Bamwe mu bana bagaragaje ubuhanga budasanzwe ugereranyije n’ikigero cy’imyaka, barimo uwitwa Joshua Amabe w’imyaka 9 ubasha gucomeka ibikoresho byose bya mudasobwa ikabasha kwaka n’undi witwa Cyrus w’imyaka 5 nawe ubasha kuvuga atajijinganya amazina y’ibikoresho bya mudasobwa.