Liquid Telecom iherutse kwinjira ku isoko rya RDC yahinduye izina

Yanditswe na Bukuru JC
Kuya 29 Werurwe 2021 saa 12:33
Yasuwe :
0 0

Ikigo gitanga serivisi z’ikoranabuhanga, ‘Liquid Telecom’, cyahinduye izina cyitwa ‘Liquid Intelligent Technologies’ nyuma yo kongera umubare wa serivisi zacyo.

Liquid Intelligent Technologies itanga serivisi zirimo gukwirakwiza imiyoboro ya murandasi ndetse imaze kugeza ifite uburebure bwa kilometero 73.000 mu bihugu 14 ikoreramo birimo n’u Rwanda.

Kuri ubu iki kigo cyongereye serivisi zirimo izo kubika amakuru mu buryo
bw’ikoranabuhanga (Cloud service), izo gucunga umutekano wo kuri murandasi (cyber security) no kongera ikoranabuhanga rigezweho muri serivisi gisanzwe gitanga.

Guhuriza hamwe izi serivisi z’ikoranabuhanga bizatuma Liquid Intelligent Technologies igera ku bantu benshi bakeneye serivisi zayo, ndetse byoroshye itumanaho hagati y’abakozi b’icyo kigo ndetse n’abakiliya bacyo.

Iki kigo kandi giherutse gutangiza ibikorwa byacyo mu bihugu birimo Repubulika Iharanira Demokarasi ya Congo ndetse kiritegura kwinjira ku isoko ryo muri Nigeria, ibizatuma serivisi z’ikoranabuhanga zigera ku bigo by’abakorera n’ibya Leta bizifuza ku Mugabane wa Afurika.

Liquid Intelligent Technologies ifite imikoranire n’ibigo bikomeye mu by’ikoranabuhanga ku rwego rw’Isi, birimo Microsoft yo muri Leta Zunze Ubumwe za Amerika.

Umuyobozi Mukuru wa Liquid Intelligent Technologies, Nic Rudnick, yavuze ko ikoranabuhanga bakoze rizatanga umusaruro ufatika.

Yagize ati “Ishoramari dukora mu miyoboro yacu ndetse no kubika amakuru ku Mugabane wa Afurika, rifite ubushobozi bwo gukoresha ibikorwa remezo byacu mu gukwirakwiza ikoranabuhanga rigezweho ririmo kubika amakuru y’ikoranabuhanga (cloud computing), ubwenge bw’ubukorano (artificial intelligence) ndetse no kurinda ibitero bibera kuri murandasi (cyber security). Twishimiye kuzana ikoranabuhanga rishya ku isoko, kugira ngo ryiyongere ku bikorwa remezo byacu ndetse n’udushya tuzana ku isoko rya Afurika.”

Liquid Intelligent Technologies ni ikigo cyatangiye gukora mu mwaka wa 2005, kikaba gikorera mu bihugu 14 byo ku Mugabane wa Afurika, ndetse kikagira ububiko bw’amakuru mu mijyi irimo Cape Town na Johannesburg yo muri Afurika y’Epfo, Nairobi muri Kenya, Harare muri Zimbabwe n’i Kigali mu Rwanda.

Iki kigo gifite ubucuruzi bugabanyije mu byiciro umunani, birimo Liquid Networks, Liquid Business, Liquid Sea, Liquid Cloud, Liquid Cyber Security, Liquid Home, Liquid Innovation na Liquid Satellite, byose bitanga serivisi zikenerwa mu rwego rw’ikoranabuhanga.

Umuyobozi Mukuru wa Liquid Intelligent Technologies, Nic Rudnick, yavuze ko iki kigo kirajwe ishinga no kongera ishoramari ryacyo ku Mugabane wa Afurika
Liquid Telecom yahinduye izina nyuma yo kwagurira amarembo muri Repubulika Iharanira ya Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .