Ubushyamirane n’ubufatanye byaranze Bill Gates na Steve Jobs mu guteza imbere Ikoranabuhanga

Yanditswe na Iradukunda Serge
Kuya 20 Nzeri 2019 saa 01:19
Yasuwe :
0 0

Gukorana, gushyamirana n’ubucuti nibyo byaranze William Henry Gates III, uzwi nka Bill Gates, washinze Microsoft na Steven Paul Jobs (Steve Jobs) washinze Apple.

IGIHE yahisemo ku kuvira imuzingo amateka y’umubano w’aba bagabo babiri baranzwe n’ishyaka ryo guteza imbere ikoranabuhanga ryahinduye ubuzima bw’abatuye Isi.

Mu 1970, mbere y’ivuka rya mudasobwa nto tubona ubungubu byari bikiri inzozi ko umuntu ashobora gukora mudasobwa nto, kandi zifite imikorere iteye imbere, kuko izakoreshwaga muri iki gihe zari nini cyane ndetse zigakoreshwa na sosiyete zikomeye ku Isi, nta muntu ku giti cye wayitungaga.

Muri iyi myaka nibwo umusore muto w’i Seattle muri Washington, Bill Gates hamwe n’inshuti ye Paul Allen batangiye gukora porogaramu za mudasobwa bakiri mu mashuri yisumbuye, ndetse bakomeza no kubikora ubwo bigaga muri kaminuza ya Havard, kugeza mu 1975 ubwo bafataga umwanzuro wo kuva mu ishuri bagashinga Microsoft.

Ku rundi ruhande mu mujyi wa Palo Alto, muri Leta ya Calfornia hari irindi tsinda ry’abasore bato babiri Steve Jobs na Steve Wozniak nabo bari bafite urukundo rw’ikoranabuhanga, muri Mata, 1976 nyuma y’umwaka Microsoft ishinzwe nabo bashinga Apple, uruganda rukora mudasobwa na telefone zigezweho.

Mu ntangiriro Gates na Steve bari inshuti magara nubwo nyuma bagiye bashwana

Mu gihe Microsoft ya Bill na Paul yibandaga gukora porogaramu za mudasobwa zikagurishwa kuri sosiyete zakoraga mudasobwa, Jobs na Wozniak bo bahisemo gukora mudasobwa zabo ndetse mu 1977 bashyira hanze iyo bise ‘Apple II’ mudasobwa ya mbere yashoboraga gukoreshwa n’abantu ku giti cyabo.

Iyi mudasobwa yaragurishijwe cyane gusa Jobs na Mugenzi we ntibari bazi gukora porogaramu izwi nka "Beginner’s All-purpose Symbolic Instruction Code (BASIC).” Iki nicyo cyatumye begera Bill Gates ngo abafashe, umubano wabo utangirira aho.

Mu myaka ya 1970 Microsoft yungukaga amafaranga menshi aturutse mu gukorera Apple izi porogaramu.

Mu 1980 Apple yaramenyekanye cyane ndetse imikoranire yabo na Microsoft yari nta makemwa.

Uko guhangana byatangiye

Uwahoze ari umuyobozi muri Microsoft Jon Shriley yabwiye televiziyo ya Aljazeera ko kuba Microsoft yarashyize hanze ‘Windows’ porogaramu y’ibanze ya mudasobwa ariyo yabaye intandaro yo gucana umubano no guhangana hagati ya Microsoft na Apple.

Yagize ati “hari ukutemeranywa gukomeye igihe Windows yashyirwaga hanze. Mu bintu byose byabaye hagati y’izi sosiyete zombie, iki nicyo cyarakaje Apple cyane”.

Mu gihe cy’imyaka 10 porogaramu ya Windows niyo yari yiganje muri mudasobwa hafi ya zose zari ku masoko hirya no hino, iki gihe Microsoft yakubise inshuro Apple bisiga Bill Gates abaye umukire wa mbere ku Isi.

Umukozi mu nzu ndangamurage ya za mudasobwa, Bruce Damer, avuga ko uko uku gukubitwa inshuro na Microsoft byarakaje Steve Jobs atangira gushyamirana n’abandi bakozi muri Apple icyo gihe yari imaze kugira abandi banyamigabane, ndetse uku gushyamirana gusiga Steve Jobs yirukanwe muri sosiyete yashinze.

Ati “Byabaye nk’intambara hagati y’umuyobozi mukuru John Sculley na Steve Jobs, ndetse nyuma kuko Steve Jobs yari yarashyize igitutu ku bantu benshi byatumye arema abamurwanya, igihe akanama k’ubutegetsi katoraga sosiyete yose yahisemo ko badashaka Steve Jobs”.

Nyuma yo kwirukanwa, Steve Jobs yashinze indi sosiyete ayita NeXT gusa nayo ntiyamuhira. Nyuma y’imyaka icumi Steve Jobs agiye Apple nayo yatangiye guhomba cyane.

Ibi byatumye mu 1996 Steve Jobs agaruka. Robert Cringely, umunyamakuru ukurikiranira hafi ikoranabuhanga avuga ko Steve yagarutse yarahinduye imyumvire asigaye ashishikajwe n’ubucuruzi.

Yagize ati “ Bwa mbere kuri we yatangiye kwita ku gihombo n’inyungu, yatangiye kwita ku ntsinzi mu bucuruzi, yahindutsemo umushabitsi, umuntu atari yarigeze aba. Yatangiye kuba nka Bill Gates”.

Kuvuka kw’imikoranire mishya hagati ya Apple na Microsoft

Nyuma y’umwaka agarutse Steve Jobs yatangaje ubufatanye bushya na Microsoft burimo gushora miliyoni $ 150 muri Apple.Aha Steve Jobs yatangiye imishinga mishya irimo gukora iPod, iPhone na iPad.

Jon Shirley avuga ko Apple nyuma yo gutangira gukora ibi bikoresho bindi yacuruje cyane ubu akaba ari sosiyete ikomeye ugereranyije na Microsoft.

Ati “ ntibyari bikiri gukorera mu gicucu cya Bill Gates, Apple yarakomeye cyane, Apple ikora ubucuruzi muri iPhone kuruta ubwo Microsoft ikora mu bikorwa byabo, ubu akaba ariyo ibikorwa byayo bifite agaciro ku Isi’.

Nubwo baranzwe no guhatana ndetse rimwe na rimwe hakazamo kutumvikana, ubwo Steve Jobs yari arwaye mu mezi make mbere y’uko apfa, Bill Gates yaramusuye iwe mu rugo.

Abajijwe n’umunyamakuru wa televiziyo ya ABC icyo baganiye icyo gihe mbere y’uko yitaba Imana Bill Gates yagize ati “njye na we buri gihe twaryoherwaga no kuganira. Twaganiye ku zindi sosiyete ziri kuvuka, twaganiye ku miryango yacu n’uburyo turi abanyamahirwe ku bw’abagore twashatse. Twaganiye ikiganiro cyiza gituje”

Abajijwe niba hari uburyo urupfu rwa Steve Jobs rwaba rwaramugizeho ingaruka, yavuze ko ari igihombo kuba ufite umuntu w’umunyembaraga, kandi werekanye itandukaniro nyuma agapfa.

Yongeyeho ko byamwibukije ko na we ari gusaza. Ati “Bituma wumva ko turi gukura, bigatuma ukora iby’ingenzi kuko dufite igihe gito”.

Kuwa 5 Ukwakira mu 2011 Steve Jobs yitabye Imana azize Kanseri y’urwagashya, mu gihe Bill Gates ubu atakibarizwa cyane mu bikorwa bya Microsoft. Yahisemo guharira umwanya we munini ikigega we n’umugore we Melinda bashinze.

Mu 1977 hasohotse mudasobwa bise ‘Apple II’ mudasobwa ya mbere yashoboraga gukoreshwa n’abantu ku giti cyabo, ihabwa Windows na Microsoft
Bill Gates (iburyo) na Steve baje kongera gusubirana bafatanye mu rugendo rwo guteza imbere ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza