Umunara wa StarTimes wakubiswe n’inkuba bibuza bamwe muri Kigali kureba Televiziyo

Yanditswe na Evariste Nsengimana
Kuya 8 Mutarama 2020 saa 03:08
Yasuwe :
0 0

Ikigo Star Times cyiseguye ku bafatabuguzi bakoresha dekoderi zacyo baherereye mu Mujyi wa Kigali batari kubasha kureba amashusho ya chaînes za Televiziyo uko bikwiye, nyuma y’uko umunara wayo wa Jali ukubiswe n’inkuba mu mvura yaguye mu gitondo cyo kuri uyu wa 8 Mutarama 2020.

Itangazo iki kigo kirimo koherereza rigira riti “Ikigo StarTimes kiramenyesha Abafatabuguzi bacyo ko Inkuba yakubise umunara wayo, uri ku musozi wa Jali i Kigali. Ku bw’iyo mpamvu, amashusho ntabasha kugaragara. Turasaba abafatabuguzi bacu kwihangana mu gihe turimo gukemura ikibazo cyabayeho.”

Umuyobozi ushinzwe itumanaho n’imenyekanishabikorwa muri Star Times, Vlady Terimbere, yabwiye IGIHE ko abakiliya bagizweho ingaruka n’iyo mpanuka ari abakoresha antenes nto mu mujyi wa Kigali gusa.

Bisobanuye ko ahandi hose nta kibazo bakomeje kureba amashusho neza ariko no muri Kigali abakoresha Antenes z’ibisahani bakomeje kuyareba nta kibazo.

Ati “Twageze ku kazi harimo kugwa ya mvura nyinshi cyane, noneho hari inkuba yakubise umunara wa hariya kuri Jali, niyo mpamvu amashusho atabasha kugararagara ariko abatekinisiye bacu bose bagiyeyo barimo kubikoraho, turasaba abafatabuguzi kwihangana, ni igihe gito.”

Terimbere yavuze ko hari icyizere ko mu gihe gito biza kuba byakemutse abantu bagakomeza kuryoherwa n’ibyiza bya Star Times.

Star Times ni ikigo kiyoboye mu ikoranabuhango ryo gusakaza amashusho ya Televiziyo muri Afurika, aho abagera kuri miliyoni 30 bakoresha ifatabuguzi ryayo.

Ikorera mu bihugu bisaga 30, ifite amasheni agera kuri 480 arimo ay’amakuru, filime, filime z’uruhererekane, imikino, imyidagaduro, gahunda zigenewe abana n’ibindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .