Ikigo gikora ibikoresho by’ikoranabuhanga cyo muri Koreya y’Epfo, Samsung, cyabwiye abakiriya bacyo ko bagomba kwitwararika ntibavuge akari imurore mu gihe bareba televiziyo nshya zigezweho zikoresha internet “Smart TV”, giherutse kumurika, kuko zabamenera amabanga.

Samsung ivuga ko izo televiziyo zamena ibanga kubera ikoranabuhanga zifite ryo gutegekwa n’ijwi rya nyirazo rituma ifata amajwi y’abayegereye yose, ikayohereza kuri internet bakayahinduramo itegeko irakurikiza.

Urugero uyikoresha ashobora gutegeka Samsung Smart TV ayibwira ati” Ongera ijwi, hindura sheni ya televiziyo cyangwa ati “zima”…..”

Samsung iburira abakiriya bayo iti” Ntimukarondogore ngo muvugire amabanga yanyu imbere ya televiziyo kuko iba iri kubumva.”

Iki kigo cy’ikoranabuhanga kivuga ko abafatanyabikorwa bayo bakora akazi ko guhindura amajwi mo itegeko televiziyo irubahiriza, bashobora gufata amabanga ya nyirayo bakayashyira ku karubanda.

Mu masezerano n’abakiriya bazagura izo televiziyo Samsung iragira iti” Mumenye neza ko ibyo muzavuga mureba televiziyo ishobora kuzabifata amajwi kandi aho bizoherezwa ntimuhazi."

Ikinyamakuru Forbes kivuga ko benshi batangiye kugira amakenga ko iyo televiziyo yaba ari igikoresho cy’ubutasi ariko Samsung ikabahumuriza ivuga ko bashobora gufunga iyo televiziyo ntifate amajwi, kandi ko iyo iri gufata amajwi hari akantu kabyerekana.

Yanemeje kandi ko abafite ingingimira bashobora gufunga umuyoboro wa internet w’iyo televiziyo .

Si ubwa mbere inganda za televiziyo zishinjwa kuneka abakiriya bazo, mu 2013 sosiyete ya LG yafataga imyitwarire y’abakiriya mu gihe bari kureba televiziyo zayo batabizi.

Televiziyo zitegekwa n’ijwi rya nyirazo zikomeje kwigarurira isoko kandi zose zifite ingaruka zimwe n’iy’iza Samsung, sosiyete nka Microsoft, Amazon na Apple nazo zatangiye gucuruza serivisi zo gutegekesha ibikoresho by’ikoranabuhanga ijwi.

Televiziyo zigezweho uzitegeka ukoresheje ikiganza cyangwa ijwi