Ibigo bikomeye ku Isi mu gutanga ibikoresho by’itumanaho, ITU na Nexpedience, biratangaza ko bigiye gufatanya kugeza itumanaho rikataje muri Afurika, hubakwa iminara 180 izifashishwa mu isakazamakuru n’itumanaho mu bihugu 6 harimo n’u Rwanda.

Ibikorwa remezo bizubakwa mu gihugu cy’u Burundi ari naho bizatangirira, bigakomereza mu bindi bihugu by’u Rwanda, Jibuti, Burukinafaso, Suwazilande na Mali. Iminara 180 izubakwa ifite agaciro ka miliyoni y’amadolari y’Amerika.

Iminara izubakwa izifashishwa no mu bikorwa by’iteganyagihe ry’ahantu kugeza ku birometero 32

Nk’uko ikinyamakuru Izubarirashe kibivuga, hasinywa amasezerano y’ubufatanye bwa ITU na Nexpedience, Brahima Sanou, Umuyobozi w’Ikigo cy’Itumanaho ITU, yagaragaje ko ibihugu biri mu nzira y’amajyambere bitagomba gusigara inyuma isakazamakuru riteye imbere.

Yagize ati “Ubu bufatanye ni imwe mu nshingano za ITU, zo kuzana isakazamakuru rikoranye ikoranabuhanga ku Isi, twibanda ku bihugu bikennye. Ntekereza ko ubu bufatanye bugiye guteza imbere isakazamakuru ku mugabane wa Afurika”.

Ku ruhande rw’Umuyobozi rwa Nexpedience, we yagize ati “Biradushimishije guha ibihugu bidafite amikoro isakazamakuru rifite ikoranabuhanga rihambaye, abaturage b’ibi bihugu bazakuramo inyungu nyinshi mu ikoranabuhanga, twahisemo gukorana na ITU kuko ifite itsinda rizadufasha kugera ku ntego”.

ITU na Nexpedience ni ibigo by’itumanaho bikomeye ku rwego rw’Isi, bizobereye mu kugurisha ibikoresho by’ikoranabuhanga mu isakaza ry’amajwi n’amashusho hatifashishijwe umugozi.

ITU ikorera i Geneve mu Busuwisi, kandi ikaba ifite ibihUgu ibihugu 193 ikoreramo.