00:00:00 IGIHE NETWORK KN KINYARWANDA EN ENGLISH FR FRANCAIS

Kuba ‘Verified’ kuri twitter ni ibintu bibona umugabo bigasiba undi; bisaba iki?

Yanditswe na Muhonzire Sylvine
Kuya 21 January 2022 saa 03:48
Yasuwe :

Akamenyetso k’ubururu gashyirwa kuri konti zitandukanye kuri twitter kazwi nka ‘Blue Verified badge’ ni kamwe mu byifuzwa na benshi mu bayikoresha ariko kabona umugabo kagasiba undi.

Aka kantu ubusanzwe gashyirwa kuri konti z’abayobozi, abanyamakuru, abahanzi, abakinnyi, abashyushyarugamba, konti z’ibinyamakuru, ibigo bya leta, ibyikorera n’abandi bantu bazwi bitewe n’impamvu runaka zirimo no kuba ari aba ‘social media influencer’ (abavuga rikijyana ku mbuga nkoranyambaga).

Benshi batekereza ko kugira ‘Verified badge’ kuri konti ya Twitter biterwa n’ubwinshi bw’abayikurikira, gusa mu bintu bitatu by’ingenzi bigenderwaho ngo konti igire aka kamenyetso ubwinshi bw’aba-follower ntiburimo ndetse kuyibona ni ukuyisaba ntabwo wabyuka ngo usange yijyanyeho utarayisabye.

Nka konti ya Perezida Paul Kagame yabaye ‘verified’ mu 2010 itaragira n’abayikurikira bagera mu 3000, gusa uzasanga hari n’abafite konti zifite abazikurira bagera mu bihumbi 100 ariko zitari ‘verified’ ndetse rimwe na rimwe uzabona n’abitotombera twitter bavuga ko bamaze kuyisaba inshuro nyinshi ariko ntibabe verified.

Hagenderwa kuki ngo Twitter ishyire ‘Verified badge’ kuri konti y’umuntu ku giti cye?

Uvanyeho kuba konti ari imwe mu zo twavuze haruguru, hari ibindi Twitter igenderaho kugira ngo ishyire ‘verified badge’ kuri konti y’umuntu runaka.

Muri byo harimo kuba konti ari umwimerere (authenticity) kuko iyo umuntu asaba ko konti ye iba verified, bamusaba icyemeza ko atari impimbano, yaba ifoto iri ku cyangombwa byibura kimwe cyemewe mu gihugu cye, nk’irangamuntu cyangwa uruhushya rwo gutwara imodoka.

Ashobora nanone kwerekana isano ufitanye n’ikigo runaka ariko gifite konti iri verified kuri twitter cyangwa agatanga email akoresha mu kazi k’ikigo kizwi kandi gifite konti iri verified kuri twitter.

Nyuma yo kugenzura ukoresha konti, Twitter ireba icyo bita ‘Notability’, kureba ko koko ny’iri iyo konti ari umuntu uzwi cyangwa se ari iy’umwe muri bya byiciro by’abantu bahabwa ‘verified badge’.

Kugira ngo bigaragare, nk’iyo uri umunyamakuru igusaba kwerekana bimwe mu bikorwa byawe, ushobora gutanga ‘link’ z’inkuru wanditse zigashyirwa ku kinyamakuru kizwi kandi kiri ‘verified kuri twitter, waba uri umuyobozi cyangwa undi muntu uzwi ugasabwa link ya Wikipedia yerekana umwirondoro wawe (profile).

Uru rubuga hari igihe kandi rugenzura umuntu rurebeye ku bamukurikira rukareba ko harimo abantu batuye mu gace cyangwa mu gihugu kimwe n’icyo atuyemo, gusa rukoresha n’ubundi buryo bwinshi butandukanye kugira ngo rwemeze ko koko uri umwe mu bagize ibyiciro bihabwa ‘verified badge’ kuri konti.

Icya nyuma yitaho ni ukuba umuntu akoresha cyane Twitter (active), gusa akaba amaze byibura umwaka atarahabwa igihano na Twitter ni ukuvuga atarafungirwa konti amasaha 12 cyangwa iminsi irindwi azira kurenga ku mategeko n’amabwiriza ya Twitter.

Iyo konti igomba kuba ifite ifoto, izina, nimero ya telefone, email, imaze amezi nibura atandatu ifunguwe kandi ibasha kurebwa na buri wese kuva umunsi nyirayo yakiyeho ‘verified badge’.

Gusa hari igihe konti ishobora kuba yujuje ibi byose ariko ntibe ‘verified’, bitewe no gukora amanyanga atandukanye kuri konti harimo kugura no kugurisha aba-followers cyangwa konti ikaba yandikwaho cyangwa itanga ubutumwa busebanya, bugumura rubanda cyangwa bubiba urwango rw’icyiciro kimwe cy’abantu n’ibindi.

Twitter ishobora kandi gukuraho ‘verified badge’ kuri konti y’umuntu itamuteguje mu gihe bimwe mu byatumye imugira verified byahindutse. Harimo guhindura izina, kuba konti itagikora, kuba yavuye ku mwanya w’ubuyobozi watumye aba verified cyangwa atagihura na bimwe mu bigenderwaho ngo konti ibe ‘verified’.

Ushaka gusaba ’Verified badge’ , ujya muri Settings za konti yawe ukajya ahanditse ’settings and privacy’ ugahita ujya ahanditse ’your account’ wahava ukajya muri ’account information’ ukabona ahanditse ’verification request’ wahava ukajya ahanditse ’Apply now-’ ubundi ukuzuza ibisabwa.

Kubona 'Twitter Verified' kuri konti ntabwo bigenewe abantu bose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .