Mu mpera z’icyumweru gishize google Chrome yagaragaye nka browser ikoreshwa n’abantu benshi mu bakoresha interineti.

Ibi byatangajwe hifashishijwe amakuru yakusanyijwe agatangazwa n’ikigo Stat Counter, gishinzwe kubara abakoresha cyangwa abinjira ku mbuga za internet.

Ibi Chrome ibigezeho iciye kuri internet Explorer yari imaze igihe iri imbere muri browser zikoreshwa cyane n’abakoresha imbuga za internet.

Kuba Internet explorer yazaga imbere, ngo byaterwaga n’uko ariyo yajyaga ikunda kuba iri ku madirishya (windows) ya za mudasobwa nyinshi, bityo ikabasha kuba ariyo ikoreshwa cyane. Kuba Chrome yaje imbere muri browser ngo byatumye abantu banenga cyane abashinzwe kubara abinjira n’ibikoreshwa ku mbuga za internet bavuga ko batafashe amakuru mu bihugu bitandukanye ngo bamenye koko niba Chrome ari iya mbere.

Uhagarariye Stat Counter, iki kigo kibara abinjira kuri internet cyatangaje iyi nkuru, Aodhan Cullen yavuze ko impamvu Chrome yaciye kuri izo zose byaba biterwa n’uko mu minsi y’ikiruhuko iyo abantu babonye umwanya wo guhitamo Browser bakoresha abenshi bahitamo gukoresha Chrome. Yanatanze n’imibare aho yagaragaje ko ku cyumweru Chrome yari yakoreshejwe n’abantu 32.8% igakurikirwa na Internet Explorer yakoreshejwe n’abantu 31.9% ndetse hataho Mozila Firefox n’abantu 25.5%.

Ibindi bigo bisanzwe bikora mu bijyanye no kubara abinjira kuri internet bivuga ko iyi mibare atari iy’ukuri ngo kubera ko iyi mibare igenda ihinduka buri munota. Gusa ntabwo bahakana ibyo kino kigo cyatangaje kubera ko umwaka ushize iki kigo cyari cyagaragaje ko Chrome irimo kuzamuka muri Browser zikoreshwa cyane.

ComScore, indi sosiyete ishinzwe kubara abakoresha internet ntabwo yigeze itanga imibare nyayo ifatika ngo bagereranye, nyamara Umuvugizi w’iyo sosiyete yavuze ko imibare Stat Counter yatangaje ari ukuri akurikije imibare asanzwe abona.

Google ubundi izwi nk’urubuga rukusanya amakuru mu ku mbuga zitandukanye, rukagukuriramo ibisubizo ku kibazo wayibaza. Itanga kandi ifatabuguzi rya Gmail none ifite na browser ije ku mwanya wa mbere.

Benshi mu bakurikiranira hafi iby’ikoranabuhanga mu itumanaho, bemeza ko kuba google Chrome ibaye iya mbere muri browser zikoreshwa, ngo yaba ibikesha imirimo google imazemo iminsi yerekana kuri televiziyo uburyo google Chrome ikora.