00:00:00 IGIHE NETWORK KN KINYARWANDA EN ENGLISH FR FRANCAIS

Ibiciro byo gukoresha umurongo mugari ‘broadband’ bizamenyekana vuba

Yanditswe na

Ange de la Victoire Dusabemungu

Kuya 21 November 2012 saa 03:12
Yasuwe :

Mu nama nyunguranabitekerezo ku buryo umuyoboro mugari (broadband) wakomeza gusakara hose mu gihugu, Minisitiri w’Urubyiruko n’Ikoranabuhanga, Jean Philibert Nsengimana yasabye ubuyobozi bw’Ikigo cy’Igihugu ngenzuramikorere (RURA) ko bitarenze ukwezi kwa Mutarama 2013, cyaba cyamaze gushyira ahagaragara ibiciro bigenga ikoreshwa ry’umurongo mugari n’iminara mu Rwanda.
Minisitiri yabisabye nyuma y’uko abakoresha ibyo bikorwa remezo bagaragaza ko ibiciro by’iryo tumanaho bikiri hejuru, n’ubwo u (...)

Mu nama nyunguranabitekerezo ku buryo umuyoboro mugari (broadband) wakomeza gusakara hose mu gihugu, Minisitiri w’Urubyiruko n’Ikoranabuhanga, Jean Philibert Nsengimana yasabye ubuyobozi bw’Ikigo cy’Igihugu ngenzuramikorere (RURA) ko bitarenze ukwezi kwa Mutarama 2013, cyaba cyamaze gushyira ahagaragara ibiciro bigenga ikoreshwa ry’umurongo mugari n’iminara mu Rwanda.

Minisitiri yabisabye nyuma y’uko abakoresha ibyo bikorwa remezo bagaragaza ko ibiciro by’iryo tumanaho bikiri hejuru, n’ubwo u Rwanda ruza ku isonga mu gukwirakwiza umurongo mugari wa interineti muri Afurika.

Hatanzwe urugero ku mahoteli yo mu Rwanda, aho usanga abakiriya babagana usanga binubira ko serivisi ya interineti ikiri hasi, nyamara kandi banyiri amahoteli bakagaragaza ko nta ruhare bababafitemo, bagatunga agatoki ibikorwa remezo by’ikoranabuhanga ko aribyo bigira uruhare ku idindira ry’iyo serivisi.

Minisitiri Jean Philibert yatangaje ko mu Rwanda hatagomba gutangirwa gusa serivisi nziza mu bijyanye n’amafunguro, ngo rutange serivisi mbi ya interineti.

Didier Nkurikiyimfura, umuyobozi mukuru wa ICT, avuga ko mu rwego rwo gukomeza gushyikira ikoranabuhanga mu Rwanda , biteganyijwe ko abantu bazakangurirwa kujya bakoresha interineti bifashije n’ubundi buryo butandukanye burimo n’ibikoresho (devices) by’itumanaho, kuko byagaragaye ko nabyo bigira uruhare mu guha abantu iyo serivisi.

Kugeza ubu ariko ngo interineti mu Rwanda irihuta, ikibazo kigihari ni ibikorwaremezo.

Umurongo mugari kuri ubu uri ku kigereranyo cya Km 256, ariko biteganyije ko uko ibihe biza uziyongera ugasakara mu gihugu hose.

Ubushakashatsi bwa vuba bwakozwe na Net Index 2012 , bugaragaza ko u Rwanda ruza ku mwanya wa mbere muri Afurika mu gukwirakwiza umurongo mugari wa Interineti.

Tugendeye ku mibare igaragazwa n’ubushakashatsi, interineti mu Rwanda yihuta ku kigereranyo cya Megabayite 7.28 ku isogonda, mu gihe ubushakashatsi bwakozwe mbere bwagaragazaga ko uko kwihuta kwari guhagaze ku kigereranyo cya Megabayite 3.28.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .