Abanyeshuri biga muri Kaminuza y’u Rwanda, Koleji y’ubumenyi n’ikoranabuhanga bashyize ku mugaragaro ikoranabuhanga rifasha gusuzuma uburumbuke bw’ubutaka hifashishijwe porogaramu ishyirwa muri telefoni igendanwa.

Aba banyeshuri bibumbiye mu itsinda “Agristars” bamuritse iri koranabuhanga mu marushanwa Imagine Cup y’ishami nyafurika ry’ikigo mpuzamahanga kabuhariwe mu ikoranabuhanga ku Isi “Microsoft Corp” (Microsoft 4Africa) yabaye ku wa 19 Mata 2014.

Microsoft 4Africa yateguye aya marushanwa hagamijwe gufasha abanyeshuri bagakoresha ibyiyumvo byabo mu guhanga udushya dukemura bimwe mu bibazo by’ingutu bibangamiye Isi banafashwa guhuza ubushobozi bwabo n’ubw’ibihugu byateye imbere.

Amashuri makuru na za kaminuza byitabiriye aya marushanwa mu Rwanda ni Kaminuza y’u Rwanda muri Koleji ry’ubumenyi n’ikoranabuhanga, Kaminuza y’Abadivantisiti ya Afurika yo Hagati (Adventist University of Central Africa), Ishuri rikuru ry’ikoranabuhanga rya Kicukiro n’irya Tumba.

Urubyiruko ruturutse muri aya mashuri rwahanze udushya tujyanye n’ikoranabuhanga, itsinda Agristarsrigizwe n’abanyeshuri biga ibya mudasobwa ryerekana agashya mu guhangana n’ibibazo by’ingutu bibangamira ubuhinzi hakoreshejwe ikoranabuhanga buri muhinzi yakwibonamo.

Berekana iri koranabuhanga nyuma yo guhabwa ibihembo kuri uyu munsi, abagize itsinda Agristars bagaragaje uburyo byoroshye kugenzura uburumbuke bw’ubutaka nyuma yo gufata ifoto yabwo na telefoni igendanwa ifite porogaramu bavumbuye porogaramu ihita itangira kureba ibigize ubutaka ku ifoto.

Dieudonne Ukurikiyeyesu, umwe mu bagize Agristars yagize ati “Nyuma y’uko iyi porogaramu ishyirwa muri telefoningendanwa irangije gusuzuma ifoto y’ubutaka yafotoye, igaragaza ibibugize n’igihingwa cy’ibanze wahingamo kigakura neza kurusha ibindi.”

Akanama ngishwanama ka Microsoft muri Afurika (Microsoft 4Afrika Advisory Council) kanzuye ko iri tsinda ryazanahagararira u Rwanda na Afurika muri kimwe cya kabiri cy’amarushanwa mpuzamahanga ku ikoranabuhanga azaba mu kwezi gutaha kwa Gicurasi.

Iri tsinda rizaba rifite amahirwe yo gutoranywa mu matsinda 10 azahangana n’andi aturutse muri Amerika muri Nyakanga 2014.

Akaliza Keza Gara, umunyarwandakazi watorewe kuba muri aka kanama ngishwanama yagize ati “ Porogaramu y’itsinda Agristars ifite ubushobozi bwo gukemura byinshi mu rwego rw’ubuhinzi. ikomeje kunonosorwa yagira uruhare rukomeye mu kunoza urwego rw’ubuhinzi mu Rwanda no ku Isi.”

Eric Odipo, uhagarriye Microsoft muri Afurika y’i Burasirazuba yongeyeho ati “ Twizeye ko Agristars bazahagararira Afurika neza ku rwego rw’Isi nibaramuka bahageze.”

Ubuyobozi bwa Microsoft 4Africa bwashimiye amatsinda nyarwanda yabonetse mu irushanwa kuko yose yagize uruhare rukomeye mu kwerekana ubwitange bagaragaza ibisubizo bya bimwe mu bibazo byo ku Isi hifashishijwe ikoranabuhanga.

[email protected]