Smartphone nziza zihendutse wagura

Yanditswe na Umwali Zhuri
Kuya 10 Gicurasi 2020 saa 04:11
Yasuwe :
0 0

Muri iyi nkuru ntabwo turi buvugemo telefoni wagura nk’ibihumbi 100 Frw, ahubwo turavuga kuri ba bandi bajyana cyane n’ibigezweho, bakagura nka iPhone runaka igura amafaranga ashobora no kugera kuri miliyoni y’u Rwanda, kuri bo, igura icya kabiri cyayo ihendutse kubi.

Izi telefoni zose ni nshya ku isoko, uraza gusangamo izasohotse muri uyu mwaka kandi zifite ikoranabuhanga rijyanye n’igihe ku buryo ku mbuga za internet zigurishirizwaho telefoni ushobora kuzisanga ku mafaranga make kandi zikiri nshya.

-  iPhone SE (2020)

Niba ukunda iPhone, nta kabuza iPhone SE yasohotse muri uyu mwaka, wayitunga wishimye. Ubwoko bwa mbere bw’iyi telefoni, bwashyizwe ku isoko mu myaka ine ishize. Inshya yaje ivuguruye kurusha iyo ya mbere.

Ifata amafoto meza kurusha iya mbere ndetse ntishobora kwangirika mu gihe yaba iguye mu mazi, ikindi ni uko yo ishobora gushyirwamo umuriro mu buryo nziramugozi. Gusa iyi yo ntabwo ifite aho ushobora gushyira écouteur ahubwo umuntu akoresha zimwe za nziramugozi.

Niba ushaka kugura iPhone nshya, iPhone SE (2020), ntukwiriye kuyirata kuko iranahendutse. Ubu iri kugura $399 asaga gato ibihumbi 375 Frw.

-  Samsung Galaxy A51

Telefoni za Samsung ni zimwe mu zikunzwe na benshi kuko zibasha gufata amafoto meza kurusha ubundi bwoko bwinshi. Uyu mwaka mu zagiye ku isoko harimo na Galaxy A51 ifite camera enye, ikoresha igikumwe mu kuyifungura.

Iyi telefoni yazanye n’ubwoko bushobora kwakira ikoranabunga rya 5G (ritaratangira gukora mu Rwanda). Ntabwo ihenze kuko ihagaze $399 asaga gato ibihumbi 375 Frw naho ijyamo 5G yo asaga ibihumbi 460 Frw.

-  Google Pixel 3A XL

Ntabwo ari abanyarwanda benshi wasanga batunze telefoni za Google, ariko ni zimwe mu nziza zigezweho ku isoko by’umwihariko mu bijyanye no gufata amashusho kuko zirusha nyinshi mu zikunzwe zikaba zanarusha ubushobozi yewe na camera zimwe na zimwe.

Mu masaha y’ijoro, iyi telefoni ifite ubushobozi bwo gufata amafoto meza ndetse ishobora no gufata amashusho y’agatangaza. Ifite bateri nziza cyane ya 3700-mAh kuko umuriro ushobora kumaramo amasaha arenga 24. Niba ukeneye amafoto yo gukoresha ku mbuga nkoranyambaga zawe, Pixel 3A XL yabigukorera neza mu gihe waba uyiguze biragusaba kwishyura nibura $479, asaga gato ibihumbi 450 Frw.

-  Motorola Moto G Stylus

Hari benshi baheruka za Motorola za kera ku mwaduko wa telefoni mu Rwanda, batazi ko uru ruganda rwiyuburuye rukagera aho rukora izigezweho. Niba warakunze Motorola ya kera, igihe ni iki kugira ngo unaryoherwe n’inshya igezweho.

Motorola Moto G Stylus ifite camera eshatu, ububiko bwa 128GB ndetse na bateri ishobora kumaramo umuriro igihe kigera ku minsi ibiri kuko ifite ubushobozi bwa 4,000mAh. Ntabwo bigusaba menshi kugira ngo uyitunge ugereranyije n’izo tumaze kubona hejuru, ishakemo nibura $300 ni ukuvuga asaga gato ibihumbi 280 Frw.

-  Samsung Galaxy A50

Samsung Galaxy A50 ni indi telefoni ya Samsung watunga niba ukunda ubwoko bw’izi za “A”. Yagiye ku isoko umwaka ushize ariko iracyari telefoni nziza ku isoko n’ubu ndetse irahendutse ugereranyije n’uko yagiye hanze igura.

Ifite camera eshatu, ikoresha igikumwe mu kuyifungura, ndetse ikirahure cyayo ni kimwe kigaragaza ibintu neza kuko gikoranye ikoranabuhanga rya LED rimenyerewe kuri za écran nini zigezweho.

Ku madolari 250 ni ukuvuga asaga gato ibihumbi 235 Frw urabasha gutunga telefoni igezweho kandi ya make.

-  Motorola Moto G Power

Motorola G Power irahendutse ugereranyije na G Stylus kuko yo ushobora kuyibona ku $250 asaga gato ibihumbi 235 Frw. Ifite batiri nziza cyane irambamo umuriro kuko ifite ubushobozi bwa 5,000-mAh. Iyi batiri yakozweho igeragezwa, bigaragaza ko umuriro ushobora kumara nibura iminsi ine. Ubwo niba udakunda kwirirwa ucometse telefoni, nakubwira iki.

Ikindi cyiza cyayo ni uko ifite camera eshatu zituma ubona amashusho meza.

-  Motorola Moto Z4

Moto Z4 yashyizwe ku isoko muri Gicurasi umwaka ushize ariko ntiyakundwa cyane nubwo ari imwe muri telefoni nke zikoresha 5G. Irambisha umuriro kurusha nyinshi muri telefoni za iPhone na Samsung ndetse ifite camera ifata amafoto meza kuko ifite megapixel 48.

Igura $499 ni ukuvuga asaga ibihumbi 465 Frw.

-  Samsung Galaxy S9

Ni imwe muri telefoni nziza Samsung yakoze uhereye mu buryo igaragara ndetse n’uburyo ibasha kwihanganira amazi. Ishobora kujyamo umuriro mu buryo nziramugozi ndetse ifite ikirahure cyiza cyigoronzoye gikoranywe ikoranabuhanga rya LED. Ufite $450, ni ukuvuga asaga ibihumbi 420 Frw wayibikaho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .