Umuyobozi w’Ikigo cy’Igihugu Ngenzuramikorere, Maj. Francois Regis Gatarayiha ari kumwe n’umuyobozi ushinzwe ikigo cy’indangamuntu, batangaje ko abanyarwanda bose bagomba kwandikisha inomero za telefone zabo, bikazakorwa hatangwa imyirondoro y’indangamuntu (Photocopie), abatazifite bagashaka ababishingira.

Ibi byatangarijwe mu kiganiro n’abanyamakuru cyabereye ku cyicaro cya RURA, batangaza ko kwandikishja inomero za telefone (za SIM Card) bizatangira ku itariki ya 4 Gashyantare 2013 bikazarangira ku ya 31 Nyakanga 2013.

Batangaje ko kwandikisha nimero za telefone zabo bizakorwa ku buntu, bityo ko abatazazandikisha zikazaba impfabusa kugeza bazandikishije.

Umuyobozi wa RURA yavuze ko bizafasha mu kurwanya ibikorwa by’urugomo bikorerwa kuri telefone nko kuba bakwiba abantu (Kidnapping), kimwe n’ubujura bukorwa abantu bahana amafaranga kuri telefone (Mobile Money Transfer).

Kugeza ubu mu Rwanda hari sosiyeti eshatu z’itumanaho zigomba kuzandikishwamo inomero za telefone ari zo MTN, TIGO na Airtel.