Amnesty International, imiryango irengera ikiremwamuntu muntu n’ibigo by’ikoranabuhanga, ku wa 21 Ugushyingo 2014, bamuritse porogaramu ya mudasobwa izajya irinda abanyamakuru n’abandi barengera uburenganzira bwa muntu, kwinjirirwa mu mabanga n’inzego z’ubutasi z’ibihugu.

Nk’uko bigaragara ku rubuga rwa Amnesty International, iyi porogaramu izwi nka Detekt, ni yo ya mbere ishyizwe ahagaragara ngo ihangane n’uburyo bukoreshwa n’ibihugu ndetse n’izindi nzego z’ubutasi mu kumenya amabanga y’abanyamakuru n’abandi baharanira uburenganzira bwa muntu, bakunze kwibasirwa n’ihohoterwa kubera ibikorwa byabo.

Umwe mu bakozi ba Amnesty International, Marek Marczynski avuga ko muri iyi minsi leta z’ibihugu, zirimo gukoresha uburyo bwinshi bw’amayeri mu kwinjira muri mudasobwa, n’ibindi bikoresho by’abanyamakuru bashaka amabanga y’ibyabashyira hanze.

Yemeza ko iyi porogaramu izafasha abanyamakuru kumenya ko binjiriwe mu mabanga bagafata ibyemezo byo kwirinda.

Yagize ati “Abanyamakuru n’abarengera uburenganzira bwa muntu bafite ibyago byo kwinjirirwa mu mabanga, Detekt ni igikoresho cyoroheje gifasha mu kumenya ko urimo ugenzurirwa amabanga mu bikoresho byabwe.

“Ihangana n’ubuyobozi bw’ibihugu bwifashisha ayo makuru bubona mu buryo ibanga mu gufata no gufunga mu buryo butemewe n’amategeko impirimbanyi z’uburenganzira bwa muntu n’abanyamakuru.”

Detekt yakozwe n’umushakashatsi mu bijyanye n’umutekano Claudio Guarnieri, ni igikoresho cyitezweho guhangana n’irindi koranabuhanga rikoreshwa mu kwinjira mu mabanga y’abandi rwihishwa.

Ihuriro Amnesty International ibereye umunyamuryango rirwanya abinjira mu mabanga y’abandi mu buryo butemewe, rivuga ko ubucuruzi bw’ikoranabuhanga rifasha ibihugu kumenya ibikorwa by’amabanga y’abantu runaka ryiyongera cyane.

Ngo byibura ku mwaka, ubu bucuruzi ku Isi yose, bwinjiza miliyari zisaga eshanu z’amadolari.

Bimwe muri ibi bikoresho bishobora kuboneka kuri internet, naho andi masosiyete yigenga akabikora mu buryo bw’ibanga akabicuruza n’ibihugu byo ku Isi.

FinFisher, ni ikigo cyo mu budage kizwi cyane mu gukora izi porogaramu zigenzura amabanga.

Bakoze FinSpy ishobora kugenzura ibiganiro byo kuri Skype, ikareba ibibitse ku bikoresho bifata amajwi n’amafoto, ikinjira no muri butumwa z’abagenzurwa.

Ikoranabuhanga ry’isi sosiyete y’abadage ryakunze kwifashishwa mu kwinjira mu mabanga y’abakozi bakuru b’imiryango yita ku burenganzira bwa kiremwamuntu.

Amnesty International ivuga ko Detekt ari izafasha abaharanira uburenganzira bwa muntu, kumenya uko birinda ihohoterwa bakorerwa binyuze ku mabanga arungurukwa n’abatishimira ibyo bakora.

[email protected]