Iki kigo cyatangaje ko ubushyuhe muri Kanama 2026 bwageze ku mpuzandengo ya dogere selisiyusi 16,96°C, bukaba burenzeho dogere 0,85°C ugereranyije n’impuzandengo y’ubushyuhe bwabaye hagati ya 1991 na 2020.

Abahanga bavuga ko ubwo bushyuhe budasanzwe bwagize ingaruka mu bice bitandukanye by’Isi, aho kuva i New York, Tokyo, Roma kugera i New Delhi, abantu bahuye n’ubushyuhe bukabije bwahungabanyije ubuzima bwa buri munsi. Abari mu byiciro byibasirwa cyane n’ubushyuhe, abakozi bakorera hanze ndetse n’abari mu biruhuko ku nkengero z’inyanja ni bamwe mu bagezweho n’ingaruka.

Copernicus yavuze ko Kanama 2026 ari ko kwezi kwashyushye cyane kurusha andi mezi yose yapimwe kuva mu 1940, aho kwari gafite impuzandengo y’ubushyuhe bwa dogere 16,96°C.

Nyakanga 2023 ni yo ikurikiyeho, kuko yari ifite dogere 16,95°C.

Samantha Burgess, umuhanga mu bijyanye n’ikirere mu Kigo cy’u Burayi gishinzwe iteganyagihe (ECMWF), yavuze ko Kanama 2026 ari ukwezi kw’amateka mu bijyanye n’imihindagurikire y’ikirere.

Yagize ati “Birashoboka ko abantu batigeze babaho mu bushyuhe nk’ubu mu myaka nibura 100.000 ishize.”

Abahanga mu by’ikirere bavuga ko kuva muri Kamena kugeza muri Kanama 2026 byabaye kimwe mu bihe by’ubushyuhe bukabije ku Isi. Bavuga ko ibipimo bitandukanye bigaragaza ko iki gihe gishobora kuba ari cyo gishyushye kurusha ibindi mu myaka 125.000 ishize.

Copernicus yavuze ko u Burayi bw’Iburengerazuba bwahuye n’ibihe bikurikirana by’ubushyuhe bukabije, bwaje kare kandi bukamara igihe kirekire kurusha uko byari bisanzwe. Iki kigo cyatangaje ko ari bwo bushyuhe bukabije bwigeze kubaho muri ako gace, kuko burusha n’ubw’umwaka wa 2003.

Mu bihugu birimo u Bufaransa, u Bwongereza n’u Bubiligi, inzego z’ubuzima zatangaje ko abantu barenga 30.000 bapfuye bazize ingaruka z’ubushyuhe bukabije.