Umusaza Douglas Engelbart umuhanga mu ikoranabuhanga wakoze imbeba ya mudasobwa bita “souris” yitabye Imana mu ijoro ryo kuri uyu wa kabiri taliki ya 2 Nyakanga ku myaka 88 azize impyiko.

Amakuru dukesha Aljazzera atangaza ko uyu musaza yapfuye yari agaze ku kigero gishimishije mu kazi ke ko gutunganya udukoresho tworohereza mudasobwa gukora.
Igitekerezo cyo gukora souris Douglas yagitanze mu mwaka w’1968 aho yagaragarije abahanga bo mu gihugu cya San Francisco basaga igihumbi uburyo butandukanye yari gukoramo souris ari nabwo yatangiye umurimo wo kuyikora.

Uyu muhanga mu ikoranabuhanga yagiye akora ibindi bikorwa byinshi bitandukanye mu ikoranabuhanga birimo uburyo bwo gukora inama kuri computer murebana (video conference) mu bilometero 48. Na none kandi ku bijyane na interineti ni we wa mbere watanze igitekerezo cyo kubaka urubuga hakoreshejwe amagambo aho gukoresha amagambo y’ibanga (codes).

Douglas ntiyigeze asamarira kumenyekana nk’uwakoze byinshi mu ikoranabuhanga igihe benshi bakoraga duke bagahita biyamamaza hari n’abagiye bamamara kubera ibikora bye.

Urugero Aljazzera yatanze ni uko uyu musaza atigeze amenyekana cyane ubwo yakoze souris mu gihe bagenzi be b’abashakashatsi mu kigo cya Stanford bahamanyekaniye bagendeye ku buvumbuzi bwe.

Umusaza Douglas icyamurangaga cyane ni uguharanira ko ibyo akora byagirira abandi akamaro kurusha ko we yabibonamo inyungu zo kwimenyekanisha ndetse yagiye anatanga ibitekerezo bigaragaza ko mudasobwa ifite akamaro kanini mu kongera umusaruro y’imirimo ya muntu.

Douglas asize umugore we wa kabiri Karen O’Leary Engelbart, bashakanye mu 1997 ukomoka mu gihugu cya Korea nyuma yo gupfusha uwa mbere. Asize n’abana bane ari bo Gerda, Diana, Christina na Norman.

Douglas wakoze imbeba ya Mudasobwa

Souris ya mudasobwa ya mbere yakozwe na Douglas yagiye ihinduka mu buryo butandukanye kugeza ku bwo dufite kuri ubu