00:00:00 IGIHE NETWORK KN KINYARWANDA EN ENGLISH FR FRANCAIS

Umunya-Colombia Brayan Sanchez yegukanye etape ya mbere ya Tour du Rwanda 2021 (Amafoto na Video)

Yanditswe na Eric Tony Ukurikiyimfura, Ishimwe Israel
Kuya 2 Gicurasi 2021 saa 10:05
Yasuwe :
0 0

Umunya-Colombia, Brayan Sanchez, ukinira Team Medellin yegukanye etape ya mbere ya Tour du Rwanda 2021 yakiniwe mu mihanda ya Kigali-Rwamagana ku ntera y’ibilometero 115.6.

Brayan Sánchez w’imyaka 26 yegukanye aka gace akoresheje amasaha abiri, iminota 33 n’amasegonda 43, anganya ibihe n’abandi bakinnyi 68 bagereye ku murongo icya rimwe.

Abanyarwanda baje ku myanya ya hafi ni Hakizimana Seth [14] na Uhiriwe Byiza Renus [15]. Bakoresheje ibihe bimwe na Brayan wabaye uwa mbere, 02h33’43".

Brayan Sanchez yegukanye etape ya mbere ya Tour du Rwanda iri kuba ku nshuro ya 13 kuva ibaye mpuzamahanga, ahita anafata umwambaro w’umuhondo. Yageze ku murongo akurikiwe na Alex Hoehn ukinira Wildlife na Weimar Roldan bakinana mu ikipe imwe ya Team Medellin.

Uyu mukinnyi yabaye uwa karindwi wegukanye etape muri Tour du Rwanda mu bakinnyi bakomoka muri Colombia bamaze kwitabira iri siganwa.

Brayan Sanchez yegukanye ku nshuro ya gatatu etape mu marushanwa azwi n’Ishyirahamwe ry’Umukino wo gusiganwa ku Magare ku Isi (UCI), iyo yatwaye yakurikiye ebyiri yegukanye mu byumweru bibiri bishize muri Tour de Colombie.

Uyu Munya-Colombia nubwo yakunze kugendera mu gikundi n’abandi bakinnyi, yashoboye gutsinda mu minota ya nyuma ubwo abakinnyi bazengurukaga i Rwamagana.

Bryan Sanchez yatangaje ko yishimiye kugera mu Rwanda, igihugu cyiza.

Ati “Ndashimira abateguye irushanwa badutumiye, twabonye imihanda ijya gusa kimwe n’iy’iwacu muri Colombia. Uyu munsi twateguye ko tuza gusoza tuvuduka mu gikundi [sprint], ariko si njye wagombaga gusoza. Nisanze ndi mu mwanya mwiza ntabizi kuko ari njye wihutaga cyane. Dutangiye icyumweru neza, twaje hano kugira ngo dutware isiganwa.’’

Tour du Rwanda izakomeza ku wa Mbere, tariki ya 3 Gicurasi 2021, hakinwa agace ka Kabiri ka Tour du Rwanda ka Kigali-Huye ku ntera y’ibilometero 120,5.

UKO ISIGANWA RYAGENZE:

Uko abakinnyi bahembwe

  • Umwenda w’umuhondo utangwa na VISIT RWANDA: Sanchez Vergara Brayan Stiven (Team Medellin)
  • Umwenda w’umukinnyi warushije abandi guterera imisozi utangwa na COGEBANQUE: Mohd Zariff Muhammed ( Terengganu Cycling)
Cogebanque ni yo yambika ikanahemba umukinnyi warushije abandi guterera imisozi. Kuri etape ya mbere, hahembwe Mohd Zariff Muhammed ukinira Terengganu Cycling Team. Umuyobozi ushinzwe Ubucuruzi muri Cogebanque, Kayonga Joel (uwa kabiri ibumoso) ari mu bahembye uyu mukinnyi
  • Umwenda w’umukinnyi watsinze abandi muri sprint utangwa na SP: Suaza Arango Bernardo Albeiro (Team Medellin)
  • Umukinnyi ukiri muto witwaye neza wahembwe na PRIME INSURANCE: Umba Lopez Abner Santiago (Androni Giocattoli-Sidermec)
  • Umunyafurika mwiza mu isiganwa wahembwe na RWANDAIR: Basson Gustav (Protouch)
  • Ikipe yitwaye neza yahembwe na INYANGE INDUSTRIES: Androni Giocattoli-Sidermec

Abakinnyi 10 ba mbere kuri etape ya Kigali- Rwamagana

  1. Sanchez Vergara Brayan Stiven (Team Medellin, Col), 2h33’43”
  2. Hoehen Alex (Wildlife Generation, USA), 2h33’43”
  3. Roldan Ortiz Weimar Alfonso (Team Medellin, Col), 2h33’43”
  4. Pacher Quentin (B&B Hotels, France), 2h33’43”
  5. Restrepo Jhonathan Valencia (Androni, Col) 2h33’43”
  6. Munoz Giraldo Daniel (Androni, Col), 2h33’43”
  7. Basson Gustav (Pro Touch, Afurika y’Epfo), 2h33’43”
  8. Umba Lopez Abner Santiago (Androni, Col), 2h33’43”
  9. De Decker Alfdan (Tarteletto, Belgique), 2h33’43”
  10. Vuillermoz Alexis (Total Direct Energie, France), 2h33’43”.

Abanyarwanda batanu ba mbere kuri iyi etape

  • 14 Hakizimana Seth (SACA) 2h33’43”
  • 15 Uhiriwe Byiza Renus (Team Rwanda), 2h33’43”
  • 33 Byukusenge Patrick (Benediction Ignite), 2h33’43”’
  • 39 Muhoza Eric (Team Rwanda) 2h33’43”
  • 44 Areruya Joseph (Benediction Ignite) 2h33’43”

-  BRAYAN SANCHEZ YEGUKANYE ETAPE YA MBERE YA TOUR DU RWANDA

12:42: Umunya-Colombia, Brayan Sanchez ukunira Team Medellin ni we wegukanye etape ya mbere ya Tour du Rwanda. Yahageze ari kumwe n’abandi benshi mu gikundi.

12:37: Piccoli yasohotse muri bagenzi be, igikundi cy’abakinnyi cyahise gifata ba bakinnyi umunani bari imbere. Abakinnyi benshi bari kugerageza kwihuta barebe ko bagera imbere batanze abandi.

12:34: Abakinnyi bamaze kugenda ibilometero 105, hasigaye icumi ngo bagere ku murongo basorezaho. Abakinnyi umunani barimo Sanchez (Medellin), Boileau (B&B Hotels), Umba (Androni), Weldemichael (Erythrée), Goeman (Tarteletto), Gaillard (Total Direct Energie), Kagimu (Bike Aid) na Piccoli (Israel Start-Up Nation) basohotse mu gikundi bashaka kujya gutsinda.

12:32: Nyuma yo kugenda ibilometero 100, abakinnyi batatu bacomotse mu gikundi basiga abandi ho amasegonda 15 ariko bidatinze bahita bafatwa, ubu bari kugendera hamwe.

- Abakinnyi bazenguruka i Rwamagana

12:27: Abakinnyi bose ubu bari kugendera hamwe, bamaze kuzenguruka inshuro umunani. Hasigaye kuzenguruka inshuro ebyiri zingana n’ibilometero 13 kugira ngo hamenyekane uwegukanye etape ya mbere ya Tour du Rwanda, yahagurukiye mu Mujyi wa Kigali isoreza muri Rwamagana.’’

12:18: Abakinnyi bamaze kugenda ibilometero 95. Mu gihe habura ibilometero 20 ngo basoze, abakinnyi ba Israël Start-Up Nation bari imbere y’abandi ho amasegonda 14.

-  Abegukanye amanota ya Sprint ya kabiri
1. Teugels.
2. Suaza.
3. Sagiv

-  Ibimenyetso biraca amarenga ko iyi etape isozwa abakinnyi bari mu gikundi

12:16: Abakinnyi bamaze gusiganwa ibilometero 92. Babiri barimo Bernardo Albeiro Suaza Arango (Medellin) n’Umubiligi Lennert Teugels (Tarteletto) ni bo bari imbere. Bari inyuma y’igikundi ho amasegonda 15. Nta gihindutse aka gace karasozwa abakinnyi bari mu gikundi.

12:08 Hamaze gukorwa ibilometero 88. Ikinyuranyo hagati ya babiri bayoboye isiganwa n’igikundi cyageze munsi y’umunota (amasegonda 53). Nyamara mu bilometero bine biheruka, hari hakirimo umunota n’amasegonda 20.

Miss Popularity muri Miss Rwanda 2021, Kayirebwa Marie Paul mu baherekeje Cogebanque muri Tour du Rwanda

11:58: Ku kilometero cya 70, ikinyuranyo kiyongereye kigera ku minota ibiri n’amasegonda 15. Abayoboye isiganwa barimo abanya-Colombia, iki gihugu kimaze kwegukana uduce twa Tour du Rwanda dutandatu mu gihe Ababiligi batwaye kamwe.

11:54 Mu gihe hasigaye ibilometero 40 kugira ngo isiganwa risozwe, abakinnyi babiri basize igikundi, bashyizemo umunota umwe n’amasegonda 45. Ikinyuranyo cyagabanutse.

-  Abakinnyi bari imbere basanzwe ari inkorokoro mu mukino w’amagare

Bernardo Albeiro Suaza Arango ni Umunya-Colombie. Uyu mukinnyi w’imyaka 28 y’amavuko akinira Medellín. Ari mu bitabiriye isiganwa rikomeye muri Espagne mu 2017 rizwi nka Vuelta a España.

Suaza afite uburebure bwa metero na santimetero 74, apima ibilo 66.
Mbere yo kwitabira Tour du Rwanda yegukanye etape muri Tour ya Colombie mu 2020 no mu ya Panama mu 2019.

Lennert Teugels we ni Umubiligi. Uyu mukinnyi w’imyaka 28 akinira Tarteletto - Isorex. Amaze gutwara amasiganwa 13 mu akinirwa imbere mu gihugu cye cy’amavuko.

11:46: Ikinyuranyo hagati y’abari imbere n’igikundi kimaze kugera ku 2’15’’. Abakinnyi bamaze gusiganwa ibilometero 70 mu 115.6 bagomba gukora uyu munsi.

11:40: Nyuma yo kugenda ibilometero 67, mu bakinnyi batatu bari imbere Mohd Zariff (Terengganu) aranyonze cyane asiga bagenzi be babiri barimo Suaza (Team Medellin) na Teugels (Tarteletto) bamaze igihe bari kumwe.

11:36: Abakinnyi bamaze kugenda ibilometero 64. Ikinyuranyo hagati y’abakinnyi batatu bayoboye n’igikundi kibari inyuma ubu kigeze kuri 1’57’’. Batatu ba mbere baracyari kumwe nyuma yo gucomokera mu bandi mbere yo kwinjira mu gasantere ka Kabuga.

Cogebanque yaherekeje Tour du Rwanda no mu bihe bidasanzwe

Banki Nyarwanda y’Ubucuruzi ya Cogebanque imaze igihe kirekire itera inkunga umukino w’amagare ndetse muri uyu mwaka yakomeje kuwushyigikira nubwo ari mu bihe bidasanzwe.

By’umwihariko muri uyu mwaka, Cogebanque, umuterankunga mukuru wa Tour du Rwanda 2021 yaherekeje iri siganwa muri Poromosiyo yise ‘TUGENDANE’!

Ni poromosiyo igamije gufasha Abanyarwanda guhindura inzozi zabo mu by’imari impamo.

Bumwe mu buryo ushobora kugendana na Cogebanque ni ugukoresha imiyoboro yayo y’ikoranabuhanga mu kwishyura serivisi n’ibicuruzwa, wohereza amafaranga, n’ibindi.

Ibi byongera amahirwe yo gutsindira ibihembo bitandukanye bizajya bitangwa buri munsi muri Tour du Rwanda.

-  Uburyo bw’ikoranabuhanga wakoresha konti yawe:

Umukiliya wa Cogebanque ushaka gukoresha ikoranabuhanga yifashisha Mobile banking akanda *505# kuri telefoni iyo ariyo yose; gushyira apulikasiyo CogemBank muri smartphone, kwiyandikisha muri Internet banking, gutunga amakarita ya Cogebanque mastercard (debit, credit na prepaid) amuhesha uburenganzira bwo kwishyura ku Isi hose, cyangwa Smart cash card.

Ushaka ibindi bisobanuro ashobora gusura stand ya Cogebanque cyangwa akagana Ishami rya Cogebanque akiyandikisha.

Abakobwa b'uburanga baherekeje Cogebanque bari no mu bafasha mu gusobanura zimwe muri serivisi z'iyi banki
Cogebanque yinjiranye muri Tour du Rwanda 2021 poromosiyo nshya yise “Tugendane”
Cogebanque ni umuterankunga w'imena wa Tour du Rwanda, iyi banki imaze imyaka 10 itera inkunga iri siganwa

11:27: Abakinnyi Suaza (Team Medellin), Mohd Zariff (Terengganu) na Teugels (Tarteletto) bazengurutse ku nshuro ya kabiri bakiri imbere. Ikinyuranyo hagati y’abari imbere n’igikundi cyagabanutse kigeze ku minota ibiri ku kilometero cya 59.

11:22: Abakinnyi bamaze kugenda ibilometero 50, batangiye kuzenguruka aho basoreza mu Mudugudu wa Plage, Akagari ka Nyarusange mu Murenge wa Muhazi mu Karere ka Rwamagana.

11:20: Abakinnyi batatu bari imbere banyuze ku nshuro ya mbere aho isiganwa risorezwa. Suaza (Team Medellin), Mohd Zariff (Terengganu) na Teugels (Tarteletto) ni bo bakiri imbere y’abandi.

-  Amanota ya sprint ya mbere yegukanywe na Suaza

Amanota ya Sprint [Ahabwa uwarushije abandi kuvuduka] yegukanywe na Suaza, akurikiwe na Mohd Zariff na Teugels.

11:14: Abasiganwa bamaze kugenda ibilometero 46, batatu bari imbere bageze muri Rwamagana hafi y’aho batangira kuzenguruka. Biteganyijwe ko abakinnyi bazenguruka inshuro 10 muri Rwamagana aho bakora ibilometero 6.5 kuri buri yose.

11:03: Abakinnyi babiri bakurikiye ab’imbere basizwe 1’45’’. Ikipe ya Israël Start-Up Nation ni yo iyoboye abandi mu bakinnyi bari kugendera hamwe mu gikundi.

10:53: Nyuma yo kugenda ibilometero 30, abakinnyi babiri bacomotse mu gikundi bashaka gukurikira ba bandi batatu bari imbere. Aba bakinnyi ni Munyaneza Didier (Benediction Ignite) na Tesfom (Erythrée) bari inyuma ya batatu ho 1’30’’, bakurikiwe na Dukuzumuremyi Ali Fidel (SACA).

10:50: Suaza (Team Medellin), Mohd Zariff (Terengganu) na Teugels (Tarteletto) baracyari imbere y’abandi.

Nyuma yo gusiganwa ibilometero 28, abakinnyi bari imbere basize igikundi ho umunota umwe n’amasegonda 16.

- Nta bafana bemerewe kugera ahatangirira cyangwa ahasorezwa isiganwa

Tour du Rwanda y’uyu mwaka yagombaga kuba hagati ya tariki ya 21 n’iya 28 Gashyantare 2021, ariko yimurirwa muri uku kwezi kwa Gicurasi kubera icyorezo cya COVID-19.

Ibi byatumye hari amakipe amwe yari yatangajwe mbere atitabira, arasimbuzwa.

Mu rwego rwo gukomeza kwirinda icyi cyorezo, abafana bakumiriwe kuri Kigali Arena ahatangiriye isiganwa n’i Rwamagana aho risorezwa. Abashinzwe umutekano (Polisi y’Igihugu)bari gukora ibishoboka byose kugira ngo hatagira umuntu utemerewe kwitabira iri siganwa uhura n’abakinnyi. Abandi bose babyemerewe babanje kwipimisha COVID-19.

Ikinyuranyo hagati ya batatu bari imbere n’igikundi kiri kwiyongera:

10:31: Abakinnyi bamaze kugenda ibilometero 17, abakinnyi batatu bari imbere bakomeje kongera ikinyuranyo hagati yabo n’ababari inyuma. Ubu babasizeho amasegonda 31.

-  ABAKINNYI BA MBERE BACOMOTSE MU GIKUNDI BAGEZE MU KABUGA

10:27: Nyuma yo gusiganwa ibilometero 11 mbere yo kwinjira mu gasantere ka Kabuga, abakinnyi batatu barimo Suaza (Team Medellin), Mohd Zariff (Terengganu) na Teugels (Tarteletto) bacomotse mu gikundi basiga abandi. Ubu harimo ikinyuranyo cy’amasegonda 16.

10:25: Abakinnyi bo mu makipe arimo B&B Hotels, Total-Direct Energie, Benediction na Medellin ni bo bari imbere.

- Ubusesenguzi bw’Umunyamakuru Bigirimana Augustin

Umunyamakuru w’imikino kuri Royal FM, Bigirimana Augustin, yabwiye IGIHE ko etape ya Kigali-Rwamagana iza kuba ari ishiraniro cyane ko amakipe menshi aba ahatanye no gutangira ahagaze neza.

Yagize ati “Ni etape amakipe menshi akanira, gutsinda iya mbere biha ikipe yose uburyo iri bukine. Umukinnyi ukina afite maillot jaune, bisa nk’aho ari we ugenga isiganwa. Ikipe ifite uwo mukinnyi ni yo igena umuvuduko [cadence] abandi bagenderaho.’’

Bigirimana yavuze ko iyi etape bigoye ko yakwegukanwa n’Umunyarwanda kuko abakinnyi bo mu makipe akomeye baraba bashaka gufata umwanya wa mbere ku rutonde rusange.

Ati “Ku Banyarwanda biragoye ko hari uwabona maillot jaune. Areruya Joseph arajya iwabo [uyu musore avuka muri Rwamagana] ariko icyo ntigihagije kuvuga ko yakwitwara neza.’’

Iyi etape yahagurukiye mu Mujyi wa Kigali kuri Kigali Arena irasoreza muri Rwamagana nyuma yo kuzenguruka inshuro icumi muri uwo mujyi.

Bigirimana yavuze abakinnyi babigize umwuga aribo bahabwa amahirwe yo kwitwara neza.

Ati “Ibintu byo kuzenguruka bisaba gukomera mu mutwe kurusha uko wavuga kuhamenyera mu maguru. Abazungu ni yo wabazengurutsa inshuro nyinshi, birabarohora kuko baba barakuze babikora. Abanyaburayi ni bo mpa amahirwe.’’
Iyi etape ishobora gusozwa abakinnyi bari mu gikundi, yavuze ko ishobora gutwarwa n’umukinnyi wa Total Direct Energie na B&B Hotels.

- Icyafasha Abanyarwanda

Bigirimana yavuze ko icyafasha Abanyarwanda ari ukugumisha igare inyuma y’umukinnyi ukomeye ku buryo barangiza mu bihe bari kumwe.

Ati “Bagize Imana bakaguma mu masegonda atarenze icumi byabafasha kuguma hamwe. Hari amahirwe ko nka Uhiriwe Byiza Renus, uri mu ba-Sprinter beza ashobora gutungurana.’’

10:20: Abakinnyi bamaze kugenda ibilometero bitanu. Bageze ku Ruganda rw’Inyange bakiri mu gikundi. Ikipe Tarteletto-Isorex yo mu Bubiligi ni yo iyoboye igikundi.

10:20 Amateka ya Kigali na Rwamagana muri Tour du Rwanda

Umujyi wa Kigali umaze guhagurukirwamo n’uduce 73 twa Tour du Rwanda kuva iri rushanwa ribaye mpuzamahanga mu 2009.

Ku ruhande rwa Rwamagana, muri ako Karere ko mu Ntara y’Uburasirazuba, hamaze gusorezwa uduce tune, uyu munsi turaba dutanu kuva mu 2011 (agace ka kabiri). Indi myaka ni mu 2015 (agace ka mbere), 2017(agace ka gatanu) na 2018 (agace ka mbere).

- Team Rwanda yijeje kwitwara neza muri Tour du Rwanda

Kapiteni wa Team Rwanda, Mugisha Samuel, yabwiye IGIHE ko biteguye kwitwara neza mu irushanwa.

Ati “Twiteguye neza kandi twizeye ko tuza kwitwara neza mu gace k’uyu munsi no muri Tour du Rwanda yose muri rusange.’’

Uyu musore wegukanye Tour du Rwanda 2018 yasabye Abanyarwanda kubaba hafi no kubatera ingabo mu bitugu.

Yakomeje ati “Nubwo batazabasha gukurikirana isiganwa nk’uko bisanzwe bigenda, turabasaba ko aho bari hose bakomeza kudushyigikira kugira ngo tuzitware neza.’’

10:11 Ubu hatangiye kubarwa ibihe uhereye imbere y’Icyanya cy’Inganda i Masoro. Tugiye gukora intera y’ibilometero 115,6 biri busozwe no kuzenguruka inshuro 10 i Rwamagana.

10:00 Abakinnyi 80 b’amakipe 16 yitabiriye Tour du Rwanda uyu mwaka, bose bahagurutse kuri Kigali Arena. Barakora ibilometero bitandatu mbere y’uko hatangira kubarwa ibihe bageze mu Cyanya cy’Inganda i Masoro.

Inzira z’Agace ka mbere: Kigali- Rwamagana- Kigali

Agace ka mbere ka Tour du Rwanda 2021 kagiye guhagurukira kuri Kigali Arena mu gihe isiganwa risorezwa i Rwamagana nyuma yo gukora intera y’ibilometero 115,6.

Abakinnyi 80 bitabiriye isiganwa ry’uyu mwaka barava kuri Kigali Arena bazamuke kuri KIE- kwa Rwahama, Umushumba Mwiza – Inyange- Masaka Hospital- Kabuga – Rwamagana. Abakinnyi nibagera i Rwamagana kuri Dereva Hotel ahasorezwa isiganwa, barazenguruka inshuro 10 intera ya kilometero 6.5.

Agace ka mbere ka Tour du Rwanda 2021 karimo umusozi umwe utangirwaho amanota y’abahatanira umwenda w’abarusha abandi kuzamuka imisozi.

Ni umusozi wa Ntunga wo mu Karere ka Rwamagana uri ku kilometero cya 37 uturutse mu cyanya cy’inganda aho ibihe bitangirira kubarwa.

Abasiganwa bajya i Rwamagana baza kuzamuka bagera ku gasongero kawo bagahabwa amanota. Umukinnyi witwara neza kuri uyu musozi, arahembwa umwenda w’urusha abandi kuzamuka, ‘meilleur grimpeur’, umwenda utangwa na Cogebanque.

Hagati aho, SP iratanga amanota ku barusha abandi kunyonga igare kuri ‘sprint’ ku kilometero cya 49,9 kuri Sitasiyo yayo ya Rwamagana ndetse no ku kilometero cya 88,9.

IKAZE MURI TOUR DU RWANDA 2021

Murakaza neza mu Cyumweru cy’ibirori by’umukino wo gusiganwa ku magare mu Rwanda. Tubakiriye mu minsi umunani yo kuryoherwa n’isiganwa mpuzamahanga rizenguruka u Rwanda ‘Tour du Rwanda’ rigiye gukinwa ku nshuro ya 13.

  • Etape 1: Kigali - Rwamagana
  • Km: 115.6
  • Isaha yo guhaguruka: 10:00
  • Isaha yo gusoza: Hagati ya 12:53 na saa 13:01.

Tour du Rwanda ni cyo gikorwa cy’imikino cyonyine kigera mu Ntara zose z’u Rwanda kandi gikurikiranwa n’Abanyarwanda benshi badasabwe ikiguzi na gito, muri make ni ku buntu. Gusa, iry’uyu mwaka ririhariye kuko uretse kuba mu bihe bidasanzwe by’icyorezo cya COVID-19, ntirizagera mu Ntara y’Uburengerazuba.

Ni inshuro ya gatatu iri siganwa rigiye kuba riri ku kwego rwa 2.1 nyuma y’abiri aheruka, yegukanywe n’Abanya-Erythrée; Merhawi Kudus mu 2019 na Natnael Tesfazion mu 2020, ariko bombi bakaba bataritabiriye uyu mwaka.

Tour du Rwanda yatangiye gukinwa mu 1988, yabaye mpuzamahanga kuva mu 2009, aho yashyizwe ku cyiciro cya 2.2 kugeza mu 2018.

Itandukaniro ry’ibi byiciro byombi riba ko mu isiganwa riri kuri 2.1, amakipe yemerewe gutumirwamo arimo ayo mu cyiciro cya mbere ‘World Tour’ atarenze 50% y’amakipe yose agize isiganwa, n’amakipe yo mu cyiciro cya kabiri ‘Pro-Continental teams’, naho isiganwa riri ku cyiciro cya 2.2 ryo amakipe yemerewe gutumirwa ni ayo mu cyiciro cya gatatu gusa bita ‘Continental teams’ n’amakipe y’ibihugu yo ku mugabane irushanwa ryabereyeho.

Amafoto: Niyonzima Moses na Igirubuntu Darcy

Video: Mushimiyimana Azeem


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .