Abanyarwanda bari mu mikino Olempike ngo barahembwa amafaranga make ugereranyije n’abanyafurika bitabiriye iyi mikino.

Amakuru dukesha imbuga za french.irib.ir hamwe na afriquinfos.com avuga ko ikipe y’Abanyarwanda yitabiriye imikino ya Olempike ibera i Londres iri guhembwa nabi ugereranyije n’ibihugu byo mu karere birimo Uganda, Tanzaniya na Kenya byitabiriye iyi mikino.

Ni bande bahagarariye u Rwanda?

Iyi kipe igizwe n’abakinnyi bitabiriye amasiganywa yo kwiruka: Kajuga Robert na Mvuyekure Jean Pierre hamwe Mukasakindi Claudette.

Amakipe yandi arimo abakinnyi babiri bitabiriye amarushyanwa yo koga ari bo Niyomugabo Jackson na Agahozo Alphonsine.

Sekamana Uwase Fred Yannick we yitabiriye umukino wa Judo (Yarangije gusezererwa) hamwe na Niyonshuti Adrien witabiriye umukino wo gusiganwa ku magare (Cross Country).

Aba bakinnyi bose b’Abanyarwanda ngo bahabwa Amayero (Euros) 38 ku munsi mu gihe abayoboye ikipe bahabwa 53.

Abanyatanzaniya bo babona Amayero 40 ku munsi mu gihe abayobozi babo bahabwa 81.

Uganda yo yohereje abagihagarariye muri iyi mikino 16 n’ababaherekeje 18. Bo bahabwa Amayero 58 ku munsi mu gihe abayobozi bahabwa 285. Umuyobozi wungirije waherekeje ikipe we ahabwa 578 ku munsi.

Abagande bahembwe bahawe imidari ifite agaciro kangana na Amayero 8,000 (zahabu), 4,000 ku midari ya Argent n’Amayero 1,600 ku midari ya Bronze.

Abanyakenya bo bahabwa Amayero 97 ku munsi, abayobozi babo bagahabwa 244.

Abanyakenya bamaze guhembwa bahawe imidari ifite agaciro k’Amayero 1,954 (Zahabu), 1,465 y’ imidari ya argent na 977 ku midari ya Bronze.

Umukinnyi wahawe amafaranga menshi muri iki kiciro ni Umufaransa wahawe Amayero 50,000 n’umudari wa zahabu w’Amayero angana 20,000 hamwe n’undi wahawe umudari wa Bronze w’Amayero 13,000.