Ndayisenga Valens yagaragaye kuri uru rutonde nyuma yo kwegukana Tour du Rwanda 2016, ndetse n'umwanya wa mbere muri shampiyona ya Afurika yo gusiganwa ku magare mu batarengeje imyaka 23 umuntu ku giti cye n’ibindi bihembo bitandukanye.

Areruya Joseph w’imyaka 20 nawe yagize umwaka mwiza aho yegukanye umwanya wa kane mu bazamuka imisozi kurusha abandi muri La Tropicale Amissa Bongo 2016, isiganwa rya mbere muri Afurika, muri Vuelta a Colombia atahana umwanya wa gatanu mu bakiri bato, no muri shampiyona y’Isi y’abatarengeje imyaka 23 aba uwa 57 byanamuhesheje kubona ikipe y’ababigize umwuga ya Dimension Data yo muri Afurika y’Epfo yasinyiye umwaka.

Mugenzi wabo Nsengimana Jean Bosco ukinira Bike Aid mu Budage nawe yagaragaye mu bakinnyi 20 ba mbere muri Afurika beza ndetse bazatoranywamo uhembwa wahize abandi. Muri La Tropicale Amissa Bongo yasoje ari ku mwanya wa 22, muri Tour du Cameroun aba uwa gatatu mu bakiri bato naho muri Grand Prix Chantal Biya aba uwa gatatu ndetse n’ibindi bihembo yagiye yegukana.

Iki gihembo cyitwa ‘The best African cyclist of the year’ kizatangwa tariki 21 Ukuboza 2016 n’itsinda ry’Abanya-Gabon bategura isiganwa ry’amagare rikomeye kurusha ayandi muri Africa ‘La Tropicale Amissa Bongo’.

Ni ku nshuro ya gatanu kigiye gutangwa kuko cyashyizweho muri 2012 mu rwego rwo guha agaciro umukinnyi uba yaritwaye neza kuri uyu mugabane akaba atorwa n’itsinda riyobowe na Bernard Hinault wegukanye Tour de France inshuro eshanu, afatanyije n'abatoza, abayobozi ba siporo n’abanyamakuru batandukanye bo muri Afurika n’i Burayi.

Kuva cyatangira gutangwa cyegukanywe n’Umunya-Eritrea Natnael Berhane muri 2012, Umunyafurika y’Epfo, Louis Meintjes muri 2013, no muri 2014 na 2015 cyegukanwa n’Abanya-Eritrea Mekseb Debesay na Daniel Teklehaimanot.

Mu bagihatanira uyu mwaka Eritrea ifitemo abakinnyi bane, Algeria, Morocco, Afurika y'Epfo n’u Rwanda bikagiramo abakinnyi batatu.

Urutonde rw’abakinnyi 20, ibihugu bakomokamo n'amakipe bakinamo:

1. Abelouache Essaid (Morocco, Nasr Dubai)

2. Areruya Joseph (Rwanda)

3. Barbari Adil (Algeria, Nasr Dubai)

4. Berhane Natnael (Eritrea – Dimension Data)

5. Cisse Isiaka (Ivory Coast – SC Nice Jollywear)

6. Eyob Metkel (Eritrea – Dimension Data for Qhubeka)

7. Grmay Tsgabu (Ethiopia – Lampre-Merida)

8. Impey Daryl (Afurika y'Epfo – Orica BikeExchange)

9. Janse Van Rensburg Reinardt (Afurika y'Epfo – Dimension Data)

10. Jelloul Adil (Morocco – Skydive Dubaï)

11. Kamzong Clovis (Cameroon)

12. Lagab Azzedine (Algeria)

13. Lahsaini Mouhssine (Morocco)

14. Mansouri Abderrahmane (Algeria)

15. Meintjes Louis (Afurika y'Epfo – Lampre Merida)

16. Ndayisenga Valens (Rwanda – Dimension Data for Qhubeka)

17. Nsengimana Jean-Bosco (Rwanda – Team Stradalli-Bike Aid)

18. Okubamariam Tesfom (Eritrea – Sharjah Team

19. Sorgho Mathias (Burkina Faso)

20. Teklehaimanot Daniel (Eritrea, Dimension Data)