Tour du Rwanda 2021 iri kuba ku nshuro ya 13 kuva ibaye mpuzamahanga, yatangiye ku Cyumweru tariki ya 2 Gicurasi, aho izasozwa ku Cyumweru tariki ya 9 Gicurasi 2021.

Umuyobozi Mukuru wa Canal+ Rwanda, Sophie Tchatchoua, yavuze ko bahisemo kujya berekana incamake za buri gace k’isiganwa ka Tour du Rwanda mu rwego rwo gufasha abafana batemerewe kureba iri rushanwa kubera icyorezo cya COVID-19.

Ati “Mu rwego rwo gukomeza kugeza ibyiza ku bakiliya ba Canal+ ndetse no gukomeza kwirinda ikwirakwizwa ry’icyorezo cya Covid-19, Canal+ yatekereje ku bafana b’amagare maze ibagenera kubereka incamake zisesenguye ku irushanwa rya buri munsi kuri Canal+Sport1 batavuye mu rugo, kandi bareba amashusho meza cyane.”

Canal+ isanzwe ari umuterankunga w’irushanywa rya Tour du Rwanda kuva ryatangira.

Incamake z’iri rushanwa ziri kunyura kuri shene ya Canal+ Sport 1 iboneka ku ifatabuguzi rya IKAZE rigura amafaranga 5000 gusa ku kwezi.

Tour du Rwanda 2021 izakomeza ku wa Kabiri tariki ya 4 Gicurasi 2021 hakinwa agace ka gatatu kazahagurukira i Nyanza kerekeza i Gicumbi ku ntera y’ibilometero 171,6, aka ni ko karekare kari mu isiganwa ry’uyu mwaka.

Umuyobozi mukuru wa Canal+ Rwanda, Sophie Tchatchoua (hagati) hamwe n'abakozi ba Canal +

Imodoka yifashishwa na Canal + Rwanda muri Tour du Rwanda 2021