Kuri uyu wa Gatandatu tariki 1 Ukuboza 2018, abakinnyi 25 b'amakipe umunani y’umukino wo gusiganwa ku magare nibo bitabiriye iri siganwa, biyongeraho Areruya Joseph ukina muri KTN Delko Marseille yo mu Bufaransa uri mu biruhuko mu Rwanda.

Aba bakinnyi bahagurutse mu Mujyi wa Nyanza saa tatu.

Barenze mu Ruhango bakiri kumwe ariko basatira mu Byimana, Uwiduhaye na Bonaventure Uwizeyimana ba Benediction Club bashyira igare imbere batangira gusiga igikundi.

Bazamutse i Kabgayi aba bakinnyi babiri bari kumwe ariko binjiye i Muhanga Alexis Nizeyimana wa Nyabihu Cycling club na Mfitumukiza Jean Claude wa Huye CCA bakoresha imbaraga nyinshi nabo basiga igikundi basatira abari imbere.

Binjiye i Nyabugogo banyura mu duce twa; Yamaha – ku Kinamba – UTEXRWA – Kibagabaga – Kimironko – Zindiro – Special Economic zone – no ku Mulindi.

Basohotse mu Mujyi wa Kigali bafata akarere ka Rwamagana, Gasore Hategeka wa Nyabihu Cycling Club na Seth Hakizimana wa Les Amis Sportifs y'i Rwamagana banyoga igare bakurura igikundi gifata itsinda ry'abakinnyi bane bari imbere.

Gasore na Hakizimana ntibadohotse, bahise babacaho barenga i Nyagasambu bari imbere, banasesekara mu Mujyi wa Rwamagana bayoboye isiganwa.

Gasore Hategeka yatsinze isiganwa mu bagabo naho mu bagore hatsinda Tuyishime Jacqueline wa Benediction Club.

Iri siganwa Areruya Joseph ntabwo yakoresheje imbaraga nyinshi kuko yasoreje ku mwanya wa cyenda.

Uko abakinnyi bakurikiranye:

1. Gasore Hategeka (Nyabihu Cycling Club): 3h49’15”
2. Hakizimana Seth (Les Amis Sportifs): 3h49’15”
3. Moise Mugisha (Fly Cycling Club): 3h49’15”
4. Hakiruwizeye Samuel (Huye Cycling Club): 3h49’17”
5. Nkurunziza Yves (Benediction Club): 3h49’17”
6. Niyireba Innocent (Benediction Club): 3h49’21”
7. Gashiramanga Eugene (Les Amis Sportifs): 3h49’35”
8. Rugamba Janvier (Les Amis Sportifs): 3h49’38”
9. Areruya Joseph (KTN Marseille Province): 3h53’50”
10. Dukuzumuremye Fidele (Fly Cycling Club): 3h53’50”