Iyi shampiyona yasojwe kuri iki Cyumweru, tariki ya 3 Nyakanga 2022, aho abasiganwa bahagurukiye i Kanyinya banyura i Gicumbi, basoreza i Gasanze.

Manizabayo Eric ‘Karadiyo’ yasoje ku mwanya wa mbere mu cyiciro cy’abakuru basiganwe ku ntera y’ibilometero 128,8, aho yakoresheje 3h16’12’’.

Yakurikiwe na Iradukunda Emmanuel wa Nyabihu Cycling Team yarushije umunota umwe n’amasegonda 33. Uyu anganya ibihe na Munyaneza Didier [3] na Nzafashwanayo Jean Claude [5] ba Protouch yo muri Afurika y’Epfo na Muhoza Eric udafite ikipe.

Iyi shampiyona yasojwe n’abakinnyi 30, mu gihe byari biteganyijwe ko 46 ari bo bari bwitabire isiganwa.

Manizabayo ‘Karadiyo’ yegukanye Shampiyona y’Igihugu y’Amagare ya 2022

Mu Cyiciro cy’Abatarengeje imyaka 23 uwahize abandi ni Iradukunda Emmanuel ukinira Nyabihu Cycling Team wakoresheje 3h12’45’’.

Mu ngimbi, Shyaka Janvier yahize abandi akoresheje 02h38’57" ku ntera y’ibilometero 89,6, yakurikiwe na Ntirenganya Moïse bakina nk’abakinnyi bigenga.

Mu cyiciro cy’abari n’abategarugori, Ingabire Diane ni we wasoje ku mwanya wa mbere. Uyu mukobwa yakoresheje 02h52’22", arusha amasegonda 20 Tuyishime Jacqueline bakinana muri Benediction Ignite.

Mu bangavu, Djazilla Umwamikazi ukinira Les Amis Sportifs, ni wegukanye umwanya wa mbere.

Mu kiganiro n’itangazamakuru, Manizabayo Eric, yavuze ko yiteguye gukomeza guhangana ku rwego rwo hejuru.

Ati “Ikipe yanjye yabanje gukurura kugira ngo ngende. Iyo bataza kubikora ntabwo nari kubasha kugenda rero bamfashije cyane. Iyo ngiye kuriya mba nzi ko nza kugerayo kuko abandi baba babaruhije cyane. Nanjye nabitekerezaga ko bishoboka kuba natsinda cyangwa ntibishoboke. Uyu munsi byakunze rero, ndashimira Imana na bagenzi banjye, umutoza n’abadufashije ngo irushanwa rigende neza.”

Umwamikazi wahize abandi mu bakobwa bakiri bato yavuze ko kuri we ari ishema kandi yiteguye gukomeza guharanira kwambara umwambaro uriho ibendera ry’igihugu mu marushanwa yose azitabira.

Shampiyona y’Umukino wo gusiganwa ku magare yari imaze imyaka ibiri idakinwa kubera icyorezo cya Covid-19; yatangiye ku wa Gatandatu tariki ya 2 Nyakanga 2022 mu Karere ka Bugesera aho abakinnyi batangiye basiganwa n’ibihe (ITT).

Ni irushanwa ryitabiriwe n’amakipe agera kuri 19 ndetse n’abandi bakinnyi baryitabiriye badafite ikipe babarizwamo mu byiciro bitandukanye birimo abakuru, abato n’abatarengeje imyaka 23 mu bagore n’abagabo.

Mu isiganwa ryo ku wa Gatandatu, abakinnyi biganjemo abakiri bato ni bo begukanye isiganwa; barimo Mwamikazi Jasilla wahize abandi mu bakobwa bakiri bato na Tuyizere Hashim mu bahungu bombi ba Les Amis Sportifs y’i Rwamagana.

Mu batarengeje imyaka 23 mu bahungu ryegukanwe na Kagibwami Swaibu mu gihe Ingabire Diane wa Benediction Club ari we wahize abandi bose mu cyiciro cy’abakuru mu bakobwa.

Muri iyi shampiyona yitabiriwe n’amwe mu makipe akomeye yo ku Mugabane wa Afurika arimo Protouch ikinwamo n’abasore b’Abanyarwanda barimo Mugisha Samuel na Munyaneza Didier witwaye neza mu gusiganwa n’ibihe, ITT.

–  Abakinnyi baje hafi mu isiganwa ryo mu muhanda ‘road race’ abakuru n’abatarengeje imyaka 23

1. Manizabayo Eric: 3h16’12”
2. Iradukunda Emmanuel wa Nyabihu Cycling Team: 03h17’45
3. Munyaneza Didier wa Protouch: 03h17’45”
4. Muhoza Eric: 03h17’45’’
5. Nzafashwanayo Jean Claude wa Protouch: 03h17’45”
6. Niringiyimana Ramadhan: 03h17’47
7. Uhiriwe Byiza Renus wa NICE OBOR: 03h18’20”
8. Kagibwami Suayibu wakoresheje: 03h18’20”
9. Tuyizere Etienne wa Benediction Ignite: 03h18’20”
10. Niyonkuru Samuel: 03h18’20’’

–  Batatu ba mbere mu ngimbi

1. Shyaka Janvier: 02h38’57’’
2. Ntireganya Moïse: 02h38’57’
3. Nshutiraguma Kevin wa Cine Elmay Cylcyling Club: 02h38’57’

–  Batanu mu bari n’abategarugori

1. Ingabire Diane wa Benediction Club: 02h52’22”
2. Tuyishime Jacqueline wa Benediction Club: 02h52’42”
3. Mukashema Josiane wa Benediction Club: 02h52’42”
4. Nyirarukundo Claudette wa Benediction Club: 02h52’53”
5. Umwamikazi Djazilla wa Les Amis Sportifs: 02h53’07”

Manizabayo Eric ‘Karadiyo’ yakoresheje 3h16’12’’ ku ntera y’ibilometero 128,8. Yageze ku murongo wo gusorezaho ari uwa mbere

Shampiyona y'Igihugu y'Amagare ihuza abakinnyi bakina imbere mu gihugu no hanze yacyo

Iradukunda Emmanuel yabaye uwa Kabiri mu Bagabo Bakuru n'uwa Mbere mu Batarengeje imyaka 23

Rugamba Janvier (hagati) ari mu bitabiriye iyi shampiyona

Iyi mikino yaherukaga gukinwa mu 2019, yari imaze imyaka ibiri itaba kubera icyorezo cya COVID-19

Abasiganwa banyura mu mihanda ya Rulindo binjira mu Karere ka Gasabo

Manizabayo 'Eric' yari afite akanyamuneza

Umwamikazi Djazilla yishimiye gusoreza ku mwanya wa mbere mu bangavu

Shyaka Janvier yabaye uwa mbere mu Cyiciro cy'Ingimbi

Ingabire Diane wa Benediction Club yegukanye umwanya wa mbere mu cyiciro cy'abagore muri Shampiyona y'u Rwanda yo gusiganwa ku Magare

Iradukunda Emmanuel ni we wegukanye umwanya wa mbere mu batarengeje imyaka 23

Amafoto: Ferwacy