Kuri uyu mugoroba wo ku ya 5 Ukuboza 2014, Perezida wa Repubulika y’u Rwanda Paul Kagame arakira Ndayisenga Valens watwaye igihembo kiruta ibindi muri “ Tour du Rwanda 2014”.

Amakuru agera ku IGIHE aravuga ko Umukuru w’Igihugu yakira n’abandi bakinnyi b’Abanyarwanda batandukanye bagiye bigaragaza ku rwego mpuzamahanga.

Perezida Kagame yari aherutse gushimira Ndayisenga mu butumwa yacishije kuri Twitter buvuga ko ashimiye uwatwaye Tour du Rwanda, Valens Ndayisenga n’abaryitabiriye bose.

Ndayisenga w’imyaka 20 y’amavuko yegukanye Tour du Rwanda akoresheje amasaha 24, iminota 57 n’amasegonda 10 (24h57’10") ku ntera ya kirometero 933.8.

Yakurikiwe na Nsengimana Jean Bosco amurusha amasegonda 53 naho Umunya Eritrea Debretsion Aron aba uwa gatatu asizwe umunota n’amasegonda 34.

Mu bandi Banyarwanda biteguwe kwakirwa n’Umukuru w’igihugu kuri uyu mugoroba, harimo Hermass Muvunyi watwaye umudali wa zahabu muri m 800 mu mikino y’Isi y’abamugaye yabereye i Lyon mu Bufaransa mu mwaka wa 2013.

[email protected]