CR4C Roanne iri muri gahunda yo kwiyubaka, yatangaje ko Uhiriwe ari mu bakinnyi bazayikinira mu mwaka utaha w’imikino wa 2023.

Uhiriwe yasinyiye CR4C Roanne akuwe muri Team Qhubeka yo muri Afurika y’Epfo, yari amazemo imyaka ibiri kuko yayigezemo mu 2020.

Uyu musore yatangarije ku rukuta rwa Facebook rw’Ikipe ya CR4C ko yishimiye gusinyira iyi kipe yo mu Bufaransa.

Yakomeje ati “CR4C yizeye ubushobozi bwanjye bwo gutanga umusaruro. Uyu mwaka ni amahirwe adasanzwe kuri njye. Kubera urwego rw’imikino ku Mugabane w’u Burayi, nzakomeza kwitwara neza no kwitegura Imikino Olempike. Nizeye kuzatwara amasiganwa meza mu 2023.’’

Uhiriwe w’imyaka 21 amaze kwandika izina mu gusiganwa ku magare. Yamenyekanye akinira Benediction Ignite y’i Rubavu mbere yo kwerekeza muri NTT Pro Cycling yo muri Afurika y’Epfo [ubu yabaye Team Qhubeka].

Uyu mukinnyi yatwaye Shampiyona y’u Rwanda ya 2018 mu gusiganwa n’ibihe, yegukanye umudali wa zahabu muri Shampiyona ya Afurika yabereye muri Ethiopia mu 2019 mu cyiciro cy’ingimbi ndetse yegukanye Rwanda Cycling Cup ya 2019. Mu 2020, yasoreje ku mwanya wa 16 muri La Tropicale Amissa Bongo.

Uhiriwe Byiza Renus muri uyu mwaka yitabiriye Tour du Rwanda ariko ntiyabasha kuyisoza ndetse yanakinnye Shampiyona Nyafurika.

Uhiriwe Byiza Renus ari mu bakinnyi b’Abanyarwanda baheruka guserukira igihugu muri Shampiyona y’Isi y’Amagare mu Batarengeje imyaka 23 yabereye mu Mujyi wa Wollongong muri Australia muri Nzeri 2022. Icyo gihe uyu musore na mugenzi we Iradukunda Emmanuel basiganwe mu mihanda ntibasoje isiganwa kubera ikibazo cy’ubukonje.

Direct Velo yanditse ko Uhiriwe yabaye uwa gatanu wasinyiye ikipe ya CR4C Roanne muri uyu mwaka w’imikino. Abandi barimo Rémy Bathiard na Thomas Salvatori.

Club Routier des 4 Chemins de Roanne (CR4C Roanne) ni ikipe yashinzwe mu 1924.

Uhiriwe Byiza Renus yabonye ikipe nshya azakinira mu Bufaransa