Ku wa 24 Mutarama 2023 nibwo abayobozi ba Polisi batandukanye bo mu bihugu bigize umuryango EAPCCO bahuriye i Kigali, mu nama yo kunoza imyiteguro ya y’iyi mikino.

Kuru uyu wa Gatanu tariki ya 17 Werurwe 2023, Ubuyobozi bwa Polisi y’u Rwanda izakira iyi mikino, bwagaragaje ndetse bunasobanura aho imyiteguro kuri iri rushanwa mpuzamahanga igiye kwakira rigeze.

Ni irushanwa rizitabirwa n’ibihugu umunani. Bitewe n’imikino izakinwa, abakinnyi bose hamwe ndetse n’abasifuzi kuri iyi mikino bakazaba barenga 1000.

CP Bruce Munyambo, Umuyobozi w’Ishami rya Polisi rishinzwe Imikoranire ya Polisi n’Abaturage yasobanuye ko aba bakinnyi bose bazaturuka mu bihugu umunani byemeye kurushanwa.

Yagize ati “Abakinnyi 1,114 bazarushanwa mu mikino 13 no mu makipe 83 azaturuka mu bihugu umunani. U Rwanda rwiteguye kwakira EAPCCO Games ku nshuro yaryo ya kane mu 2023.”

Ibihugu bizitabira birimo Uganda, Sudan y'Epfo, Burundi, Ethiopia, Kenya, Sudani y’Epfo, Sudani n’u Rwanda ruzaryakira.

Imikino bazahatanamo kuva tariki ya 21 kugeza 27 Werurwe 2023,
irimo Gusiganwa Ku maguru, Iteramakofe, Kumasha, Ruhago, Kurasa, Basketball, Handball, Judo, Karate, Taekwondo, Netball, Volleyball.

Umuvugizi wa Polisi, CP John Bosco Kabera, yahamagariye Abanyarwanda bose kwitabira iyi mikino cyane ko uburyo bwo kuyireba bworoherejwe buri muntu wese.

Ati “Muratumiwe kuza gushyigikira amakipe yanyu kuko kuyireba ntabwo bizishyuzwa. Nubwo ari aya Polisi ariko, ahagarariye igihugu kandi nyuma y’amarushanwa ibihugu bizaba byitwaye neza bizahembwa.”

Imikino izabera ku bibuga byateganyijwe bizifashishwa birimo na ‘Kigali Pelé Stadium’ iherutse kuvugururwa no guhindurirwa izina ndetse n’izabera BK Arena mu mikino ya nyuma y’amaboko.

EAPCCO ni umuryango ushinzwe kubahiriza amategeko, uhuza ibihugu 14 byo mu karere washinzwe mu 1998 hagamijwe guhuza imbaraga za Polisi mu gukemura ibibazo by’umutekano bishamikiye ku byaha ndengamipaka.

Imikino ni imwe mu bishyirwamo imbaraga n’ibihugu bigize uyu muryango hagamijwe guhuza inzego zishinzwe kubahiriza amategeko mu karere mu rwego rwo gushyira mu bikorwa intego zawo.

Ishami rya Polisi Mpuzamahanga (Interpol) mu Karere rifite icyicaro i Nairobi muri Kenya, rivuga ko siporo ifatwa nk’igikoresho cy’ingenzi mu guhanahana amakuru no kurwanya ibyaha.