Buri kipe uko ari 16 azaba yitabiriye CHAN izaba ifite imodoka yayo ifite imyanya irenga 40 yo kwicaramo. Ni imodoka zigezweho zisigaye zikoreshwa n’amakipe muri iki gihe.

Izi modoka ni izo Minisiteri y’Umuco na Siporo yakodesheje n’ikompanyi imwe itwara abagenzi mu Rwanda nyuma y’imikino zikazakoreshwa n’iyo sosiyete.

Amakipe azitabira CHAN ni Rwanda, Côte d’Ivoire, Maroc, Gabon ari mu itsinda rya mbere; DRC, Ethiopia, Cameroon, Angola ari mu itsinda rya kabiri; Tunisia, Guinea, Niger, Nigeria ari mu itsinda rya gatatu naho itsinda rya kane ririmo Zimbabwe, Zambia, Uganda na Mali.

Bwa mbere imikino ya CHAN yabaye 2009, yakiniwe muri Côte d’Ivoire, igikombe cyegukanywa na Repubulika Iharanira Demokarasi ya Congo itsinze Ghana ibitego bibiri ku busa.

Ku nshuro ya kabiri irushanwa rya CHAN, ryabereye muri Sudani hari mu mwaka 2011. Igikombe cyegukanywe na Tunisia nyuma yo gutsinda Angola ibitego bitatu ku busa.

Ku nshuro ya gatatu irushanwa muri Afurika y’Epfo mu mwaka 2014, ni nyuma yaho igihugu cya Libya kitaryakiriye kubera imvururu zakirangwagamo.

Libya nubwo itakiriye imikino niyo yegukanye igikombe nyuma yo gutsinda ikipe ya Ghana kuri Penaliti 4-3 mu gihe umukino wari warangiye nta kipe ibashije gutsinda indi igitego.

Irushanwa rya CHAN 2018 biteganyijwe ko rizabera muri Kenya, naho CHAN 2020 ikazabera muri Ethiopia.

Zikoreshwa n'ahandi mu gutwara amakipe

Ni imodoka zifite imyanya 40

Buri kipe izaba ifite imodoka yayo iyijyana ku myitozo, ku mikino n'ahandi