Kalimpinya ari mu bitwaye neza muri muri Shampiyona Nyafurika ya Rally

00:00:00 IGIHE NETWORK

KINYARWANDA

ENGLISH

FRANCAIS

Kalimpinya ari mu bitwaye neza muri muri Shampiyona Nyafurika ya Rally

Yanditswe na Iradukunda Olivier

Kuya 10 May 2026 saa 08:51

Yasuwe :

Yavuzweho:

Umunyarwandakazi Queen Kalimpinya wari mu bakinnyi barenga 50 bitabiriye Shampiyona Nyafurika yo gusiganwa mu modoka, yegukanye umwanya wa kabiri mu Cyiciro cya Kabiri (ARC2).

Ku wa Gatandatu, tariki ya 9 Gicurasi 2026, ni bwo mu mihanda ya Mbarara muri Uganda hakiniwe rimwe mu masiganwa y’imodoka akomeye muri Afurika abera mu mihanda y’igitaka rya ‘Pearl of Africa Uganda Rally 2026’.

Kalimpinya utari witabiriye umunsi wa mbere, yakinnye ku munsi wa nyuma ndetse yitwara neza mu cyiciro yari ahatanyemo cya ARC2 cyarimo imodoka esheshatu.

Uwabaye uwa mbere muri iki cyiciro ni Umunya-Kenya, Samman Vohra ukinana na Drew Sturrock mu modoka ya Skoda Fabia Evo. Queen Kalimpinya wakinanaga na Gasarabwe Alain yabaye uwa kabiri bari mu modoka ya Subaru Impreza WRX STi 4 D R4.

Mu kiganiro Kalimpinya yagiranye na IGIHE nyuma y’iri rushanwa, yavuze ko ari ishema kuri we no ku gihugu, ndetse ari amarembo afunguye yo kwitabira n’andi marushanwa akomeye yisumbuyeho.

Ati “Ntabwo byari byoroshye, kuko guhangana n’abakinnyi bakomeye gutya muri Afurika ntabwo bisanzwe. Kuba dusoje kandi tugasoza neza, ni icyerekana ko mu minsi iri imbere tuzakina n’andi marushana akomeye kandi tukitwra neza.”

Mu cyiciro cya mbere cya Shampiyona Nyafurika cyegukanywe na Karan PATEL, uyu Kalimpinya wari umukinnyi wenyine witabiriye avuye mu Rwanda, yabaye uwa munani.

Amasiganwa ya Shampiyona Nyafurika azakomereza mu Rwanda, aho hazakinwa Rwanda Mountain Gorilla Rally, kuva tariki ya 10 kugeza ku ya 12 Nyakanga 2026.