Kuri uyu wa Mbere, tariki ya 31 Mutarama 2022, ni bwo AS FAR yatangaje ko yasinyishije Manzi Thierry w’imyaka 26.

Uyu mukinnyi wo hagati mu bwugarizi, agiye muri iyi kipe ya gisirikare muri Maroc aho asanzemo Imanishimwe Emmanuel ‘Mangwende’ bakinanye muri APR FC.

Manzi Thierry yakiniraga FC Dila Gori yo mu Cyiciro cya Mbere muri Georgia yagezemo mu mezi atandatu ashize ndetse akaba yabonaga umwanya wo gukina nubwo atari mu bakinnyi babanzamo buri munsi.

Manzi Thierry yakiniye Marines FC na Rayon Sports yamazemo imyaka ine mbere yo kwerekeza muri APR FC mu 2019.

Ni umwe mu bari bagize Rayon Sports yatwaye Shampiyona ya 2016/17 n’iya 2018/19, inagera muri ¼ cya CAF Confederation Cup mu 2018.

Si we mukinnyi wenyine AS FAR yaguze kuri uyu munsi wa nyuma w’igura n’igurisha kuko iyi kipe yo muri Maroc yatangaje ko yanaguze rutahizamu w’Umunyafurika y’Epfo Darren Smith ufite imyaka 25.

Manzi Thierry yatangajwe nk'umukinnyi mushya wa AS FAR y'i Rabat muri Maroc

Manzi yavuye muri APR FC ajya gukina i Burayi muri Georgia muri Nyakanga 2021

Uyu wabaye Kapiteni wa Rayon Sports ari mu bageranye na yo muri 1/4 cya CAF Confederation Cup mu 2018/19

Manzi Thierry asanzwe ahamagarwa mu Ikipe y'Igihugu 'Amavubi'