Iri siganwa ryitabiriwe ku rwego rwo hejuru ritegurwa na ‘Gasore Serge Foundation’, umuryango watangijwe na Gasore Serge wahoze ari umukinnyi usiganwa ku maguru ukomeye mu Rwanda.

Iri siganwa ryabaga ku nshuro ya kane ryatangijwe ku mugararo na Minisitiri wa Siporo n’Umuco, Uwacu Julienne, ari kumwe na Guverineri w’Intara y’Iburasirazuba, Mufurukye Fred na Meya w’Akarere ka Bugesera, Richard Mutabazi.

Ryari rigabanyijemo ibice bitandukanye hari abagombaga gusiganwa ku maguru mu kwiruka ibirometero 20 mu bakobwa n’abahungu; ingimbi n’abangavu bagomba kwiruka ibirometero umunani (8 km); icyiciro cy’abiruka bishimisha basiganwe ibirometero bitatatu (3 Km); hakaba n’icyiciro cy’abasiganwe ku magare ku ntera ya 40 km mu cyiciri cy’ abakobwa n’abahungu.

Nk’uko bikunze kuba byitezwe ko bigoye kugira umukobwa ihigika Nyirarukundo Salome, n’ubundi niwe wegukanye umudali wa zahabu akoresheje 1h10’21” mu rugendo bahereye kuri La Palisse Hotel Nyamata bajya ku Gahembe, bagakata bagasubira kuri La Palisse, akurikirwa na Yankurije Marthe wakoresheje 1h10’32” naho Ishimwe Beathe akoresha 1h16’32” aba uwa gatatu.

Mu bagabo, isiganwa ryari ryitabiriwe n’abakinnyi bose bafite amazina akomeye ryegukanwa na Hitimana Noel wakoresheje iminota 58’ n’amasegonda 25” (58’25’) akurikirwa na Sugira James akoresheje iminota 58’28”; Muhitira Felicien uzwi nka Magare aba uwa gatatu akoresheje iminota 58’ 46” naho Ntawuyirushintege Potien asoza ari uwa kane akoresheje iminota 59’34”.

Uretse imidali, Nyirarukundo na Hitimana babaye aba mbere bahawe ibihumbi 200 Frw banongerwaho n’amatike y’indege izabajyana i Dubai gutembera, bakishyurirwa amahoteli n’ibindi bazakenera.

Nyirarukundo yashimiye cyane Gasore utegura iri rushanwa, avuga ko nk’abakinnyi bibatera ishema kwitabira igikorwa cya mugenzi wabo wababanjirije mu mwuga ndetse ashimangira ko bitewe n’uburyo riba riteguye, rifasha n’abafite impano zitazwi kwigaragaza.

Mu kwiruka ibirometero umunani, Nizeyimana Sylvain w’i Nyamasheke yabaye uwa mbere mu bahungu, akurikirwa na Nkejumuto Ildephonse na Nzayisenga Epimaque bakinira Ntarama AC.

Muri iki cyiciro, mu bakobwa ni Ibishatse Ange wa Mountain Classic wabaye uwa mbere akurikirwa na Niyirora Primitive wa NAS naho Mutuyimana Epiphanie wa Mountain Classic aba uwa gatatu.

Mu magare, Kayumba Jerome w’imyaka 18 uvuka i Nyabihu yaje imbere mu bahungu akoresheje iminota 55’59” akurikirwa na Ndayambaje Djuma nawe w’i Nyabihu akoresheje iminota 56’19”, Bizimana Théogène
w’i Muhanga aba uwa gatatu akoresheje iminota 56’22”.

Mu bakobwa, ryegukanwe na Ntakirutimana Marthe w’imyaka 16 wakoresheje 1h05’58”, uwa kabiri aba Manishimwe Jeannette wakoresheje 1h09’16”, akurikirwa na Nzayihiki Skolastique wakoresheje 1h11’55’’.

Aba mbere bakaba bahawe amagare mashya, ibahasha irimo amafaranga, bongerwaho igihembo cyo kuzajya kwitoreza muri Kenya uyu mukino; aba kabiri bahawe amagare n’ibahasha naho abandi kugera ku wa gatandatu bahawe ibahasha gusa.

Guverineri w’Intara y’Iburasirazuba, Mufurukye Fred, yashimiye Gasore ku bikorwa by’intangarugero akora bigamije kunganira leta mu gushakira ubuzima bwiza Abanyarwanda, anasaba abatuye Bugesera gukunda siporo cyane, abafite impano zikaba zabatunga.

Nyuma yo gutanga ibihembo, La Palisse Hotel Nyamata yakiriye iri rushanwa, yaremeye abacitse ku icumu batatu, buri umwe imuha inka hanakurikiraho igikorwa cyo gusura urwibutso rwa Ntarama, kwibuka no kunamira abazize Jenoside.

Iri rushanwa ryitabiriwe n’abantu bagera ku 2000, barushanwa mu byiciro bitandukanye.

Mbere yo gutangira irushanwa, hafashwe umunota wo kwibuka abazize Jenoside yakorewe Abatutsi mu 1994

Ubwo abasiganwe mu birometero 20 bahagurukaga

Abasiganwe ku magare bakoreshaga asanzwe

Abasiganwe ku magare bitegura gutangira

Depite Mukarugwiza Annonciataari mu basiganwe mu birometero bitatu

Nyirarukundo Salome yanikiye abo bari bahanganye mu birometero 20 yegukana umudali wa zahabu

Iri siganwa ryitabiriwe n'abarenga 2000

Meya w'Akarere ka Bugesera, Mutabazi Richard, yasiganwe mu birometero bitatu

Mu birometero 20 Hitimana yageze ku murongo akurikiwe na Sugira James

Mu kwiruka ibirometero bitatu hari higanjemo abana

Gasore Serge yashimiye abamuteye inkunga mu mafaranga n'ibitekerezo mu gutegura iri siganwa

Kanyombya wamamaye mu mafilime yo mu Rwanda yasusurukije abari bitabiriye irushanwa

Guverineri w'Intara y'Iburasirazuba, Mufurukye Fred, yashyikirije inkuyo n'inkoni umwe mu babyeyi barokotse Jenoside bagabiwe

Umuntu wese witabiriye iri siganwa MTN yamuhaye umudali w'ishimwe

Uwa mbere n'uwa kabiri mu gutwara amagare bahawe amagare mashya

Ubishaka wese wiyandikishije yari yemerewe kwitabira 20 km de Bugesera mu cyiciro ashaka