Ikipe ya Leicester City iri ku mwanya wa kabiri ku urutonde rw’agateganyo rwa shampiyona n’amanota 44 yari yasuye Aston Villa iri ku mwanya wa nyuma n’amanota 12, ariko inanirwa kuyikuraho amanota yose ngo ikomeze kuyobora urutonde.

Shanji Okazaki yafunguye amazamu ku ruhande rwa Leicester City ku munota wa 29, kuwa 33 ibona penaliti Riyard Mahrez arayihusha, maze mu gice cya kabiri ku munota wa 75 Rudy Gestede atsindira Aston Villa igitego cyo kwishyura, umukino urangira ari kimwe ku kindi.

Manchester City yo yihanangirije Crystal Palace iyinyagira ibitego bine ku busa harimo icya Fabian Delph wafunguye amazamu ku munota wa 22, Aguero ashyiramo bibiri ku munota wa 41 n’uwa 69 naho ku munota wa 84 David Silva nawe ashyiramo igitego cya kane ari nako umukino warangiye.

Umukino wa Chelsea na Everton warangiye amakipe yombi atsindanye ibitego bitatu kuri bitatu. Nyuma y’uko iminota 90 isanzwe y’umukino yari irangiye ari ibitego bitatu bya Everton kuri bibiri bya Chelsea.

Chelsea yatabawe na kapiteni wayo John Terry, wayitsindiye igitego cyo kunganya ku munota wa nyuma w’igihe cy’inyongera. Iki gitego cyababaje abakunzi ba Everton bavuze ko iminota y’inyongera yari yarangiye kandi ko Terry yari yaraririye nk’uko amashusho yabigaragaje nyuma y’umukino.

Muri uyu mukino, John Terry yitsinze igitego cya mbere ku munota wa 50, Kevin Mirallas ashyiramo icya kabiri ku munota wa 56, kuwa 90 Ramino Funes Mori atsinda icya gatatu naho ku ruhande rwa Chelsea ibitego byatsinzwe na Diego Costa ku munota wa 64, Fabregas ku munota wa 66 na John Terry watsinze igitego cya nyuma ku munota wa karindwi w’inyongera.

Manchester United ibifashijwemo na kapiteni Wayne Rooney yakuye amanota atatu kuri Liverpool bigoranye ku gitego kimwe yatsinze ku munota wa 78 w’umukino.

Ikipe ya Arsenal yo yananiwe gutsinda Stoke City kugira ngo itangire gushyiramo ikinyuranyo hagati yayo na Leicester yari yatakaje bituma zongerera Man City amahirwe ku gikombe, kuko ubu Arsenal na Leicester zinganya amanota 44 zikarusha Manchester City inota rimwe gusa.

Imikino yabaye kuwa Gatandatu

Tottenham 4-1 Sunderland

AFC Bournemouth 3-0 Norwich

Chelsea 3-3 Everton

Man City 4-0 Crystal Palace

Newcastale 2-1 West Ham

Southampton 3-0 West Brom

Aston Villa 1-1 Leicester City

Imikino yo ku Cyumweru

Liverpool 0-1 Man United

Stoke City 0-0 Arsenal

Kuwa mbere hari umukino umwe

Swansea City vs Watford

Diego Costa yafunguye amazamu atsindira Chelsea igitego cya mbere

Umukino wa Chelsea na Everton warangiye baguye miswi

Wayne Rooney yatsindiye Manchester United igitego kimwe cyabonetse mu mukino batsinze Liverpool