Iyi shampiyona yitabiriwe n’abakinnyi 250 bakina imikino itandukanye irimo kwiruka, umupira w’amaguru no koga, yatangijwe ku mugaragaro n’abayobozi batandukanye barimo Perezida w’Umuryango wita ku bafite ubumuga bwo mu mutwe ‘Special Olympics’, Pasiteri Deus Sangwa.

Mu kwiruka metero 100 mu bahungu, Munyemana Yves wo mu Karere ka Nyarugenge niwe wabaye uwa mbere akoresheje amasegonda 15 n’iby’ijana 81 akurikirwa na Mbarushimana Amza wo mu Karere ka Nyarugenge wakoresheje amasegonda 16 n’iby’ijana 86 Muhire Sinzizwa wo mu kigo Izere Mubyeyi aba uwa gatatu akoresheje amasegonda 16 n’iby’ijana 99.

Mu bakobwa, Rwibutso Sandrine wo mu Karere ka Rulindo yegukanye umwanya wa mbere akoresheje amasegonda 21 n’iby’ijana 04, akurikirwa na Abizera Chanceline wo muri Nyarugenge wakoresheje amasegonda 21 n’iby’ijana 45 Umulisa Mariam nawe w’i Nyarugenge asoza ari uwa gatatu akoresheje amasegonda 22 n’iby’ijana 95.

Mu mupira w’amaguru mu bahungu Ikipe ya Ngororero yanganyije na Humura yo mu Karere ka Gasabo igitego 1-1 bateye penaliti Ngororero yinjiza 3-1 naho mu bakobwa Gisagara yaguye miswi na Buyoga.

Aya marushanwa arasozwa kuri iki Cyumweru ari nabwo hazamenyekana abakinnyi 26 babonye itike yo kuzaserukira u Rwanda mu marushanwa yo ku rwego rw’Isi azabera i Abu Dhabi muri Weruwe 2019.