Ubwo mu irerero ry’umupira w’amaguru The Winners Football Academy riherereye i Muhanga hibukwaga ku nshuro ya 25 Jenoside yakorewe Abatutsi havuzwe uburyo abatutsi bari batuye muri ako gace bishwe urubozo mu 1994.

Kabgayi ni kamwe mu duce twibasiwe cyane n’interahamwe mu gihe cya Jenoside cyane cyane ko ahubatswe urwibutso ubu ari ho hahoze icyicaro cy’ishyaka MDR Parmehutu ryashinzwe bwa mbere na Grégoire Kayibanda.

Ndejuru Abdoul Hidou, umwe mu baharokokeye yavuze ko indege yari itwaye Perezida Habyarimana Juvénal ikimara kuraswa, habayeho ubwicanyi ndengakamere.

Yavuze ko abatutsi bageragezaga kwihisha mu ishyamba no mu bihuru ariko interahamwe zikabahiga kugeza zibavanyemo.

Ndejuru yavuze ko Interahamwe za Kabgayi zari zaratsuye umubano n’iza Ngororero, zikora igikorwa cy’agashinyaguro cyiswe ‘Kwereka abanya-Ngororero uko umututsi asa’, aho ngo zafataga abihishe zikabarundira hamwe.

Nyuma y’iminsi itatu ngo zaje kuburiza imodoka nini zibavana i Kabgayi ziberekeza i Ngororero kwerekanwa. Buri bariyeri zageragaho ngo zahasigaga abatutsi batatu kugeza babagejeje mu Ngororero ari mbarwa maze zibica urw’agashinyaguro.

Visi Meya w’Akarere ka Muhanga ushinzwe imibereho myiza y’abaturage; Mukagatana Fortunée yabwiye abana barererwa muri The Winners gukura birinda ivangura kugira ngo ayo mahano yabaye mu Rwanda atazasubira.

Ati “Bariya mwabonye (mu rwibutso) batoraguwe ku misozi, mu bihuru, mu migezi ndetse no mu byobo bitandukanye bagiye bajugunywamo. Iyo bataza kubica ubu bamwe bakabaye bakomeye mu makipe nka AS Muhanga, Rayon Sports, APR Fc n’andi ariko ayo mahirwe ntabwo bayabonye, bayabujijwe n’abanyarwanda bagenzi babo babishe. Tugomba guhora tugaruka kubibuka kugira ngo icyo bazize kitazongera kubaho ukundi.’’

Umuyobozi w’irerero ry’umupira w’amaguru rya The Winners Football Academy; David Nshimiyimana yavuze ko iki gikorwa ari icyo kwibuka inzirakarengane zazize Jenoside ariko by’umwihariko abana bakinaga umupira w’amaguru bazize Jenoside ndetse no gucengeza ubutumwa bwo kurwanya ingengabitekerezo yayo mu bana bakina umupira w’amaguru kuri ubu.

Irerero rya The winners ryashinzwe mu 201. Ni rimwe mu marerero atanga umusanzu mu iterambere ry’umupira w’amaguru, aho abakinnyi bayo bagiye boherezwa mu makipe makuru ndetse n’amashuri atandukanye yigisha umupira w’amaguru hano mu Rwanda.

Polisi y'igihugu yabacungiraga umutekano

Bamwe mu bana bakoze utu rugendo bari bitwaje indabo bashyize kumva ishyinguyemo abanya Kabgayi bazize Jenoside

Bari bitwaje ibyapa byerekana byamagana Jenoside yakorewe abatutsi mu mwaka w'1994

Mu rugendo rwo kwibuka, aha basohokaga muri Sitade ya Muhanga bagana ku rwibutso rwa Kabgayi

Abana barererwa muri The Winners bakora urugendo rwo kwibuka mu mujyi wa Muhanga

Abana bigishwa umupira w'amaguru mu irerero rya The Winners binjira mu rwibutso ngo baganirizwe ndetse banerekwa uko umugambi mubisha wo gutsemba abatutsi wateguwe ukanashyirwa mu bikorwa

Visi Meya w’Akarere ka Muhanga ushinzwe imibereho myiza y’abaturage Mukagatana Fortunée atambuka ngo ashyire indabo ku rwibutso rwa Kabgayi

Ingabire Alice wari uhagarariye IBUKA yashyize indabo ku mva ndetse yunamira n'inzirakarengane ziharuhukiye

Umuuyobozi wa The Winners Football Academy, David Nshimiyimana ashyira indabo ku mva iruhukiyemo inzirakarengane zazize Jenoside yakorewe abatutsi

Abana batorezwa muri The Winners bateze amatwi uburyo Jenoside yateguwe

Meya w'akarere ka Muhanga Uwamariya Béatrice ashyira indabo ku mva ishyinguyemo inzirakarengane za Jenoside

Umuyobozi w'ingabo mu karere ka Muhanga aha icyubahiro abashyinguye mu rwibutso rwa Kabgayi

Umuyobozi wa Polisi y'igihugu mu karere ka Muhanga aha icyubahiro abashyinguye mu rwibutso rwa Kabgayi

Abana batewe ishavu n'ubutumwa bahawe bw'ukuntu Jenoside yateguwe ikanashyirwa mu bikorwa

Bamwe mu barokokeye muri Kabgayi mu gihe cya Jenoside