Uyu mukino wabaye ku mugoroba wo ku wa Kane, ntiwagoye na gato ikipe ya Union Sportive Monastirienne kuko uduce dutatu muri tune amakipe yombi yakinnye, ari yo yagiye iza imbere ya Rivers Hoopers BBC.

Agace ka mbere karangiye US Monastir iri imbere n’amanota 24-12, agace ka kabiri nako karangira iyi kipe yo muri Tunisia iri imbere ku manota 25-10, gusa agace ka gatatu Rivers Hoopers BBC igatsinda ku manota 25-21 mu gihe aka kane katsinzwe na US Monastir ku manota 29-23.

Umukino warangiye ikipe ya Union Sportive Monastirienne ari yo yegukanye intsinzi ku giteranyo cy’amanota 99-70, harimo ikinyuranyo cy’amanota 29 hagati yayo na Rivers Hoopers BBC.

US Monastir yahise iyobora itsinda A ririmo na Patriots BBC yo mu Rwanda ndetse iri muri ¼ cy’iri rushanwa riri kubera i Kigali kugeza tariki ya 30 Gicurasi.

Robert Christopher Daniels wa Rivers Hoopers ni we mukinnyi witwaye neza muri uyu mukino nyuma yo gutsinda amanota 25 akanasama imipira 11 yahushijwe n’ikipe bari bahanganye.

Radhouane Slimane wa Union Sportive Monastirienne ni we watsinze amanota menshi ku ruhande rw’ikipe ye (23), mu minota 24 yakinnye y’umukino, atanga imipira itandatu yavuyemo amanota.

Ku wa Gatandatu, Patriots BBC izakina na US Monastir aho izatsinda izasoza iyoboye itsinda A naho Rivers Hoopers ikipe na GNBC ku Cyumweru, aho ikipe izatsinda izaba ifite amahirwe yo gukomeza muri ¼ nk’ikipe yabaye iya gatatu mu itsinda ariko yitwaye neza.

AS Salé yasanze Petro de Luanda muri ¼

Mu mukino wasoje iyabaye ku wa Kane, AS Salé yo muri Maroc yatsinze AS Police yo muri Mali amanota 88 kuri 79.

Nk’uko iyi kipe yo muri Maroc yakinnye umukino wa mbere mu itsinda aho yatsindiye FAP mu duce tubiri twa nyuma ni ko byongeye kugenda kuko muri uyu mukino agace ka mbere AS Police yitwaye neza itsinda amanota 19 ku 8, agace ka kabiri izikipe zinganya amanota 16 kuri 16.

Mu gace ka gatatu AS Salé yatsinze bikomeye AS Police amanota 31 kuri 19 ndetse no mu gace ka kane itsinda amanota 33 kuri 25.

Umukinnyi Terrel De Von Stoglin wafashije AS Salé gutsinda FAP ku mukino wa mbere, no muri uyu mukino wa AS Police yitwaye neza atsinda amanota 40 ari na we watsinze amanota menshi mu mukino.

Ikipe ya Petro de Luanda na AS Salé nyuma yo gutsinda umukino wa kabiri, zahise zibona itike ya ¼ cy’irangiza aho zifite amanota ane naho FAP na AS Police zikaba zifite amanota abiri.

Ku mukino w’umunsi wa nyuma mu itsinda B, ku Cyumweru, Petro de Luanda izakina na AS Salé zishakamo ikipe igomba kuzamuka iyoboye itsinda mu gihe FAP na AS Police na zo zizahura, izatsinda ikazaba ifite amahirwe yo gukomeza muri ¼.

Kuri uyu wa Gatanu tariki 21 Gicurasi 2021 ni umunsi w’ikiruhuko ku makipe yose, imikino izongera kuba ku wa Gatandatu tariki 22 Gicurasi 2021.

Benjamin Chukwukelo Uzoh wa Rivers Hoopers ashoreye umupira mu gihe yacungirwaga hafi na Omar Obada wa US Monastir

Mourad El Mabrouk agerageza gufata umupira yari ahanganiye n'umukinnyi wa Rivers Hoopers

Benjamin Chukwukelo Uzoh wa Rivers Hoopers atangiza umukino

Benjamin Chukwukelo Uzoh agerageza gutsinda amanota nubwo yari yitambitswe na Mohamed Mokhtar Ghayaza

Ben Romdhane wa US Monastir atera Lancer franc nyuma yo gukorerwaho ikosa

Majok Ater James wa US Monastir atsinda dunk muri uyu mukino

Majok Ater James (21) wa US Monastir yakoze amanota menshi muri uyu mukino

Majok Ater James (21) yarushaga cyane abakinnyi ba Rivers Hoopers BBC

US Monastir niyo yayoboye umukino umwanya munini

Ben Romdhane ahanganiye umupira na Ikechukwu Benjamin (22) na Valdis Sullivan (24) ba Rivers Hoopers