Abakinnyi bo guhanga amaso mu mikino ya nyuma ya BAL 2026

00:00:00 IGIHE NETWORK

KINYARWANDA

ENGLISH

FRANCAIS

Abakinnyi bo guhanga amaso mu mikino ya nyuma ya BAL 2026

Yanditswe na Iradukunda Olivier

Kuya 22 May 2026 saa 10:51

Yasuwe :

Yavuzweho:

U Rwanda rugiye kongera kwakira imikino ya nyuma ya BAL 2026. Ni irushanwa riba kuva kuri uyu wa Gatanu, tariki ya 22 kuzageza 31 Gicurasi 2026, ikaba inshuro ya gatanu muri esheshatu rimaze gukinwa, imikino yaryo ya nyuma igiye kubera mu Rwanda.

Amakipe umunani ni yo agiye gukina imikino ya nyuma y’iri rushanwa. Ayo makipe ni RSSB Tigers yo mu Rwanda, Dar City yo muri Tanzania, Club Africain yo muri Tunisia, ASC Ville de Dakar yo muri Sénégal, Al Ahly yo mu Misiri, Al Ahly Ly yo muri Libya, FUS Rabat yo muri Maroc na Petro de Luanda yo muri Angola

Aya makipe yose azakinira muri BK Arena, azaba agizwe n’abakinnyi 96. Tugiye kurebera hamwe bamwe muri bo bitezweho gufasha amakipe yabo kuzitwara neza.

Craig Randall

Umunyamerika Craig Randall wa RSSB Tigers, ni umwe mu bahanzwe amaso na benshi.

Uyu mukinnyi w’imyaka 30 aheruka kwigaragaza cyane mu mikino ya Kalahari Conference, aho yanditse amateka yo kuba uwatsinze amanota menshi mu mukino umwe wa BAL.

Randall uzwiho gutsinda amanota atatu menshi, no kwihutisha umukino. Yitezweho gufasha Tigers kuba ikipe ya mbere yo mu Rwanda izagera ku mukino wa nyuma wa BAL.

Umunyamerika Craig Randall wa RSSB Tigers azwiho gutsinda amanota atatu menshi

Nuni Omot

Umunyamerika ukomoka muri Sudani y’Epfo, Nuni Omot, ni undi mukinnyi utegerejwe cyane muri iyi mikino.

Uyu ari mu bakinnyi bahenze ku mugabane wa Afurika, dore ko yanahawe igihembo cy’Umukinnyi Mwiz (MVP) wa BAL mu 2023. Icyo gihe yakiniraga Al Ahly yo mu Misiri, anayihesha igikombe muri uwo mwaka.

Iyi kipe ni yo yongeye gukinira, akaba yitezweho kuyifasha kwisubiza iri rushanwa.

Omot uri mu bakinnyi bihuta cyane, yakinnye ku rwego rwo hejuru muri Basketball, kuko yakinnye Imikino ya Olempike, Igikombe cy’Isi, AfroBasket na shampiyona zitandukanye z’i Burayi no muri Aziya.

Nuni Omot ari mu bakinnyi bahenze ku muri Afurika

Joseph Lual-Acuil Jr.

Umunya-Australia ukomoka muri Sudani y’Epfo, Joseph Lual-Acuil Jr. ukinira Al Ahly Ly yo muri Libya, ni undi mukinnyi wo guhanga amaso muri iyi mikino.

Uyu mugabo w’igihagararo wabaye MVP wa BAL mu 2024, azwiho gusatira no kugarira cyane, ndetse akaba umuhanga mu gutsinda imipira ya kabiri, ibizwi nka ‘rebound’.

Joseph Lual-Acuil Jr. yabaye MVP wa BAL mu 2024

Childe Dundao

Umunya-Angola, Childe Dundao ukinira Atlético Petróleos de Luanda ni we mukinnyi wisangije agahigo ko kuba atarasiba irushanwa rya BAL kuva ryatangira gukinwa mu 2021, cyane ko ikipe ye ihora ibona itike yo kurikina.

Dundao wakinnye imikino 44 ya BAL, afite impuzandengo y’iminota 23,9 byibuze agaragara mu kibuga. Amaze no kujya mu ikipe nziza y’irushanwa inshuro enye (2022, 2023, 2024 na 2025).

Uyu yabaye umukinnyi mwiza muri Afurika, cyane ko ari we wabaye MVP wa AfroBasket iheruka ya 2025.

Childe Dundao yakinnye imikino BAL kuva mu 2021

Omar Abada

Umunya Tunisia, Omar Abada, yitezwe na benshi muri iyi mikino ya nyuma, aho ari umwe mu bafashije Club Africain mu mikino y’amajonjora ya Sahara Conference.

Si aba gusa kuko hari n’abandi bakinnyi bo kwitega. Aba barimo Mangok Mathiang wa RSSB Tigers, Donovan Williams wa Al Ahly Ly na Uchenna Iroegbu wa FUS Rabat.