Aya makipe yabigezeho ku wa Gatanu, tariki ya 14 Ugushyingo 2025, i Nairobi muri Kenya.

REG WBBC yabigezeho nyuma yo gutsinda Kenya Ports Authority amanota 62-45.

Wari umukino utegerejwe cyane KPA yatangiye neza Alima Doumbia atsinda amanota menshi. Agace ka mbere karangiye iyi kipe iyoboye umukino n’amanota 16-9.

REG WBBC yatangiranye imbaraga agace ka kabiri ibifashijwemo na Kayana Traylor na Kristina King bafashije iyi kipe kwigaranzura indi, igice cya mbere cyarangiye REG WBBC iyoboye umukino n’amanota 23 kuri 22 ya KPA.

Ikipe ya Sosiyete y’Igihugu Ishinzwe Ingufu yakomeje gukina neza no mu gace ka gatatu, Kiyobe Chantal na Kayana batsinda amanota menshi, ikinyuranyo kigera mu manota umunani (30-22).

Aka gace kagoye KPA cyane kuko yamaze iminota irindwi itaratsinda inota, mu gihe REG WBBC yakomeje gufatiraho ibifashijwemo na Kiyobe izamura ikinyuranyo kigera mu manota 40 kuri 22.

Agace ka gatatu karangiye REG WBBC ikomeje kuyobora umukino n’amanota 46 kuri 28 ya KPA.

Iyi kipe yo muri Kenya yajyanye imbaraga mu gace ka nyuma igabanya ikinyuranyo, mu gihe REG wabonaga yiraye yizeye intsinzi.

Umukino warangiye REG WBBC yatsinze Kenya Ports Authority amanota 62-45 igera ku mukino wa nyuma.

Undi mukino wa ½ wabanjirije uyu, APR WBBC yatsinze Les Hippos y’i Burundi amanota 82-61.

Umukino wa nyuma uzahuza APR WBBC na REG WBBC ku wa Gatandatu, tariki ya 15 Ugushyingo 2025.

Amakipe atatu ya mbere azabona itike yo kwitabira Imikino Nyafurika ya Africa Women’s Basketball League izabera i Cairo mu Misiri tariki ya 5 kugeza ku ya 15 Ukuboza 2025.

Kayana Traylor yatsinze amanota 18 mu mukino REG yatsinze KPA

Munezero Lamla ni umwe mu bagize umukino mwiza

Italee Lucas yafashije APR gutsinda Les Hippos

Destiney Philoxy yitegura gutera lancer franc